EBBARWA Y'ABAYIBBURANIYA 4

1Bulaanu, Nasae yatubeeresa esisuubise hu hunyale ohunyoola obuwuluuhiro buyalomalomaho. Mani lehe hweliinde abulewo omuundu yeesi mw'eng'we otahoyera ohunyoola obuwuluuhiro bu yatusuubisa obwo. 2Olwohuba fwesi hwawulira Emboosi Ndai koti lu bosi bawulira. Bawulira emboosi, nae haba siyabahoonya, olwohuba nibayiwulira haba sibayaakanira nende efukiirira. 3Sakira efwe abafukiirira, lehe hunyoole obuwuluuhiro bu Nasae yasuubisa. Siri busa koti lu yaboola ati, “Etima lyandiira mani ndechuba nimboola endi: ‘Haba sibachia hwiingira kata nabudiidi mu buwuluhiro bwaange!’ ” 4Olwohuba abundu wandi mu byandiiko byolerefu, sino nisyo si biboola ebidiira hu ludaalo lwa hataanu-na-habiri: “Nasae yawuluuha hu mirimo chae hu ludaalo lwa hataanu-na-habiri.” 5Esiindu syeene sino handi silomalomwaho siti: “Haba sibahengireho kata nabudiidi mu buwuluhiro bwaange.” 6Abo abatangira ohunyoola Emboosi Ndai haba sibanyala ohunyoola obuwuluuhiro obwo, olwohuba haba sibafukiirira. Mani aliwo abandu bandi endaalo chino abacha ohufukiirirwa ohubunyoola. 7Handi Nasae yataawo oludaalo lundi lulaangwa luti, “Lwaleero.” Daudi hale yalomalomaho mu byandiiko byolerefu naboola ati, “Olwaleero, nimuwulira ekono lya Nasae, mutoomia emyooyo cheeng'we.” 8Yoswa aaba niyabeeresa abandu obuwuluuhiro, Nasae haba siyahaboleere handi ebidiira hu ludaalo lundi. 9Nae koti lu siri, abandu ba Nasae basidoong'ereyo nende obuwuluuhiro obuli koti ohuwuluuha hwa Nasae hu ludaalo lwa chitaanu-na-chibiri. 10Olwohuba buli muundu yi Nasae aberesa ohuwuluuha, awuluuha emirimo chae, koti lu Nasae yawuluuha echae. 11Mani sakira, lehe hukeseho koti lu hunyala ohunyoola obuwuluuhiro obwo. Sisihoyera omuundu yeesi hweefwe ohulekeresa ekono lya Nasae, koti lu ba kuuka yeefwe bahola, mani hwaahaya ohunyoola obuwuluuhiro obwo. 12Olwohuba Emboosi ya Nasae, namu handi yihola, handi njoki ohuhira olugaanga lwooki emaande chaalwo choombi. Yiheenga ohwoolera elalira yi mwooyo nende endasi bibukaanira yi nyiingo nende obuchunjuuni bibukaananira.Yimanyire obwekoombi nende ebibaaso by'abandu bya mu mwooyo. 13Abulao esiindu syoosi esinyala ohukiswa Nasae; ebiindu biloonge byoosi biri alafu, handi biikule mu moni wae. Handi efwe fweesi hucha ohwewosaho mu moni wae. 14Lehe bulaanu hwomiirire hu fukiirira yihutumbula. Olwohuba huli nende Omulaamisi Muhuluundu owamala ohwingira ohwoola mu moni wa Nasae bweene, oyo niye Yesu, Omwaana wa Nasae. 15Omulaamisi Muhuluundu yihuli nae, siniye oyo otatuchuunirwa hulw'obukata bweefwe. Ohutusaho, huli nende Omulaamisi Muhuluundu owahemebwa mu ngeri choosi koti chihuhemebwamo, nae haba siyaholaho esibi syoosi. 16Mani lehe hube abagumu husude aambi nende obwihalo bwa Nasae bw'oluyaali, eyiri esisa. Eyo niyo yihucha ohuchia ohukwiirwa esisa, handi hunyoole ehabi y'ohutuhoonya, buli lu huba nihudaha obuhoonyi.

will be added

X\