ABAGALATIA 3

1Eng'we Abagalatiya basiru! Wiina mweene owabaloka? Mwanyonyolwa bulai bweene mani mwabona koti Yesu Kristo yafwiira hu musalabba. 2Ndaha mumboolereho sino syong'ene: Mwanyoola Mwooyo wa Nasae olwohwoseresa bi Malako ka Musa bikadaha, oba olwohuwulira Emboosi Ndai mani mwayifukiirira? 3Munyala mutye ohusiruwala mutyo? Eng'we abachakira mu maani ka Mwooyo Mwolerefu, munyala mutye ohumaliirisira mu maani k'eng'we beene? 4Ebidinyu bi mwabitamo ebyo byoosi byabuhaya? Mu bwadyeeri bweene sibyabuhaya! 5Nasae obakaba Mwooyo wae, handi ohola ebyaamayia mw'eng'we ahola ebyo olwohuba mwoseresa ebyo bi Malako ka Musa bikadaha, oba olwohuba mwawulira mani mwafukiirira Emboosi Ndai? 6Baaseho ebyakwa hu Yibbulaimu kuuka yeefwe; koti ebyandiiko byolerefu biboola biti, “Yibbulaimu yafukiirira mu Nasae, mani ohweema hu fukiirira yae Nasae yamufukiirira koti omulungifu mu moni wae.” 7Mani mubone muti abo abali nende efukiirira nibo abechuhulu ba Yibbulaimu. 8Mani ebyandiiko byolerefu, byaabona mu moni biti Nasae achia ohuhola Abateende babe abalungifu mu moni wae ohubitira mu fukiirira. Mani sakira ebyandiiko byolerefu byeekesa Yibbulaimu hale Emboosi Ndai yiboola yiti, “Ohubitira mwewe, Nasae achia ohuberesa ehabi abandu boosi.” 9Mani sakira, abo boosi abali nende efukiirira baabeereswa ehabi koti lu Yibbulaimu owali nende efukiirira lu yabeereswa ehabi. 10Abo abesika ohwoseresa bi malako ka Musa kadaha, baholimirwe. Olwohuba ebyandiiko byolerefu biboola biti, “Oyo yeesi otoseresaanga buli siindu syandiikibwa mu sitabo sy'Amalako ka Musa, Nasae yamuholimira!” 11Bulaanu simanyihaane siti, abulao omuundu yeesi onyala ohuba omuluungifu mu moni wa Nasae olwohwoseresa ebyo bi Malako ka Musa kadaha; olwohuba ebyandiiko byolerefu biboola biti, “Omuundu wahaone niye oyo yeng'ene ochia ohuba omulungifu mu moni wa Nasae ohweema hu fukiirira.” 12Nae Amalako ka Musa haba sikeemehebwa hu fukiirira. Ohutusaho koti lu byandiiko byolerefu biboola biti, “Oyo yeesi bi Malako ka Musa kadaha niye ochia ohuwona ohweema hu malako keene ako.” 13Nae Kristo ohwehola esiholimo hu lw'efwe, yatununula ohututusa mu siholimo si Malako ka Musa kaleeta. Olwohuba ebyandiiko byolerefu biboola biti, “Oyo yeesi owaanihibwa mu saala Nasae aba yamuholimira.” 14Kristo yetaaho esiholimo esyo hu mukisa ku Nasae yalaka Yibbulaimu kunyale ohubeereswa Abateende hulwa Kristo Yesu, handi hulw'ohufukiirira hu nyale ohunyoola Mwooyo Mwolerefu yi Nasae yasuubisa. 15Basyaange, njia ohwehoonyera esy'ohuboneraho sya buli ludaalo: abandu babiri nibahola elakano, mani bandiika Embuliirisania, awumao omuundu onyala ohuyihalaka oba yayimeedaho esiindu syoosi. 16Bulaanu, Nasae yahola ebisuubise byae eyiri Yibbulaimu nende omwichuhulu wae. Ebyandiiko byolerefu haba sibiboola biti “Abechuhulu bae” nibyeekesa abandu bandi, nae biboola biti “Omwichuhulu wae” nibyeekesa omuundu mulala yeeng'ene, oyo niye Kristo. 17Simboola nisyo sino endi, Nasae yahola elakano nende Yibbulaimu mani yasuubisa ohulyoseresa. Amalako ka Musa, akecha emyaaka emia chine nende amahumi kadatu nikibitireo, haba sikanyala humalao elakano lyomiisibwa nende Nasae koti esisuubise eyiri Yibbulaimu. 18Olwohuba nikali mbwe esiyaanwa syeema hu Malako ka Musa, mani sisiba nisisyeema hu sisuubise syae. Nae Nasae yasiba Yibbulaimu ohweema hu sisuubise syae. 19Nae esichiiririrwa sy'Amalako ka Musa syali siina? Amalako kemeedaho hu huhola ebibi hunyale ohumanyihana, handi kali ak'ohubao ohwoola hu hwiicha hw'omwichuhulu wa Yibbulaimu owasuubisibwa. Amalako ka Musa kaleetebwa nende ba malaika, omuundu naahola koti wamwaanda. 20Nae wamwaanda saadahibwa nisidiira hu muundu mulala yeng'ene; handi Nasae ali mulala yeng'ene. 21Nae sino syekesa siti Amalako ka Musa kayingania ebisuubise bya Nasae? Haba sisinyalihana daawe! Nae mani Amalako ka Musa kaba niko akaleetera abandu obulamu, awo buli muundu yahabeere omulungifu mu moni wa Nasae olwohukooseresa. 22Nae ebyandiiko byolerefu biboola biti, Esyaalo syoosi siri mu maani k'Esibi, mani sakira esiyaanwa esyasuubiswa, syeema hu fukiirira mu Yesu Kristo mani sibeereswa abo abafukiirira. 23Nae endaalo ch'efukiirira nichali nichitoola, Amalako ka Musa katulindaanga nihuli koti ababoye, ohwoola lu fukiirira yahamanyihane. 24Mani sakira Amalako ka Musa katuliinda ohwoola lu Kristo yechera, hu hunyale ohuba abalungifu mu moni wa Nasae ohubitira mu fukiirira. 25Nae bulaanu, ohufukiirira koti lu hwamala ohwiicha, haba sihusisiiri mu butuki bw'Amalako ka Musa. 26Olwohuba ohubitira mu fukiirira, eng'we mweesi muli abana ba Nasae mu Yesu Kristo. 27Olwohuba eng'we mweesi mwabatiisibwa mu Kristo, mani bulaanu mwefwaala Kristo. 28Abulao engabuhana akati-kaati w'Abayudaaya neende Abateende, akati-kaati w'ababoye nende abalehuule, akati-kaati w'abasaacha nende abahasi; mweesi muli mulala mu Kristo Yesu. 29Koti lu muli abandu ba Kristo, muli abechuhulu ba Yibbulaimu, mani mucha ohunyoola si yasuubisa.

will be added

X\