EBBARWA Y'ABAYIBBURANIYA 2

1Mani sakira huhoyeere ohwomiirira muno mu bwadyeeri buhwamala ohuwulira, hu abulewo esiindu syoosi esinyala ohutukosa. 2Nikali mbwe emboosi yi bakuuka yeefwe banyoola ohutula hu bamalaika yali ey'adyeeri, handi abo abatayilonda oba bayifukiirira, banyoola ohusaandisibwa hu bahoyera. 3Bulaanu huba hucha ohwewonia hutye, nihulekeresa obuwonia buhuluundu buno? Omwaami mweene niye owataangira ohulaangirira obuwonia buno, handi abo abamuwulira batwomiisira bati bwadyeeri nibwo. 4Handi Nasae yesi yeecha yameeda ohwomiisa emboosi eyo naahola obulolero nende ebiwukisa alala nende eby'amaya bitaali nasilala, handi naakaba ebiyaanwa koti lwadaha ebiyaanwa bya Mwooyo Mwolerefu. 5Nasae haba siyataao bamalaika ohuba abatuki b'esyaalo sichia ohwiichaesyaalo sihuli ohulomalomaho. 6Ohutusaho koti lu syaboolwa abundu wandi mu byandiiko byolerefu siti, “Omuundu niye siina esikera ewe Nasae wamubaasaho muno? Omuundu-buundu busa niye naanu yodeebaho muno? 7Wamuhola ohuba aasi wa bamalaika ebiha ebidiidi muno; wamufwaasa ekofya y'oluyaali nende efuma, 8handi wamuhola atuke ebiindu byoosi.” Siboola siti, Nasae yamuhola “ohutuka ebiindu byoosi”; sino syekesera elalira siti yamubeeresa ebiindu byoosi. 9Nae hubona Yesu, owaholwa yabaaho aasi wa bamalaika hulw'esiha sidiidi, hwaanyale ohufwiira buli muundu hulw'esisa sya Nasae. Bulaanu humubona nafwaasirwe ekofya y'oluyaali nende efuma hulw'ohufwa hwae. 10Syali sihoyera Nasae, owaloonga handi oliinda buli siindu, ohubeeresa Yesu obunyala bw'ohuyira abandu mu buwonia ohubitira mu husaanda hwae, hwaanyale ohukera abaana bangi bakabaneho hu luyaali lwae. 11Alabya abandu ohutula mu bibi byaabwe, mani oyo olabya nende abo abalabisibwa, boosi bali nende Laata yaabwe mulala. Sakira Yesu saali nende esoni ohubalaanga abebulana bae. 12Aboolera Nasae ati, “Njia ohuboolera abandu bange ebiindu biwahola; njia ohuhufumia yi bebusiire alala.” 13Handi aboola ati, “Njia ohuta esuubi lyaange mu Nasae.” Handi aboola ehabi liindi ati, “Mbano ndi ano nende abaana ba Nasae yambeeresa.” 14Koti abo ba Yesu alaanga abaana, bali bandu ab'omubiri nende ab'amabaanga, Yesu yesi yeehola yafwaana nabo mani yaakabana hu bw'omuundu bwaabwe. Yahola atyo hwaanyale ohusihirisa Sitaani, oli nende obunyala hu hufwa. 15Yahola atyo, hwaanyale ohuboolola abo abali ababoye mu bulamu bwaabwe bwoosi olwohuba bali batya ohufwa. 16Sibonehera elalira siti, haba sahoonya ba malaika. Ohutusaho ahoonya abechuhulu ba Yibbulaimu. 17Mani sakira yahoyera ohwehola afwaanane nende abandu bae mu ngeri choosi, hwaanyale afwaane nende ba mwaanang'ina mu buli ngeri, hwaanyale ohuba Omulaamisi Muhuluundu waabwe mwesikwa, handi ow'esisa mu huhalaabana hwae eyiri Nasae, hu bibi by'abandu binyale ohuleherwamo. 18Mani bulaanu anyala ohuhoonya abo abahemebwa, olwohuba yesi omweene yahemebwa handi yasaanda.

will be added

X\