EBBARWA Y'ABAYIBBURANIYA 8

1Sino nisyo esiindu sihuluundu mu biindu bihulomaloma; huli nende omulaamisi muhuluundu, owihaale Mukulu hu muhono muluungi kw'esisaala sy'obutuki sya Nasae w'Oluyaali Lwa akulu. 2Ahalaabana koti omulaamisi muhuluundu, mu bwihalo bwolerefu muno, mu yeema ly'adyeeri li Mwaami yoombaha ataali li muundu yoombaha. 3Buli mulaamisi muhuluundu, adoolebwa ohuwaanira Nasae esiyaanwa sy'esolo nende ebiyaanwa biindi, sakira omulaamisi muhuluundu wuno yesi, ahoyera ohuba nende esiyaanwa syohuyaana. 4Aaba naali ow'ohusyaalo huno, haba siyahabeere omulaamisi olwohuba aliwo abandu bandi, abawaana esiyaanwa ohuchaanakana nende amalako k'Esiyudaaya. 5Abalaamisi bahuluundu bano, omulimo ku bahola, kufwaanaho busa handi siiniha busa esy'ebiindu biholebwa Mukulu. Siri busa koti lu byali hu Musa. Niyali naali aambi ohwombaha Eyeema Lyolerefu lya Nasae, Nasae yamuboolera ati, “Bona oti ohola buli siindu ohweema hu ngeri yibahukereramo nooli hu lugulu.” 6Nae koti lu biri, Yesu yamala ohubeeresebwa omulimo kw'omulaamisi muhuluundu muno, ohuhira okw'abalaamisi abo, koti elakano li yatekeha akati-kaati wa Nasae nende abandu lyosi lihira ehale, olwohuba lyeema hu bisuubise by'ebiindi bihiramo. 7Elakano litaangira liba nilitaalimo esibi syoosi, elakano ly'ohubiri haba siryahadahiibwe. 8Nae Nasae yanyoola esibi hu embuliirisania yitaangira, sakira yaboola ati, “Omwaami aboola ati endaalo chiri ohwiicha, chinja ohuholeramo elakano yaaha nende Abayisirayiri alala nende abandu b'oluyia lwa Yuda. 9Elakano elyo haba sirichia ohuba koti lindahola nende kuuka yaabwe. hu ludaalo lundabadiirira hu muhono nimbeemerera ohubatusa mu syaalo sy'Emisiri. Olwohuba haba sibali nende obwesikwa hu embuliirisania lindahola nabo, sakira haba sindabadeebaho. 10Mani lino nilyo elakano linja ohuhola nende Abandu Bayisirayiri Omwaami aboola ati, mu ndaalo chiicha: njia ohuta amalako kange mu bibaaso byaabwe, handi njia ohukandiika mu myooyo chaabwe, mani njia ohuba Nasae waabwe, handi nabo ohuba abandu bange. 11Handi abulao omuundu yeesi ochia ohweekesa owaasye oba ochia ohuboolera owaasye ati, ‘Manya Omwaami,’ olwohuba boosi bacha ohuumanya, ohutulira elalira hu muundu ohiramo obudiidi, ohwolera elalira hu muundu ohiramo obuhoongo. 12Njia ohuleheramo ebibi byaabwe handi siinjia hwichulisa ebibi byaabwe lundi.” 13Nasae ohulomaloma hu embuliirisania njaaha, yakofusa elakano lyataangira; nae buli siindu sikofula mani sya waamo obuhoonyi siba siri aambi ohusihirira.

will be added

X\