EBBARWA Y'ABAYIBBURANIYA 9

1Elakano litaangira lyali nende amalako k'ohwiinamiramo Nasae nende esifwo syombahwa nende abandu esy'ohwiinamiramo. 2Bombaha eyeema lifwaana liti: Esiseenge sy'erwaanyi, esilaangibwa Esifwo Syolerefu, mwalimo esiteeni sy'ohutaaho etaara, nende emeesa yiriho omugaati kuwaanirwa Nasae. 3Enyuma w'olubugo lw'ohubiri, yaliyo eyeema libalaanga bati, Esifwo Sihiramo Obwolerefu. 4Mu yeema omwo mwalimo alutaari y'esaabbu, yibanioheseraho obubbaani, nende Esanduku ly'Embuliirisania elyabwiihwa nende esaabbu enyaande choosi. Mu Sanduku omwo mwalimo ebbuka ly'esaabbu, omwalimo emaanu, endabuhi ya Arooni yali yasebuhaho amasaafu, nende amakina kabiri akandiikwaho amalako ka Nasae. 5Akulu w'Esanduku, hwaliho abakerubbi beekesa oluyaali lwa Nasae, nibabambuule embaya chaabwe, hu sifwo si bibi bireherwamo. Nae bulaanu, sino si nisyo esiha sy'ohunyonyola buli siindu mu bwiichufu. 6Yino niyo engeri yi biindu bino byatekehebwamo. Abalaamisi bengiraanga mu yeema ly'erwaanyi buli ludaalo ohuhola omulimo kwaabwe. 7Nae omulaamisi muhuluundu yeng'ene niye owengiraanga mu yeema ly'omukati, handi yaholaanga atyo ehabi lala hu buli mwaaka. Omulaamisi muhuluundu wuno haba siyengirangamo natakiingire amabaanga kaacha ohuwaanira Nasae hulw'ebibi byae omweene nende ebibi bi bandu bahola nibakoterwe bati bali nibahola ebibi. 8Mu biindu bino byoosi, Mwooyo Mwolerefu yeekesa ati, engira yoola mu Sifwo Sihiramo Obwolerefu, yali niyisisiiri ohumanyihana, eyeema litaangira nirisyemereo. 9Sino syali esifwaanani busa, esyeekesa ebiindu biholehana bulaanu. Ohweema hu tekeha yino, ebiyaanwa nende ebisolo biyaanirwa Nasae, haba sibinyala huhola omwooyo kw'omuundu wiinamira Nasae kwaaba omwolerefu elalira. 10Ebyo byalichingi busa ebiindu koti eby'ohulya, eby'ohung'wa, nende emiduunga miingi chikabuhaane ech'ohwelabya. Bino byoosi byali busa amalako k'ohumukulu, akahola ohwoola hu biha bi Nasae achia ohuteerao ehola njiaha. 11Nae Kristo yeecha koti Omulaamisi Muhuluundu w'ebiindu bilai biriwo bulaanu. Sakira eyeema lyahalaabaniramo, ly'oluyaali lungi muno handi lyolerefu ohuhirao. Eyeema lino haba silyaholwa nende amahono k'abandu, esyeekesa siti, haba siriri ely'ohusyaalo huno. 12Kristo niyabita mu yeema, mani yengira ehabi lala lyong'ene mu Sifwo Sihiramo Obwolerefu. Kristo haba siyengira mu Sifwo Sihiramo Obwolerefu nende amabaanga k'embusi nende ak'endaawu ohuwaanira Nasae. Nae yabukula amabaanga kae keene, mani yeengira nako mani yatunyoolera obuwonia butaakama. 13Olwohuba amabaanga k'embusi nende ak'endaawu nende ekohe ly'emoosi saambe ebiyaanywa hu bandu bataali abalabiswa, mani bino bibalabya humukulu hwong'ene. 14Sino nisiri esyadyeeri, mani amabaanga ka Kristo otaaliho esibi syoosi kacha ohulabya ebibaaso by'emyooyo nikabitusa mu biholwa bifu bihale, hu banyale ohuhalaabanira Nasae mulamu. 15Hulwesifune sino, Yesu niye oleeta etekeha y'Elakano yaaha, mani abo ba Nasae yalaanga banyale ohunyoola ehabi yi Nasae yasuubisa. Sino sinyalihana olwohuba yamala ohubaao ohufwa hununula abandu ohutula hu bibi bibahola, nibasisiiri mu Embuliirisania yitaangira. 16Yi silaamo syandiike yi siri, ahoyeere ohubaao esiindu syomiisa siti omuundu wasyandiika yamala ohufwa. 17Olwohuba esilaamo syandiike esyo sibulamo obuhoonyi, omuundu wasihola nasisiiri omulamu; handi haba sibasiholeraho, omuundu oyo nasisiiri ohufwa. 18Esyo nisyo esikera Elakano litaangira lyosi kata silyanyala ohwomiiswa amabaanga nikasisiiri ohwidiha. 19Nae Musa niyamala ohuboolera abandu ebilagiro byoosi koti lu biri mu malako, yabukula amabaanga k'elaawu nende ak'embusi, mani yakasasaania nende amaachi, mani yamala yakawaanya hu bandu boosi niyehoonyera olusaala lu laangwa luti 'yisopu' oluboyerweho obwooya bw'amakoondi bwa ranjaayi, mani yabwinihamo, mani yaamala yakawaanya hu sitabo sy'amalako, nende hu bandu boosi. 20Mani Musa naboola ati, “Kano niko amabaanga akomiisa elakano li Nasae yabalagira ohwoseresa.” 21Handi mu ngeri nasilala eyo, Musa yawaanya amabaanga hu yeema nende hu biindu byoosi ebyehoonyerwa mu hwiinamira Nasae. 22Olwohuba mu malako ka Musa, aambi buli siindu silabisibwa nende amabaanga, handi sisireherwamo amabaanga nikasisiiri ohwidiswa. 23Ebiindu bino ebiri koti efwaani y'ebiindu byo Mukulu, byali bihoyerwa ohulabya abandu mu ngeri eyo. Nae ebiindu byo Mukulu bidaha esiyaanwa silayi sihiraho ebya muno. 24Olwohuba Kristo haba siyengira mu Sifwo Sihiramo Obwolerefu si bandu bahola busa, esyali koti esifwaanani sy'obwihalo bwadyeeri bweene. Kristo yengira Mukulu bweene, yaali bulaanu mu moni wa Nasae hulweefwe. 25Omulaamisi muhuluundu w'Esiyudaaya yengiraanga buli mwaaka mu Sifwo Sihiramo Obwolerefu nende amabaanga k'ebisolo. Nae Kristo haba siyengira Mukulu ohwewaayo omweene amahabi maangi. 26Olwohuba Kristo yahabeere nahoyera ohusaanda amahabi maangi ohutulira elalira mu huloongwa hw'esyaalo. Nae bulaanu, yabonehana ehabi lala lyong'ene mu ndaalo chaakamayo chino, ohumalao ebibi ohweema hu siyaanwa silala sy'obulamu bwae syeene. 27Koti lu siri, buli muundu yeesi w'ohufwa ehabi lala, handi naamalire ohufwa, Nasae amuhengere omusango. 28Mu ngeri nasilala eyo, Kristo yesi yawaanwayo ehabi lala ly'ong'ene koti esiyaanwa simalao ebibi by'abandu bangi. Handi achia ohubonehana ehabi ly'ohubiri. Haba siyaheeche ohulwaanisa esibi handi, nae yaheeche ohuwonia busa abo abamulindiriire.

will be added

X\