EBBARWA Y'ABAYIBBURANIYA 10

1Amalako k'Esiyudaaya kali busa koti esiiniha sy'efwaanani sy'ebiindu bilai bicha ohwiicha, nae haba sikali efwaani yadyeeri yeene y'ebiindu by'elalira bino. Sakira ebiyaanwa bibeeresebwa buli siha, haba sibinyala ohulabisira elalira abandu basuda eyiri Nasae. 2Ebiyaanwa ebyo biba nibinyala ohulabisira elalira abandu beenamira Nasae, ebiyaanwa ebyo haba sibyahayaanirweyo buli siha, olwohuba ababiyaanayo bahabeere nibalabiswa elalira ehabi lala nibataaliho nende esibi mu myooyo chaabwe. 3Nae koti lu siri, ebiyaanwa ebyo bibeechulisa busa ebibi byaabwe buli mwaaka. 4Olwohuba amabaanga k'elaawu nende amabaanga k'embusi haba sikanyala ohumalao ebibi. 5Mani ohweema hu sifune esyo, Kristo niyali aambi ohwiicha mu syaalo, yaboolera Nasae ati, “Ewe haba siweenya ebiyaanwa nende ebiindu bituswa, naye watekehera omubiri. 6Ebiyaanwa by'esolo chisaambwa hu alutaari, oba ebiyaanwa bimalao ebibi haba siwabisangaalira. 7Sakira ndaboola endi, 'Nasae, mbano ndi ano, ohuhola sy'odaha, koti busa lu syanyandiikwaho mu sitabo sy'Amalako.'” 8Yatangira ohuboola ati, “Haba siwadaha handi haba siwasangaalira ebiyaanwa nende ebiindu bituswa, oba nende ebisolo bisaambwa hu alutaari, nende ebiyaanwa bimalao ebibi.” Yaboola sino kata nende syahaba siti ebiyaanwa bino byatuswa ohulondakana nende bi malako ka Musa kadaha. 9Mani yeecha yaboola ati, “Nasae, mbano ndi ano ohuhola syodaha.” Sakira Nasae yamalawo ebiyaanwa bihale byoosi, mani yataawo esiyaanwa sya Kristo mu sifwo syaabyo. 10Olwohuba Yesu Kristo yamala ohuhola esiindu si Nasae yadaha ahole, sakira efwe fweesi bulaanu hwamala ohulabiswa ohutula mu bibi, hulw'esiyaanwa siyawaayo esy'omubiri kwae syeene, ehabi lala lyong'ene. 11Buli mulaamisi w'Esiyudaaya yeesi, buli ludaalo yeema nawaayo ebiyaanwa nasilala amahabi amaangi; nae ebiyaanwa bino haba sibinyala ohumalao ebibi daawe. 12Nae Kristo yawaayo esiyaanwa silala sy'ong'ene, hulw'ebibi ehabi lala lyong'ene, mani yeehala hu muhono muluungi kwa Nasae. 13Ohutula olwo, bulaanu yalindirira ohwoola lu Nasae yahahole abasuku bae ohuba koti esiteeni syawuluusiraho amakulu kae. 14Olwohuwaayo esiyaanwa sia alala esyo, yamala ohulabisira elalira abo bayoosaho ebibi. 15Handi Mwooyo Mwolerefu yesi atubeeresa obujulisi bwae. Ohutangira aboola ati, 16“Lino nilyo elakano linja ohuhola nabo Omwaami aboola: mu ndaalo chiichayo, njia ohuta amalako kange mu myooyo chaabwe mani kandiike mu bibaaso byaabwe.” 17Handi ameeda naboola ati, “Haba siinjia hwichulisira elalira ebibi byaabwe, nende ebiholwa byaabwe bibi.” 18Mani ebibi bino nibimalire ohuleherwamo, esiyaanwa sy'ohumalao ebibi haba sisiba nisidahibwa. 19Sakira basyaange, ohubitira mu hufwa hwa Yesu, bulaanu hunyala ohwingira mu Sifwo Sihiramo Obwolerefu ataali ohutya. 20Yatwikulirawo engira njiaha, engira enamu, eyibita mu lubugo esyeekesa siti, ohubitira mu mubiri kwae kweene. 