ABAGALATIA 5

1Obuboolole nabwo, Kristo yatuboolola; mani mumenye nimuli abalehuule, handi mutoola ohweyingisa ehabi liindi mu bulamu bw'obuwaambe. 2Bulaanu ese Paulo, ndi ohubaboolera endi, nimuchia mwaahebwa, Kristo aaba achia ohuba otaali nende obuhoonyi bwoosi yimuli. 3Ndi ohuboolera buli muundu yeesi ochia yaahebwa endi, mani ahoyeere ohwoseresa bi malako ka Musa kadaha byoosi. 4Muba mumalire ohwehalaka hu Kristo, eng'we ababa bacha ohuholebwa abahoyera nende amalako ka Musa; muba mumalire ohwekabulira elalira ohutula hu sisa sya Nasae. 5Nae efwe, esuubi lyeefwe liri liti Nasae achia ohutuhola abalungifu ohubitira mu Mwooyo wae handi ohweema hu fukiirira yeefwe. 6Olwohuba mu Kristo Yesu, oba ohuhebwa oba obutahebwa, haba sisiri nende obuhoonyi bwoosi, nae efukiirira niyo eyihola niyibitira mu hudaha. 7Mwali nimuli ohukeenda bulai muno; nae ni wiina mweene owabakayira ohufukiirira obwadyeeri? 8Ohuserera huno haba sihutula eyiri oyo obalangaanga. 9Amamera madiidi muno kanyala ohubbaaha esiniho siingi syoosi. 10Ndi nende obwesike mu Mwaami endi eng'we haba simuchia hubukula embaasa yindi ohutusaho eyaange yino; nae oyo oli ohubanyasaanga achia ohukinga omusango kwae omweene, kata nende naaba naali naanu mweene. 11Nae basyaange, nikali mbwe ese mweene siyalaanga busa ohuhebwa, ni lwasiina mba nisiboneresebwaanga? Syekesa mbwe mu mboosi eyo, esichihi sino esyegumusa omusalabba syamala ohutusibwayo. 12Ndi ohusaba endi abandu bali ohubadengaanianga abo bahoya baacha belada abeene mani! 13Olwohuba eng'we basyaange, mwalangirwa obulehuule; ohutusaho mbwe mutacha handi mwachaaka ohwehoonyera obulehuule obwo koti ehabi y'ohunyala ohuhola bi obwekoombi bw'omubiri bubayika muhole, nae ohubitira mu hudaha, muhoyeere mwehole abahalaabani babaasyeng'we. 14Olwohuba amalako ka Musa koosi kabuusibwa kosereswa mu mboosi ndala mbwe, “Dahaanga owaasyo, koti wedaha.” 15Nae nikali mbwe mulumana handi nimuliichana abeene-na-beene, mweliinde mani mutoola ohumalanao abeene-na-beene. 16Nae ndi ohuboola endi, kendereenge mu Mwooyo, nae mutoseresaanga obwekoombi bw'omubiri. 17Olwohuba obwekoombi bw'omubiri, buyinganianga Mwooyo, nae ebidahibwa by'Omwooyo, byosi biyinganianga eby'omubiri; olwohuba ebiindu bino byoosi, haba sibinyala ohuchiana, hubihukayire ohuholaanga byooba niwahadahireenge ohuhola. 18Nae nooba niwimiriirwe nende Mwooyo, haba sooba nonyala ohufukibwa nende amalako ka Musa. 19Bulaanu, ebiholwa by'omubiri biri alafu biti: obucheke, esifwaabi, obwekoombi, 20ohwiinamira emisaambwa, obulakusi, obusuku, ohuyiriimbana, ehali-hali, etima, obwimani, ohwekabulanamo, ohweholamo emikaanda, 21ehiinda, obutemo, obumeesi, ebiyumo nende ebiindi ebifwaana bityo. Mbalabula, koti lundabalabulaho hale endi, abo abahola ebiindu bifwaana bityo, haba sibachia husihira Obwaami bwa Nasae. 22Nae ebiholwa bya Mwooyo, nae ateeta ebiindu nga, ohudaha, esangaalo, omuleembe, ohwesimiirisa, esasaakisi, obulayi, obwesikwa, 23obuwulisi, alala nende ohweliinda omweene. Abulao amalako koosi akachooma ebiholwa bino byoosi. 24Abaandu ba Kristo Yesu baba ohuba nibamala ohwiitira elalira obuundu obwa abandu obwaabwe alala nende ebyo byoosi bibunyala ohudaha kata busa nende ohuchuuba. 25Mwooyo yamala ohutukabula omukabo okwa obulamu; mani sakira niye ooba naahoyeere ohuba nalio ofuka obulamu obweefwe. 26Habula haba sihuhoyeere haba daawe, ohuba aba ohwebona kata busa ohuteemaangaho ohusinyisa abaasyeefwe, kata busa ohudiiriraanga abaasyeefwe ehali-hali.

will be added

X\