EBBARWA Y'ABAYIBBURANIYA 3

1Bakristo basyaange, mweesi mwalaangwa nende Nasae! Mubaaseho hu Yesu, yi Nasae yatuma ohuba Omulaamisi Muhuluundu w'efukiirira yi hutuumbula. 2Yali omwesikwa eyiri Nasae, owamudoola ohuhola omulimo kuno, koti lu Musa yesi yali omwesikwa mu mulimo kwae mu nyumba ya Nasae. 3Koti omwombahi w'enyumba anyoola oluyaali ohuhira enyumba yeene, mu ngeri nasilala, Yesu ali nende oluyaali lungi muno ohuhira Musa. 4Buli nyumba yoombahwa nende omuundunae Nasae niye omwombahi wa buli siindu. 5Nae Musa yali omwesikwa mu nyumba ya Nasae yoosi koti omuhalaabani, mani yalomaloma hu biindu bi Nasae yali achia ohuhola mu moni. 6Nae Kristo mwesikwa koti Omwaana wa Nasae oliinda enyumba ya Nasae. Huli enyumba yae nihudoong'a buli ludaalo nihuli abagumu, handi nihuli abomiifu mu siindu si husuubiramo. 7Mani sakira, koti lu Mwooyo Mwolerefu aboola ati, “Olwaleero, nimuwulira ekono lya Nasae, 8mutoomia emyooyo cheeng'we koti lu bakuuka yeeng'we bahola, koti lubajeemera Nasae, koti lu bali hu ludaalo olwo mu siparara, koti lu bamuhema. 9Eyo niyo yi bakuuka yeeng'we yi bahemera, kata nibaba nibamalire ohubona ebiindu bindahola mu mbaka y'emyaaka amahumi kane. 10Mani sakira ndeecha ndanyoolera nabo mani ndaboola endi, 'Buli siha bahyamu mu myooyo chaabwe handi bahaya ohuwulira amalako kange.' 11Sakira etima lyandiira mani ndechuba nimboola endi: ‘Haba sibachia hwiingira mu buwuluhiro bwaange.’ ” 12Mani basyaange mweliinde abulewo omuundu yeesi mw'eng'we oba nende omwooyo mubi okutafukiirira, ahaye ohutula hu Nasae mulamu. 13Ohutusaho, muhoyeere ohugumia abaasyeng'we emyooyo buli ludaalo, hasita emboosi “Olwaleero” mu byandiiko byolerefu yitudiiraho, hwabuleo omuundu yeesi hw'eng'we onyala ohubachiriswa nende esibi, mani yooma omutwe. 14Olwohuba fweesi hukabanira alala nende Kristo nihwomiisa obwesikwa bweefwe buhwachaaka nabo hwoola hu njakamo. 15Sino nisyo si byandiiko byolerefu biboola biti, “Olwaleero, nimuwulira ekono lya Nasae, mutoomia emyooyo cheeng'we koti lu bakuuka yeeng'we bahola, koti lu bajeemera Nasae.” 16Nae bandu siina abawulira ekono lya Nasae mani baamala baamujeemera? Abo nibo abandu boosi ba Musa yeemerera nabatusa mu Misiri. 17Nae bandu siina ba Nasae yanyoolerera hulw'embaka y'emyaaka amahumi kane? Nibo abandu bahola ebibi, mani baakwa baamala bafwiira mu siparara. 18Nae Nasae niyechuba naboola ati, “Haba sibahengire mu buwuluhiro bwaange,” yali alomaloma hu bandu siina beene? Yali alomaloma hu abo abali nibamujeemera. 19Bulaanu hubona huti, haba sibanyala ohwingira mu buwuluhiro bwae, olwohuba haba sibali nende efukiirira.

will be added

X\