ABAGALATIA 4

1Ndi ohweekesa endi, omwaana oyo naaba nasisiiri omuyere, haba saaba naahira omuwaambe, kata nende naaba naali niye omweene busiha; 2nae aba nasisiiri aasi w'abaliindi nende abahoonyi ohwoola hu ludaalo luba nilwateebwao nende simwaana. 3Nilwo lusiri nende efwe fwesi; nihwali nihusisiiri abayere, hwali nihuli abaambwa nende emyooyo ch'omusyaalo muno. 4Nae esiha nisyali nisimalire ohwoola, Nasae yatuma Omwaana wae, owebulwa nende omuhasi, owebulwa naali aasi w'amalako ka Musa, 5ohununula abo abali aasi w'amalako ka Musa, huhunyale ohunyoola ohudoolwa hube koti abana ba Nasae. 6Mani olwohuba muli abaana bae, Nasae yatuma Mwooyo w'Omwaana wae yengire mu myooyo cheefwe olira ati “Bbaabba! Laata!” 7Mani ohubitira mu Nasae, eng'we haba simusisiiri abaambe, nae muli abaana, mani nimuba nimuli abaana, mani muli abasiha. 8Hale nimwali nimutaamanya Nasae, mwali nimuli mubuwaambe bw'ebiindu bitaali nasaye daawe; 9nae bulaanu koti lumunyalire ohumanya Nasae, oba awundi Nasae ohubamanya, munyala mutye handi ohukobola enyuma handi eyiri emyooyo mikata, misabirisi ech'omusyaalo muno, nimudaha ohuba abaambe baacho ehabi liindi? 10Muhusaanga endaalo chiindi, nende emyoosi chiindi, nende ebiha biindi, nende emyaaka chiindi! 11Ese Tiro olwohuba ndi koti owabanyahaniraho endyo olwebihaya. 12Basyaange, mbekweda mube koti lundi, olwohuba ese syesi ndamala ohwehola ohuba koti lumuli. Simwaholaho esibi syoosi daawe; 13mumanyire ebilai byeene muti ohulwaala hw'omubiri kwaange nihwo ohwakera ndaanyala ohubayaalira Emboosi Ndai olwataangira; 14nae handi kata nende obulamu bwaange bweecha bwaaba koti esihemo yimuli, haba simwandechusuula kata ohundekeresa daawe, nae mwanjakaanira busa koti abakaanira malaika wa Nasae, handi koti lumubukaanira Kristo Yesu. 15Siina syeene handi esyeecha syatula mubwikufu bumwali nabwo obwo? Olwohuba ese nyala ohubajulira endi, siba nisyali nisinyaliha, mwahanyalire kata ohweyiyamo emoni cheeng'we mwachimbeeresa. 16Handi hane ndeholere ohuba omusuku weeng'we hulwohubaboolera obwadyeeri? 17Abandu bandi abo bali busa ohubeniinisiryaho hulwebihaya byeene; bali busa ohudaha babekalire erwaanyi, hu munyale ohubekoomba muno. 18Olwohuba siba esichiiririrwa silayi nikali mbwe onyala wekombebwa muno, nae haba sikali mbwe nimba niindi alala nang'we lwong'ene. 19Eng'we baana bange basisiiri abayere, mbachuunirwa koti omuhasi olumwa lwachunisibwa ohwoola lumwahehole koti lu Kristo mweene lwali. 20Ndahekombere muno ohunyala ohuba aambi naang'we, mani ndaanyala ohuchuusaho enomanoma yange olwohuba mbelalihiire muno. 21Eng'we abali ohudaha ohuba aasi w'amalako ka Musa mumboolereho, haba simuli huwuliraanga bulai amalako bikadaha? 22Olwohuba syandiikwa siti, Yibbulaimu yali nende abaana basyani babiri, mulala yiyebula nende omuhasi muwaambe, nende owundi yiyebula nende omuhasi mulehuule. 23Nae kali mbwe omusyaani w'omuhasi muwaambe yebulwa ohweema hubwekoombi bw'omubiri, nae omusyaani w'omuhasi mulehuule yebulwa ohweema hu sisuubise. 24Bulaanu huno nohukeraania busa mbwe: abahasi bano bali koti Embuliirisania chibiri. Ndala y'ohulugulu lwa Sinai, niyibulira abaana obuwaambe; niye Hagari. 25Bulaanu, Hagari ali Olugulu lwa Sinai mu Buwaraabbu; mani akeranisibwa nende Yerusaalemu syaleero, olwohuba ali mu buwaambe alala nende abaana bae. 26Nae Yerusaalemu siri Mukulu silehuule, handi niye oli ng'ineefwe. 27Olwohuba syandiikwa siti, “Weehoye, Aaa, ewe omuhasi mukuumba; Tuunduhe mani mwehuume, eng'we abatalumwangaho ohwiibula; olwohuba abaana b'omuhasi walobwa bacha ohuba abaangi muno ohuhira abaana b'omuhasi oli nende omusaacha.” 28Nae efwe, basyaange, koti busa Yisaka, huli abaana b'esisuubise. 29Nae koti busa lu siha syeene sira, koti omusyaani webulwa ohweema hubwekoombi bw'omubiri yaboneresaanga omusyaani wali niyeebulwa ohweema hu Mwooyo wa Nasae, mani nilwo lusiri kata neende bulaanu buti. 30Nae ebyandiiko byolerefu biboola bitye? Biboola biti, “Yirusa omuhasi muwaambe oyo nende omusyaani wae mweene; olwohuba omusyaani w'omuhasi muwaambe oyo, haba saacha husihira alala nende omusyaani w'omuhasi mulehuule.” 31Mani sakira basyaange, efwe haba sihuli abaana b'omuhasi muwaambe, nae huli abaana b'omuhasi mulehuule.

will be added

X\