EBBARWA Y'ABAYIBBURANIYA 12

1Olwohuba efwe koti lu huli nende esidiiyiha sihoongo sy'abajulisi sitwebodohaanie, lehe hwetuseho buli siindu syoosi esitwehiingamo, nende esibi syatwomeraho muno, mani hwiruhe nende esinani embiro chituli mu moni. 2Lehe huhayisirye emoni cheefwe hu Yesu, yi fukiirira yeefwe yeemaho ohutula elalira hu huchaaka ohwolera elalira hu njakamo! Yesu haba siyatya omusalabba! Nae ohweema hu sangaalo lyali nilimuliindire mu moni, haba siyabaasa hu soni ch'ohufwiira hu musalabba chiyali achia ohunyoola, nae bulaanu yehaale hu muhono muluungi kw'esisaala sy'obutuki sya Nasae. 3Baaseho hu bidinyu biyabitamo; koti lu yesimiirisira ebidinyu byakiire awo, ohutula mu mahono k'abaholi b'ebibi! Mani mutakanya omwooyo kw'eng'we kwawaamo amaani mani mwaakwa. 4Olwohuba mu hulwaana hw'eng'we nende esibi, musisiiri ohwoola hu hwiidisa amabaanga keeng'we. 5Eng'we mwibiriire emboosi chigumia chi Nasae yalomaloma nang'we koti abaana bae ati, “mwaana wange, otalekeresaanga Omwaami nahukolola, handi otawechaangamo omwooyo Omwaami nahuboneresa. 6Olwohuba Omwaami akolola buli muundu yadaha, handi aboneresa buli muundu yayira koti omwaana.” 7Mugumireenge ohusaanda hu munyoola koti esibonereso situla eyiri Laata yeng'we. Aliwo omwaana yeesi yi simwaana ataboneresaangaho nadaha ohumukolola? 8Nimutanyoola ohusaandisibwa koti abaana bae boosi bali, sino syekesa siti haba simuli baana bae baadyeri, nae muli abaana b'erwaanyi busa. 9Handi buli muundu hweefwe, ali nende simwaana omukolola, handi hubeesamo busa oluyaali. Mani bulaanu efwe sihuhoyeere ohuba abaloonga muno eyiri seefwe w'omwooyo mani hwanyoola obulamu? 10Baseefwe abo bateemaho ohutukolola hulw'esiha sidiidi koti lu babona bati silayi yi bali ohutukolola. Nae Nasae atukolola natuboneresa hulw'obulayi bweefwe, hwaanyale ohutukabaho hu bwolerefu bwae. 11Nihunyoola ohusaandisibwa nibatukolola, esiha esyo, ohusaandisibwa ohwo hutubonehera koti esiindu sibi, esituleetera obuchuuni busa. Nae luunyuma abomiisibwa nende esibonereso sifwaana sityo, banyoola omuheemba kw'esangaalo lw'obulamu bulungifu. 12Siingise akulu amahono keeng'we kajoong'ere ako, handi yomiise amahumbo keeng'we katengereha ako! 13Kendereenge buli siha hu ngira ngololofu, hu hukulu hulema huhaye ohulemera elalira, nae huwone. 14Teemeho koti lu munyala ohubona muti, muli nende emireembe nende buli muundu yeesi, nimukeendera mu bulamu bwolerefu, olwohuba awumao omuundu yeesi ochia ohubona Omwaami naabula obwolerefu. 15Mweliinde abulewo omuundu yeesi okobola enyuma mani yaafwirwa sya Nasae. Handi lehe omuundu yeesi atehola koti omusaala mululu okwemeeda ohuhula mani kwanyaasa echaasye nende obusiba bwakwo. 16Mweliinde omuundu yeesi atehola omucheke handi otatya Nasae koti hale Esau owakusa ehabi yae y'obusiha koti omwaana muhuluundu hulw'esideru sy'eby'ohulya silala. 17Mumanyire koti lunyuma yateemaho ohukoonya ehabi cha simwaana nae baahaya ohumuba olwohuba haba siyanyala ohunyoola engeri yoosi eyohukaluuhaniamo ebibaaso bya simwaana, kata nende ayahaba niyateemaho ohwekweeda nende amasika kae. 18Musisiiri ohwoola hu hudiira hu biindu bimunyala ohudiiraho koti Bayisirayiri bali, koti hu lugulu lwa Sinai, olwali nende omuliro kwaaduha; musisiiri ohwoolaho hu siirima nende enang'oong'we, nende omuyaka kuduma, 19ekono ly'eturumbeta, oba ekono ly'omuundu. Abandu nibawulira ekono elyo, bekongooya bati batawuliraho emboosi yindi, 20olwohuba sibanyala ohwesimiirisira esilagiro syaboola siti, “Kata esisolo syoosi nisyegeeng'a hu lugulu olwo, sihoyeerwe ohuhubbwa amakina syaafwa.” 21Ebiindu bibabona byali ni bitiisa muno mani byaakera Musa yaboola ati, “Ndi ohutengereha handi obuti bundiirire!” 22Ohutusaho, mwiichire hu lugulu lwa Siyooni, nende mu siko sya Nasae mulamu, Yerusaalemu syo Mukulu, si bamalaika baasyo bali elifu nende elifu. 23Mwiichire eyiri omukanda kw'abafukiirira Kristo, abaana ba Nasae b'amberi, ba baandiika ameeta kaabwe Mukulu. Mwiichire eyiri Nasae, oheengera abandu boosi emisango, nende eyiri emyooyo ch'abandu balayi abaholwa aboolerefu. 24Mwiichire eyiri Yesu, owatekeha elakano yaaha, nende eyiri amabaanga keediswa akasuubisa ebiindu bilai muno ohuhiraho amabaanga ka Abbeli. 25Sakira mweliinde, handi mutahaya ohuwulira emboosi ch'omuundu oli ohulomaloma. Nisiri siti, abo abahaya ohuwulira omuundu olomaloma nabeekesa ebidiira hu huhweliinda hw'omusyaalo muno haba sibaona, bulaanu naafwe hunaone hutye nihuubbira omukoongo omuundu olomaloma natula Mukulu nadaha ati hweliinde. 26Mu biha ebyo, ekono lyadengaania esyaalo, nae ebiha bya bulaanu yasuubisa ati, “Handi njia ohudengaania ataali esyaalo syong'ene nae Ekulu lyosi!” 27Emboosi chino, “Handi ehabi liindi,” cheekesa bulai chiti, bacha ohudengaania handi ohusindikisa buli siindu siloonge, nae ebiindu bitanyala ohudengaanisibwa byong'ene nibyo ebicha ohudoong'a. 28Mani sakira, olwohuba mucha ohunyoola obwaami butanyala ohudengaanisibwa, lehe hwebase Nasae mani humwiinamire mu ngeri yimusangaasa, nihuli nende obuloonga nende ohutya; 29olwohuba Nasae weefwe, ali omuliro kusihirisa.

will be added

X\