EBBARWA Y'ABAYIBBURANIYA 6

1Lehe hwemeede nende enjekesa nyaangafu, hulehane nende enjekesa yatangira yidiira hu Kristo. Haba sihuhoyeere ohuchaaka ohwombaha omusiingi kundi, okw'ohukaluhana ohutula hu mirimo chibulamu obuhoonyi, nende ohufukiirira mu Nasae. 2Omusiingi kundi okw'ohweekesa ebidiira hu mbatiisa chikabuhaane, nende ohwisaho amahono, ebidiira hu husyuuha hw'abafu nende ohuheengerwa omusango hutaakama. 3Lehe huchie mu moni! Mani sino nisyo sihuchia ohuhola, Nasae naakanya. 4Olwohuba binyaliha bitye, abandu baba nibalehana nende efukiirira, ohukobosebwa enyuma baanyala ohweyolobya? Olwohuba hale bali nibali mu bulafu bwa Nasae; bahombaho hu siyaanwa syo Mukulu, handi banyoola omukabo kwaabwe okwa Mwooyo Mwolerefu. 5Bali nibamanya bati emboosi ya Nasae ndayi niyo, handi bamala ohumanya amaani k'endaalo chiicha. 6Mani beecha baalehana nende efukiirira yaabwe! Haba sisinyaliha ohubakobosa enyuma baanyala ohweyolobya ehabi liindi, olwohuba baba bali ohuhomerera Omwaana wa Nasae ehabi liindi, handi ohumuyemula mu moni w'abandu bangi. 7Nasae aberesa ehabi eloba ling'wa amaachi k'efula yilikwaaho buli siha, handi elibaaho ebimera biri nende obuhoonyi eyiri abandu baliba nilyalimirwa. 8Nae niliba nilimeraho busa amawa nende esiino, liba libula obuhoonyi; liba liri mu masira ka Nasae ohuliholimira, mani lyasihirisibwa nende omuliro. 9Nae basyaange, kata nihuba nihulomaloma huti, haba sihubeekanakanamo. Humanyire huti, mwanyoola emikisa chihiramo obulayi, ech'obuwonia bweeng'we. 10Nasae haba siyehubbira. Haba saacha hwibirira omulimo kumwahola, oba ohudahana hu mwamala ohweekesa mu buhoonyi bumwatusa nimuhoonya abandu bae, handi bu musyemeeda ohuhoonya Abakurisito baasyeng'we. 11Ohudaha hweefwe huhiramo huli huti, buli mulala hweeng'we ahoya yaliinda amawofu k'ohuhola esiindu silayi kae ohwolera elalira hu njakamo, hu biindu bimuli ohusuubira binyale byoolerere abweene. 12Haba sihudaha eng'we mwehole abakata, nae mube koti abandu bafukiirira handi abomiifu mu myooyo, hu munyale ohunyoola esiindu si Nasae yasuubisa. 13Nasae niyahola esisuubiso nende Yibbulaimu, yehoonyera eliita lyae omweene, olwohuba abulao omuundu omuhira oluyaali. 14Yasuubisa naboola ati, “Njia ohuhubeeresa omukisa, handi hubeerese abeechuhulu bangi muno.” 15Yibbulaimu yali omwesimiirifu, mani sakira yanyala ohunyoola esiindu si Nasae yali yamusuubisa. 16Olwohuba omuundu niyechuba, yeehonyera eliita ly'omuundu omuhiraho oluyaali, handi esichubo esyo simalao ohuyingana hubaao hwoosi. 17Bulaanu Nasae yadaha ohweekesa abo abacha ohunyoola siyasuubisa, esilai sihirao ati haba saacha hukaluuhania esichiiririrwa syae; mani sakira yameeda ohwomiisa esisuubise esyo niyechuba. 18Mani aliwo ebiindu bino bibiri, ebitanyala ohukaluuhana, handi bi Nasae atahanyala hubachaho. Mani sakira efwe abamala ohunyoola obwiiruhiro yaali, hugumisibwa muno ohwomiirira namaani hu sisuubise siri mu moni. 19Esuubi lino nilyo eliri koti enaanga y'obulamu bweefwe. Haba siyikanwa-kanwa, handi nyomiifu, handi yicha niyibita mu lubugo luhiinga lw'omunyumba ya Nasae, yengirira elalira mu sabo ly'omukati bweene. 20Yesu yamala ohututaangirira ohutuchiira mu kati bweene omwo, mani yaamala yeehola omulaamisi muhuluundu w'endaalo choosi, koti Melikisedeki.

will be added

X\