EBBARWA Y'ABAYIBBURANIYA 5

1Buli mulaamisi muhuluundu adoolebwa ohutula mu bandu baasye, mani atumibwa ohuhalaabanira Nasae hulwaabwe, ohukabula ebiyaanwa alala nende ebiweebwayo by'ebibi. 2Koti lu mweene oyo aaba naali omukata mu ngira nyiingi, anyala ohuba omuloonga eyiri abo ababa nibataamanyire esy'ohuhola mani abahola ebisobyo ebiingi. 3Handi koti lu mweene ali omukata, omweene yesi ahoyeere ohuwaayo ebiyaanwa, ataali hulw'ebibi by'abandu byong'ene, nae nende hulw'ebibi byae byeene. 4Abulao omuundu wedoolera omweene oluyaali lw'ohuba omulaamisi muhuluundu. Nae hulaanga hwa Nasae nihwo ohukera omuundu naaholebwa ohuba omulaamisi muhuluundukoti lu Arooni yali. 5Mu ngeri nasilala eyo, Kristo mweene haba siyetaaho oluyaali lw'ohuba omulaamisi muhuluundu. Ohutusaho, Nasae yamuboolera ati, “Oli Omwaana wange; olwaleero hwibuule.” 6Omweene oyo handi abundu wandi yaboola ati, “Ochia ohuba omulaamisi endaalo choosi, mu ngeri y'obulaamisi bwa Melikisedeki.” 7Yesu mu bulamu bwae naali hu syaalo, yekongooyanga Nasae, handi niyekweeda niyehuuma mu kono hoongo, handi naalira amasika maangi, Nasae wali naacha ohumuwonia ohufwa. Olwohuba yali omuloonga handi omufukiiriri muhuluundu, Nasae yamuwuliraanga. 8Kata nende niyali Omwaana wa Nasae, yeekera mu husaanda hwae ohuba omuwulisi. 9Mani niyaholwa ohuba omulungifu, yeecha yaaba otulaho obuwonia butaakama eyiri abo boosi abamufukiiriramo. 10Handi Nasae yamulangirira ohuba niye omulaamisi muhuluundu, mu ngeri y'obulaamisi bwa Melikisedeki. 11Huli nende ebiindu biingi bihuhoyeere ohulomaloma ebidiira hu siindu sino, nae bidinyu muno ohubibanyonyola koti lumuli abakata mu hutegeera. 12Ebiha bibeereo ebimala ohukera mwaaba nimwamala hale ohwehola abeekesa-nae kata katyo, eng'we musiidaha abeewo omuundu wundi obeekesa amasomo kataangira keene ak'emboosi ya Nasae. Ataali ohuba nimulya eby'ohulya byoomeranu, eng'we musisiiri busa nimuhoyera ohung'wa amabeere. 13Buli muundu yeesi oba nasiihoyera ohung'wa busa amabeere kong'ene aaba asisiiri omudoto, otaaliho nende obumanyirifu bwoosi mu siindu sidiira hu humanya esiindu sihoyera, oba esiindu sitahoyera. 14Eby'ohulya byomeranu, hu luwaande lundi, bihoyera abandu bahuluundu, ohubitira mu hweholeraanga abeene, boola baanyala ohumanya ohukabuhania akati-kaati w'esiindu silayi, nende esiindu sibi.

will be added

X\