EBBARWA Y'ABAYIBBURANIYA 1

1Hale, Nasae yalomalomanga nende ba kuuka yeefwe amahabi maangi handi mu ngeri chikabuhaane nabitira mu banabbi. 2Nae mu ndaalo chimaliirihayo chino, Nasae alomaloome naafwe nabitira mu Mwaana wae. Omwaana wae oyo niye yi Nasae yadoola ohuba omusiha w'ebiindu byoosi, handi Nasae yabitira mu Mwaana wae oyo ohuloonga ebiindu byoosi. 3Omwaana oyo, niye obulafu bweekesa oluyaali lwa Nasae, handi niye efwaani ya Nasae yeene, handi niye oliinda ebiloonge byoosi nende emboosi yae y'amaani. Naamalire ohunyalira ebibi by'abandu boosi ohuleherwamo, yeehala Mukulu hu muhono muluungi kwa Nasae, Omweene bunyala bwoosi. 4Omwaana wa Nasae yabeereswa oluyaali luhira olwa bamalaika, koti busa eliita li Nasae yamubeeresa lihira akaabwe oluyaali. 5Olwohuba, abulao malaika yeesi yi Nasae yabooleraho ati, “Niiwe Omwaana wange, olwaleero hwibuule” Oba handi ati, “Njia ohuba Laatang'ene, handi yesi abe Omwaana wange” 6Nae ohumeeda hw'ebyo, Nasae niyali aambi ohutuma Omwaana wae mwikulaanda mu syaalo, yaboola ati, “Lehe bamalaika ba Nasae boosi bamwiinamire.” 7Nae bino nibyo bi Nasae yaboola ebidiira hu bamalaika ati, “Nasae yahola bamalaika bae baaba emboo, handi yaahola abahalaabani bae enjeserye ch'omuliro.” 8Nae ebidiira hu Mwaana, Nasae yaboola ati, “Obwaami bwao, Ewe Nasae, bw'endaalo choosi, otuka abandu nende obwadyeeri. 9Waheera obuluungifu nae wasyuula obuhyamu. Mani sakira Nasae, Nasae wao ahwawulewo handi ahubeere esangaalo ly'oluyaali lungi muno ohuhira luyabeeresa abaasyo.” 10Nasae handi yaboola ati, “Ewe, Omwaami, mu huchaaka niiwe owaloonga esyaalo, handi wahola ekulu nende amahono kao keene. 11Ebiindu ebyo byoosi bicha ohusihirira, nae ewe ochia ohudoong'ao; byoosi bicha ohukofula koti engubo. 12ochia ohubifuumba koti omukeeka, handi bichuuhe koti engubo. Nae ewe ochia ohudoong'a busa koti lwooli, handi emyaaka chao haba sichicha hwaakama.” 13Nae malaika siina yi Nasae yabooleraho ati, “Yihala hu muhono kwaange muluungi ohwoola lundihola abasuku bao babe esiteeni sy'ohutaaho amakulu kao.” 14Bamalaika abo, haba sinibo emyooyo chihalaabanira Nasae, chi Nasae yatuma ohuhoonya abo abacha ohunyoola obuwonia?

will be added

X\