21Bulaanu huli nende Omulaamisi Muhuluundu oliinda enyumba ya Nasae. 22Mani lehe husude aambi nende Nasae nende omyoyo kutaalimo esibi, okwichuule efukiirira, nihuli nende emyooyo chilabiiswe ohutulamo ebibaaso bibi, nende emibiri chooseebwe nende amaachi malafu. 23Lehe hwomiirire hu suubi lihuli nalyo, olwohuba Nasae otusuubisa mwesikwa niye. 24handi lehe hubaaseho hu basyeefwe, huhoonyane abeene-na-beene nihweekesa ohudahana handi nihuhola ebiindu bilai. 25Hutaleha esaambo y'ohwebuusa alala, koti lu bandu bandi bahola. Ohutusaho, lehe hwemeede ohugumisania emyooyo, koti lu hubona huti, Oludaalo lw'Omwaami lusudire aambi. 26Nihumalire ohumanya obwadyeeri, nae abeene hwaheengao ohwemeeda ohuhola ebibi, mani humanye huti, abulao esiyaanwa siindi esicha ohumalao ebibi. 27Ohutusaho esidong'ere nihwo ohuliindirira nihutiire ohuheengerwa omusango handi nihutiire omuliro mwaalaba kucha ohusihirisa abo abayingania Nasae. 28Olwohuba buli muundu otawulira amalako ka Musa yeetwa ataali ohusaasirwa naamalire ohuheengerwa omusango ohumuhira ohweema hu bujulisi bw'abandu babiri oba obw'abandu bahira babiri, abomiisa bati yahola esibi. 29Bulaanu mubaasa muti omuundu olekeresa Omwaana wa Nasae, mani yaayira amabaanga k'embuliirisania lya Nasae akamwoosaho esibi koti esiindu sibulamo obuhoonyi, handi onyoolesa Mwooyo w'esisa, haba saacha hunyoola husaandisibwa hungi muno hwahoyerwa? 30Olwohuba humanyire omuundu waboola ati, “Ohwetuunga hwange nihwo, mani njia ohwetuunga”; handi owaboola ati, “Omwaami achia ohuheengera omusango abandu bae.” 31Siindu syohutya muno omuundu ohudiisibwa mu maani ka Nasae mulamu. 32Mwichulise koti lu byali mu ndaalo chabita. Mu ndaalo echo, obulafu bwa Nasae nibumalire ohubahosaho, mwasaanda ebiindu biingi muno, nae haba simwayingirwa mu hulwaana hweeng'we. 33Endaalo chiindi mwanyekwaanga mu moni w'abandu, handi baabasaandya. Handi endaalo chiindi mwali abetekefu ohweyambaania hu bandu basaandisibwa batyo. 34Mwakwiira abandu bali mu mboye esisa, handi nibabang'uula ebiindu byeeng'we mwesimiirisira ebidinyu ebyo nende esangaalo, olwohuba mwali mwamanya muti, mwali nimusisiiri nende esiindu silayi sihirao, esiyindira emyaaka choosi. 35Sakira mutalehana nende obugumu bweeng'we, olwohuba bucha ohubaleetera omuheemba muhoongo muno. 36Muhoyeere ohwesimiirisira ebidinyu, hu munyale ohuhola si Nasae adaha, mani munyoole si Nasae yasuubisa. 37Olwohuba koti lu byandiiko byolerefu biboola biti, “Hulw'esiha sidiidi muno, mani oyo oli ohwiicha achia ohwiicha, haba saacha huhiinda daawe; 38nae omulungifu wange niye ochia ohubaao omulamu hulw'efukiirira, nae naatya mani yakobola enyuma, omwooyo kwaange haba sikuba kuchia ohumusangaalira daawe.” 39Nae efwe haba sihuli abandu batya mani hwakobola enyuma mani husihirisibwe daawe, nae huli hw'abo abali nende efukiirira handi abaliinda bulai obulamu bwaabwe.

will be added

X\