EBBARWA Y'ABAYIBBURANIYA 7

1Melikisedeki wuno, yali omutuki wa Salemu, handi omulaamisi wa Nasae Ohiramo Obuhulundu. Koti lu Yibbulaimu yali natula mu biita bi yeeteramo abatuki bane, Melikisedeki yabukaanana nae mani yamuberesa ehabi. 2Mani Yibbulaimu yeecha yaamubeeresa esituundu silala hu buli bituundu ehumi ebyabuli siindu siyali ayaayire mu hulwaana eye elyo. (Amahulundu kataangira ak'eliita Melikisedeki niko, “Omutuki w'Obuluungifu”; handi koti luyali omutuki wa Salemu, amahulundu k'eliita lyae handi niko, “Omutuki w'Emireembe.”) 3Ebimulomalomwaho, haba sibituumbula ebidiira hu laatang'ene oba ng'ina, oba hu bakuukaang'ene yeesi; oba ebidiira hu hwibulwa hwae oba hu hufwa hwae. Melikisedeki afwana koti Omwaana wa Nasae; mani adoong'a naali omulaamisi endaalo choosi. 4Boneho koti lu yanyoola oluyaali! Yibbulaimu kuuka yeefwe mumanyirifu, yesi yamubeeresa esituundu silala hu bituundu ehumi syabuli siindi siyali nayaayire mu biita. 5Olwohuba amalako kafukiirira abechuhulu ba Leefi abali abalaamisi ohusolosa esituundu silala hu bituundu ehumi esya buli siindu ohutula eyiri abandu ba Yisirayiri. Sino syekesa siti, esituundu esyo sisoloswa ohutula hu bandu baabwe beene, kata nende bahaba nibali abechuhulu ba Yibbulaimu. 6Melikisedeki wuno haba siyali ow'olwiibulo lw'oluyia lwa Leefi, nae yasolosa esituundu silala sy'ebituundu ehumi ohutula hu Yibbulaimu, handi yaamubeeresa ehabi koti omuundu naali nende esisuubise sya Nasae. 7Ataali ohukana-kana hwoosi, omuundu obeeresa ehabi w'oluyaali ohuhira omuundu yaaberesa ehabi chae. 8Nae ebidiira hu balaamisi, esituundu silala hu bituundu ehumi sisoloswaanga nende abandu bafwa; nae ebidiira hu Melikisedeki, esituundu silala hu bituundu ehumi, syasoloswa nende omuundu mulamu, koti lu byandiiko byolerefu biboola. 9Handi hunyala ohuboola huti Yibbulaimu yatuunga esituundu silala hu bituundu ehumi, ohweekesa ati Leefi (yi beechuhulu baasolosa esituundu silala hu bituundu ehumi) yesi yasituunga ohubitira mu mahono ka Yibbulaimu. 10Olwohuba Leefi yali nasisiiri ohwiibulwa, nae yali nasisiiri mu Yibbulaimu kuukaang'ene lu Melikisedeki yabukaanana nende Yibbulaimu. 11Ohweema hu mulimo kwa Abaleefi kw'obulaamisi, nimwo omwatula amalako akaberesebwa abandu ba Yisirayiri. Bulaanu, emirimo ch'Abaleefi chiba nichali emilai, lwasiina handi abalaamisi bandi abafwana koti Melikisedeki badahibwa, ataali bafwaana koti Arooni? 12Olwohuba nabaawo ohukaluuhana mu malako k'ohudoola abalaamisi, awo wosi aaba aliwo engaluuhana mu malako ka Musa mwosi. 13Handi Omwaami weefwe, yi biindu bino bilomalomaho, yali ow'oluyia lundi, handi abula omuundu wundi yeesi ow'oluyia lwae owali ahalaabaneho koti omulaamisi. 14Olwohuba simanyihaane bulai bweene siti, Omwaami weefwe yali ow'olwiibulo lwa Yuda, handi Musa haba siyatuumbulaho hu luya luno naalomaloma hu balaamisi. 15Emboosi yino yemeeda ohubonehera elalira alafu; olwohuba omulaamisi wundi yabonehana oli koti Melikisedeki. 16Haba siyaholebwa omulaamisi ohweema hu malako k'abandu; nae yeehola omulaamisi, ohweema hu maani k'omuundu oli nende obulamu butaakama. 17Olwohuba ebyandiiko byolerefu biboola biti, “Ochia ohuba omulaamisi endaalo choosi, oli koti Melikisedeki.” 18Sakira elako hale lisudisibwa endulo, olwohuba lyali ekata handi elibulamo obuhoonyi. 19Olwohuba amalako ka Musa kali nikatanyala ohuhola esiindu syoosi ohuba esyolerefu. Nae bulaanu, esuubi lihira obulayi lileeterweo li hubitiramo hwoola aambi nende Nasae. 20Nae sino haba sisyaholehana ataali esichubo sya Nasae. Abandi boosi baholwa ohuba abalaamisi ataali esichubo syoosi. 21Nae Yesu yeehola omulaamisi ohubitira mu sichubo koti lu Nasae yamuboolera ati, “Omwaami yechubire esichubo mani haba saachia hukaluuhania ebibaaso byae: ‘Oli omulaamisi endaalo choosi.’ ” 22Mani sakira ohwechuba ohwo hwahola Yesu yaaba esyomiiso syomiisa elakano layi lihira ehale. 23Handi aliwo engabuhana yiindi: abalaamisi bandi abo bali abaangi, olwohuba bali nibafwa, mani sibanyala ohwemeeda nende omulimo kw'abwe okwo. 24Nae koti Yesu ali omulamu endaalo choosi, omulimo kwae koti omulaamisi, sikunyala hudiisibwa omuundu wundi koti omusiha. 25Sakira Yesu anyala ohuwonisira elalira bandu bacha eyiri Nasae nibamubitiramo, olwohuba aliwo omulamu endaalo choosi ohubekongooyera eyiri Nasae endaalo choosi. 26Yesu niye Omulaamisi Muhuluundu onyala ohutuhoonya mu buli siindu sihudaha. Olwohuba mwolerefu niye, handi abulaho esisobyo syoosi, oba esibi syoosi; mwolerefu handi yaawulibwa ohutula hu baholi b'ebibi, mani yakiingwa yaaninisibwa akulu ohubita ekulu. 27Haba saali koti abalaamisi bahuluundu bandi; haba saadahibwa ohuwaana ebiyaanwa buli ludaalo hulw'ebibi byae omweene, nende ohuwaana ebiyaanwa hulw'ebibi by'abandu bandi bosi. Yawaana elalira esiyaanwa silala syong'ene, koti lu mweene yeweerayo koti esiyaanwa. 28Amalako ka Musa kahola omuundu otaali omwolerefu ohuba omulaamisi muhuluundu; nae esisuubise si Nasae yahola niyechuba, esyeecha lunyuma lw'elako, sihola Omwaana wa Nasae mweene, owaholwa ohuba omwolerefu w'elalira endaalo choosi.

will be added

X\