ABAGALATIA 2

1Mani emyaaka ehumi nende kine nichabitao, ndeecha ndakobola e Yerusaalemu nende Bbarunabba, awo nganjiire nende Tiito. 2Ndacha olwohuba ndabwiihulirwa nende Nasae endi hoyeerwe ohuchia. Mani nindali ninjihaale nende abemeresi nihuli fweeng'ene, ndeecha ndaabekesa Emboosi Ndai yindayaalira Abateende. Sindadaha omulimo kwaange kwa hale oba okwa bulaanu kube okwabwereere. 3Tiito yindali nae, ayahaba niyali Omuyonaani, haba siyayiikwa ohuhebebwa. 4Kata katyo, abandu bandi bali nibadaha ahebwe. Abandu bano bebachirisa baaba koti abafukiiriri basyeefwe, mani beyingisa mu mukaanda kweefwe nihutaamanyire ohutuhema bamanye ebidiira hu deembe lihuli nalyo mu Kristo Yesu nibadaha ohukobosa mu buboe. 5nae haba sihwafukiiriraho echaabwe kata nabudiidi hwadaha ohubaliindira obwadyeeri bw'Emboosi Ndai. 6Nae abo abali koti abemeresi, ese esyo haba sisindiiraho olwohuba Nasae abulao abandu b'akwiira. Abemeresi abo sibulao esiindu siyaaha sibameedaho. 7Nae beecha baabona bati Nasae yandiisa omulimo kw'ohuyaalira Abateende Emboosi Ndai, koti Peetero yadiisibwa omulimo kw'ohuyaalira Emboosi Ndai eyiri Abayudaaya. 8Hulw'obunyala bwa Nasae, ndeehola Omutume w'Abateende, koti busa lu Peetero yehola Omutume w'Abayudaaya. 9Nae Yakobbo, Peetero nende Yowaana, abali koti abemeresi beecha baamanya omulimo kw'enjawulo ku Nasae yali yambereese, mani beecha batuheesa mu mahono, ese alala nende Bbarunabba, ohweekesa bati huli esiindu silala nabo, abo abahalaabana mu Bayudaaya nende efwe abahalaabana mu Abateende. 10ohutusaho batusaba ohwichulisaanga abandu baabwe bamanani, esiindi sindali nindekoomba ohuhola muno nende omwooyo mulala. 11Peetero niyeecha mu Atyoko, ndamwolobya mu lwichuule, olwohuba yali omuhyamu mweene. 12Abandu bandi abatula eyiri Yakobbo nibali nibasisiiri ohwiicha, Peetero yaba naaliraanga alala nende Abateende. Nae abandu bano niboola busa bati, Peetero niyekabula ahaya ohulya nende Abateende, olwohuba yali atya abo abali nibasiira ohuhebebwa. 13Mani Abayudaaya bayali nabo bamweyambaaniaho, bebachirisa koti abati, koti lu Peetero yahola. 14Mani nindeecha ndaabona endi mu bwadyeeri bweene haba sibali nibalondakana nende Emboosi Ndai, ndeecha ndaboolera Peetero mu lwichuule endi, “Ewe oli Omuyudaaya, nae obeere niweyira mu saambo ch'Abateende echitaali ech'Abayudaaya. Mani onyala otye ohuyiika Abateende ohweyira koti Abayudaaya?” 15Efwe huli Abayudaaya beene mu hwibulwa, sihuli Abateende baholi b'ebibi, koti lu balaangwa. 16Nae humanyire huti omuundu aba omulungifu mu moni wa Nasae ohweema hu fukiirira mu Yesu Kristo, ataali ohwoseresa bi Malako ka Musa bi kadaha. Fwesi hwafukiirira mu Kristo Yesu, hu hweemeo hube abalungifu mu moni wa Nasae ohubitira mu hufukiirira hw'efwe mu Kristo, nae ataali ohwoseresa bi Malako ka Musa kadaha. Olwohuba abulao omuundu onyala ohuba omulungifu mu moni wa Nasae olwohwoseresa bi Malako ka Musa bikadaha. 17Nae bulaanu koti luhukesaho ohuba abalungifu mu moni wa Nasae ohweema hu bulala bw'efwe nende Kristo, mani hwenyoola huti fwesi huli busa abaholi b'ebibi koti Abateende lu bali, mani sino siba syekesa siti Kristo ahalabanira abaholi b'ebibi? Sisiri sityo kata nabudiidi! 18Mani nimba ninjaaka ohusiira ehola ya Malako ka Musa yindasakuula, awo mba ndeyekesa omweene koti omuundu muhalaki w'amalako. 19Nae ebidiirana nende amalako, ese ndafwandetibwa nende amalako keene, hu nyale ohumenya ohubao omulamu hu lwa Nasae. Ndahomererwa hu musalabba alala nende Kristo. 20Mani obulamu bundi nabwo, haba sibwaange-hu-bwaange, ohutusaho Kristo niye omulamu mw'ese. Mani obulamu bundi nabwo bulaanu, ndi nabwo hulw'ohufukiirira mu Mwaana wa Nasae, owandaha mani yawaayo obulamu bwae hulwaange. 21Siindi hwekaana esisa sya Nasae, nae abandu nibaba abalungifu mu moni wa Nasae olwohwoseresa ebyo bi Malako ka Musa bikadaha, esyo syekesa siti Kristo aba niyafwiira bihaya byeene busa.

will be added

X\