EBBARWA YA YAKOBBO EBBARWA YI YAKOBBO YANDIIKA 1

1Ebbarwa yitula eyiri Yakobbo, omuhalaabani wa Nasae nende ow'Omwaami Yesu Kristo. Heesa eng'we enjia ehumi-na-chibiri ech'abandu basalaanira mu syaalo syoosi. 2Basyaange, ebidinyu byabuli ngeri nibibakwaaho, mwebaleenge muti muli abeehabi. 3Olwohuba mumanyire muti efukiirira y'eng'we niyihemebwa mani mwaahaya ohukwa, awo munyoola amaani kohwesimiirisa. 4Mubone muti muli nende ohwesimiirisa mu bulamu bw'eng'we bwoosi, hu munyale ohwehola abandu balungifu handi abechufu, nimutaaliho esiindu syoosi simwekoomba. 5Nae naliwo omuundu yeesi mweng'we otaali nende amakesi, leha yekongooye Nasae, ochia ohumubeeresa amakesi; olwohuba Nasae niye okaba ebiindu buli muundu mu bungi. 6Nae oyo oba niyekongooya, lehe yekongooye nende efukiirira, natakanaa-kana. Omuundu yeesi okana-kana ali koti efwiinda y'omu nyaanja, yi muyaka kuhubba kwaayira eno nende era. 7Omuundu ofwaana atyo, otanyala ohuheengao esy'ohuhola, 8haba saacha hunyoola esiindu syoosi ohutula eyiri Omwaami. 9Abakurisito bamanani bahoyeere ohwehoya Nasae nabaniinia akulu, 10handi Abakurisito bayiinda, bahoyeere ohwehoya Nasae nabeesa aasi. Olwohuba abayiinda bacha ohumalibwao koti esimuli sy'omusiino. 11Olwohuba elyuuba litula nende obumemu bwaalyo busimamula syooma; ebimuli byaahwo bikwa, mani obulayi bwaasyo bwaawa. Mu ngeri nasilala eyo nilwo lu bayiinda bacha ohusihiriswa nibasisiiri mu hunyaahana hwaabwe. 12Ali nende ehabi omuundu womiirira mu fukiirira ebihemo nibimwoolaho, olwohuba naaba naamalire ohuyingira amahemo, achia ohunyoola ekofya y'obutuki y'obulamu yi Nasae yamala ohusuubisa abamuheera. 13Omuundu nanyoola ebihemo bifwaana bityo, atabolaanga ati, “Ebihemo bino bitula eyiri Nasae,” olwohuba Nasae haba saanyala huhemebwa nende esibi syoosi, handi Nasae mweene saahemaangaho omuundu yeesi. 14Nae omuundu yeesi anyoola ohuhemebwa ebibaaso byae biba nibihweesa omwooyo kwae nibikuyira mu sibi. 15Mani obwekoombi bubi obwo buhula, mani bwebula esibi. Handi esibi nisihulire siibula ohufwa. 16Basyaange baheerwa, mutabachibwaanga! 17Buli siyaanwa silayi handi esiichufu, situla Mukulu; situla eyiri Nasae Seefwe, owaloonga obulafu bwo Mukulu, otakaluuhana-kaluuhana oba yaleeta esiirima naakaluhaana. 18Ohweema hu hudaha hwae omweene, yatwiibula handi nabitira mu mboosi y'adyeeri, huhunyale ohuba ebyaamo bitaangira mu biloonge byae byoosi. 19Basyaange, mudiire emboosi chino bulai! Buli muundu ahoyeere ohuba omwangu mu huwulira, nae otaanguya ohulomaloma handi otanyoolera bwaangu. 20Olwohuba etima ly'omuundu sirimuhoonya ohuhola bi obuluungifu bu Nasae adaha. 21Sakira, mwetuseho buli saambo mbi yoosi, nende ebiholwa bibi. Mweweeyo eyiri Nasae handi mufukiirire emboosi yi yataaka mu myooyo cheeng'we, eyinyala ohubaonia. 22Mutebacha abeene nimutekeeresa busa emboosi; nae muyite mu hola. 23Olwohuba omuundu owulira emboosi, mani yaahaya ohuyita mu hola, afwaana koti omuundu weebona mu syebonero mani yaamanya koti lu afwaana. 24Nae naamalire ohweebona koti lu afwaana, atulao ya waao, mani bwaangu-bwaangu niyebirira koti lu afwaana. 25Nae niwehaliirisa bulai mu malako kaonia abandu, mani wemeeda ohukabaasaho, ataali ohutekeeresaanga busa hwong'ene mani waakebiirira, nae waakata mu hola, Nasae achia ohuhubeeresa emikisa mu byohola. 26Omuundu yeesi nabaasa ati w'efukiirira, nae saanyala ohufuka olulimi lwae, efukiirira yae yiba yibulamo obuhoonyi, handi omweene aba yebachirisa busa. 27Efukiirira yi Nasae Seefwe ayira koti eyadyeeri omuwuma ohwebachirisa, niyo yino: ohuliinda abaana bafwiire, nende abahasi bafwiire mu bidinyu byaabwe, nende ohweliinda esyaalo sitahunyaasa.

will be added

X\