EBBARWA Y'ABAYIBBURANIYA 11

1Bulaanu, ohuba nende efukiirira nihwo ohwekesera elalira huti, hucha ohunyoola ebiindu bi husuubira, ohwomiisira elalira huti hucha ohunyoola ebiindu bi hutabona. 2Ohufukiirira hwa bandu ba hale nihwo okwakera Nasae yabasiima. 3Efukiirira niyo eyikera hwamanya huti Nasae niye owaloonga ekulu nende esyaalo niyehoonyera emboosi yae, sakira ebiindu biboneha byaloongwa ohutula mu biindu bitaboneha. 4Efukiirira niyo eyakera Abbeli ya yaanira Nasae esiyaanwa silayi muno ohuhira esya Kaini. Efukiirira ya Abbeli niyo eyakera Nasae yamusiima koti omuundu mulungifu, olwohuba Nasae mweene yasiima ebiyaanwa byae. Handi efukiirira niyo eyikera Abbeli yaaba nasilomaloma, kata nende ayahaba niyamala ohufwa. 5Efukiirira niyo eyakera Enoka yaahaya ohufwa. Ohutusaho yayiribwa Mukulu eyiri Nasae, handi abulao omuundu yeesi owanyala ohumunyoola olwohuba Nasae yali amalire ohumuyira. Ebyandiiko byolerefu biboola biti, Enoka nasisiiri ohuyirwa Mukulu, yali amalire ohusangaasa Nasae. 6Abulao omuundu yeesi onyala ohusangaasa Nasae ataali efukiirira. Olwohuba omuundu wiicha eyiri Nasae ahoyeere ohuba nafukiirira ati Nasae aliwo, handi achia ohubeeresa buli muundu omukoonya omuheemba. 7Efukiirira niyo eyakera Nowa yaawulira ohulabula hwa Nasae ohudiira hu biindu byali nibicha ohukwaao. Efukiirira yakera Nowa yaawulira Nasae mani yoombaha elyaato li yawoneramo alala nende abandu bo mudaala lyae. Esyatulamo, esyaalo syaheengerwa omusango, nae Nowa yanyoola obuluungifu ohutula eyiri Nasae obutula mu fukiirira. 8Efukiirira niyo eyakera Yibbulaimu yaawulira Nasae niyali namulaanga ohutula mu syaalo syae, ohuchia mu syaalo siyali nasubiise ohumuberesa. Yibbulaimu yaleha esyaalo syae syeene natamanyireho yi yali naacha. 9Efukiirira yae niyo eyakera yaamenya koti omuteende mu syaalo si Nasae yali yamusuubisa. Yamenyanga mu yeema koti Yisaka nende Yakobbo baholaanga, bosi abanyoola esisuubise nasilala ohutula eyiri Nasae. 10Olwohuba Yibbulaimu yali naliindiriire esiko si Nasae yatekeha, handi yoombaha; esiko syoombahwa hu misiingi chiyiindira. 11Efukiirira niyo eyakera Yibbulaimu yehola laatang'ene bandu kata nende niyali nabitiriire mu myaka, handi Saara yesi yali nabitire emyaaka ch'ohwibula. 12Kata nende Yibbulaimu yali naali koti omuundu wamala ohufwa, nae ohutula mu muundu mulala wuno, abaana abangi beebulwa abali koti ening'ining'i cho muukulu, oba koti omusenye kwo hu nyaanja. 13Abandu bano boosi bafwiira mu fukiirira. Haba sibanyoola ebiindu bi Nasae yali yasuubisa, nae bali nibabibonera eyale muno mani babyakaanira, mani bomiisira elalira bati, bali Abateende busa handi abeyikami busa hu syaalo. 14Abandu balomaloma ebiindu bino, beekesera elalira koti abali ohukoonya esyaalo syeene. 15Haba sibabasaanga hu syaalo sibali nibaleha; baba nibahola batyo, bahanyoolere obweyaango bw'ohukobolayo. 16Ohutusaho, bali nibekoomba esyaalo silai sihirao; esyo nisyo esyaalo syo Mukulu. 17Efukiirira niyo eyakera Yibbulaimu, Nasae niyali naamuhema, yawaayo Yisaka omwaana wae, koti esiyaanwa. Yibbulaimu niye yi Nasae yahola nae esisuubise, nae yafukiirira kata ohuwaayo omwaana wae koti esiyaanwa. 18Nasae yali kata namuboolere ati, “Ochia ohunyoola abeechuhulu ba ndahulaka ohubitira mu Yisaka.” 