EBBARWA YA YAKOBBO EBBARWA YI YAKOBBO YANDIIKA 2

1Basyaange, mu bulamu bweeng'we koti abafukiiririra mu Mwaami weefwe Yesu Kristo, Omwaami w'oluyaali, haba simuhoyeere ohusosola mu bandu nimweema hu huboneha hw'ohumukulu. 2Niwichuhana omuundu muyiinda wefwaalire engila y'esaabbu nende engubo nyirifu niyeecha yi mwebusiire, handi omuundu wundi omumanani wefwaalire engubo ch'ebiseke yesi yeecha, 3mani mwabeeresa omuundu muyiinda oluyaali, nimumuboolera muti, “Yihala hu sisaala silayi muno sino,” nae mu boolera omumanani muti, “Yema ala, oba muti, yihala aasi hu loba mu makulu kange ano,” 4awo muba muteereo ohusosola akati-kaati weng'we mani mwehola koti abahengi b'omusango abali nende embaasa mbi. 5Basyaange mutekeerese! Mubaasa muti Nasae haba siyadoola abamanani b'ohusyaalo ohuba abayiinda mu fukiirira handi ohunyoola Obwaami bu yasuubisa abandu bamudaha? 6Nae eng'we mulekeresa abamanani! Abandu bayiinda haba sinibo ababafwinyirira nibabahwehweesa nibabayira mu biina? 7Haba sinibo abalomaloma bubi hu liita ly'oluyaali limwanyoola? 8Nimwoseresa bulai amalako k'obutuki akali mu byaandiikwa byolerefu kaboola kati, “Daha owaasyo koti lu wedaha omweene,” awo muba muhola esiindu silayi. 9Nae nimukabuhaniamo abandu ohweema hu huboneha hwaabwe hw'ohumukulu, awo muba muhola esibi, handi awo baabayira koti abahalaki b'amalako ohweema hu Lako liriwo. 10Olwohuba omuundu yeesi ohalaka kata elako lala, aba koti ohalaake amalako koosi. 11Olwohuba omuundu waboola ati, “Otayiranaanga,” niye yesi owaboola ati, “Otetaanga.” Kata notayiranaanga, nae weeta omuundu, awo oba omalire ohwehola omuhalaki w'amalako. 12Mani lomalome haandi holeenge ebiindu koti abandu babacha ohuheengera omusango ohweema hu lako lireeta emireembe. 13Olwohuba Nasae haba saachia hukwiira esisa omuundu otakwiira owaasye esisa namuheengera omusango. 14Basyaange, silayi siina si muundu ali nasyo naboola ati, “Ndi nende efukiirira”, nae ebiholwa byae haba sibyekesa bityo? Efukiirira yae eyo yong'ene busa yinyala ohumuwonia? 15Koti esy'ohuboneraho, niwichuhira yabaawo owasyeeng'we musaacha oba omuhasi, otaaliho nende esy'ohwefwaala oba eby'ohulya bimala, 16bimuhoonya siina mulala hweeng'we namuboolera ati, “Nasae ahubeerese ehabi! Ba bilai, handi olye bilai,” natamubereese syaaba nadaha mu bulamu bwae? 17Nilwo lu siri nende efukiirira: niyiba yong'ene ataali ebiholwa biyisiira, efukiirira eyo yiba efu. 18Nae owundi hweeng'we niyeecha yaboola ati, “Ewe oli nende efukiirira, nae ese ndi nende ebiholwa.” Mba ndakobolamo endi, “Njekeseho koti lu onyala ohuba nende efukiirira ataali ebiholwa. Nae ese njia ohuhweekesa efukiirira yange ohweema hu biholwa byaange.” 19Mufukiirira muti Nasae aliwo mulala yeng'ene? Esyo silayi! Kata emisaambwa chosi chifukiirira chityo, handi chitengereha nende obuti. 20Omusiru ewe! Odaha bahwekese bati efukiirira yibulamo ebiholwa yibula obuhoonyi? 21Yibbulaimu kuuka yeefwe yeehola omulungifu mu moni wa Nasae atye? Byali ohweema hu biholwa byae, koti lu yawaanira Nasae Yisaka omwaana wae hu alutaari. 22Awo onyala ohubona oti, efukiirira yae nende ebiholwa byae biholera alala; handi efukiirira yae yomiisibwa nende ebiholwa byae. 23Handi ebyandiiko byolerefu byolerera abweene ebiboola biti, “Yibbulaimu yafukiirira mu Nasae handi ohweema hu fukiirira yae, Nasae yamubala koti omuundu mulungifu.” Handi Nasae yalanga Yibbulaimu ati omwiicha wae. 24Sakira, omuundu aholwa yaaba omulungifu nende Nasae ohweema hu biindu byaahola ataali ohweema hu fukiirira yong'ene. 25Nilwo busa lu byali nende Rahabbu omuhasi mucheke wekusa. Nasae yamuhola ohuba omulungifu nae ohweema hu biholwa byae, koti lu yakaanira Abayisirayiri bahemeresi mani yaabahoonya ohwiruha nibabitira hu ngira yindi. 26Mani koti lu mubiri kubulamo omwooyo kuli omufu, nilwo lwosi lu fukiirira yibulamo ebiholwa yosi yiri efu.

will be added

X\