19Yibbulaimu yamanya ati, Nasae anyala ohusyuuhisa abandu ohutula mu hufwa, sakira ohulomaloma hw'engeri yino huli koti, Yibbulaimu yakaanira Yisaka ohutula mu bafu. 20Efukiirira niyo eyakera Yisaka yasuubisa Yakobbo nende Esau emikisa mu bulamu bwaabwe bw'omuumoni. 21Efukiirira niyo eyakera Yakobbo yaaberesa abaana ba Yosefu emikisa nasisiiri ohufwa. Yaguunama hu mudiiro kwae mani yenamira Nasae. 22Efukiirira niyo eyakera Yosefu naali aambi ohufwa yaalomaloma hu hutula hw'Abayisirayiri mu syaalo sy'Emisiri, mani yaaleha amakerako kadiira hu biindu bibahoyeere ohuhola hu mubiri kwae nafwiire. 23Efukiirira niyo eyakera abebusi ba Musa, baamukisa embaka y'emyoosi chidatu naamalire ohwibulwa, olwohuba abeebusi bae bali babweene bati omwaana wuno yali aboneha bulai, mani haba sibatya ohuhaya ohuwulira amalako k'omutuki. 24Efukiirira niyo eyakera Musa niyali naahulire, yakaana ohulaangibwa omwaana w'omuhaana wa Faraao. 25Musa yasiima ohusaandira alala nende abandu ba Nasae, ohuhira ohwesangaasira mu sibi hulw'embaka ndiidi. 26Musa yamanya ati, ohusaanda naanyekwa hulwa Masiiya hwali huhirira elalira eyale obuyiinda bw'Emisiri, olwohuba yali namanyire omuheemba kwaacha ohunyoola mu moni. 27Efukiirira niyo eyakera yaatula mu Misiri, natatiireho etima lya Faraao. Yesimiirisa koti oli ohubona Nasae otabonehana, mani yaahaya ohukobola enyuma. 28Efukiirira niyo eyakera Musa yataawo esidyaalo sya Paasaka, handi yaalagira ati, amabaanga kabahibwe hu njiki, hu malaika w'ohufwa ahaye ohwiita abaana b'Abayisirayiri baamberi. 29Efukiirira niyo eyakera Abayisirayiri baambuha Enyaanja Njahanyu koti abali ohukeenda hu loba lyomu. Nae Abamiisiri nibateemaho ohuhola batyo, basihama baafwa. 30Efukiirira niyo eyakera ebida bya Yeriko byaakwa aasi Abayisirayiri nibamala ohukeenda nibabyebodoohania ohumala endaalo chitaanu-na-chibiri. 31Efukiirira niyo eyakera Rahabbu omucheke wekusa omweene, yaahaya ohwiitibwa nende abo abali nibahaya ohuwulira Nasae, olwohuba yakaanira bulai Abayisirayiri bahemeresi. 32Bulaanu ndemeede handi ohuboola siina? Obweyaango haba sibuunganya ohulomaloma hu Gidioni, Bbaraki, Samusooni, Yefuta, Daudi, Samueli nende hu banabbi. 33Olwo hufukiirira bano balwaana baayingira obutuki butaali nasilala. Bahola esiindu sihoyera mani banyoola si Nasae yabasuubisa. Kata beekala eminwa ch'edalang'i. 34Basimya omuliro kwaaduha nende amaani, baona ohwiitibwa nende engaanga. Bali abikata, nae beehola ab'amaani. Beehola ab'amaani mu biita mani baayingira amaye k'Abateende. 35Efukiirira niyo eyakera abahasi baabeereswa abeeho baabwe nibasyuuhire ohutula mu hufwa. Abandu bandi basaandisibwa nae baahaya kata ohutula mu mireembe, nae baafwa obuchuuni, hu banyala ohusyuuhira mu bulamu bulai buhirao. 36Abandi bandi banyekwa, baahuyibwa, handi abandi baaboyebwa nende eminyororo baasukunibwa mu mboye. 37Bahubbwa nende amakina, baatibwamo akati-kaati ebituundu bibiri nende emisumeeno, beetwa nende engaanga. Bakeendaanga nibefwaalire amaseero k'amakoondi nende embusi, nibataaliho nende esiindu syoosi, nibasandisibwa, nibayirwa bubi. 38Esyaalo haba sisyali nisibahoyera elalira! Bayikanaanga mu siparara nende mu ngulu, bamenyaanga mu ng'ungu nende mu meena kali mu loba. 39Bano boosi Nasae yabasiima hulw'efukiirira yaabwe! Kata boosi bahaba nibatanyoola esiindu si Nasae basuubisa, 40olwohuba Nasae yali niyatutekehera esiindu silayi esihirao. Esichiiririrwa syae syali abo bosi beeholere aboolerefu elalira alala naafwe.

will be added

X\