ABAGALATIA 1

1Ebbarwa yitula eyiri Omutume Paulo otalaangwa nende abandu, oba obunyala bw'abandu, nae owalaangwa nende Yesu Kristo mweene nende Nasae Seefwe, owamusyuuhisa ohutula mu bafu. 2Ese alala nende abasyaange boosi bandi nabo. Hwandiikira eng'we abafukiiriri ba Kristo abali mu Galatia: 3Nasae Seefwe, alala nende Omwaami weefwe Yesu Kristo babakwiire esisa, handi bababeerese emireembe. 4Kristo mweene yewaayo hulw'ebibi byeefwe, hwaanyale ohutununula mu muleembe mubi kuno koti lu Nasae weefwe handi Seefwe yadaha. 5Nasae oyo ohoyeerwe ohubeeresebwa oluyaali endaalo nende endaalo choosi. Amiina. 6Ese mbawuka muno! Mu biha bidiidi bino, mu malire ohutula hw'oyo owabalaanga hulw'esisa sya Kristo mani mwachaaka ohuwulira Emboosi Ndai yiindi. 7Mu bwadyeeri bweene abulao “Emboosi Ndai” yiindi, ohumalaho aliwo abandu bandi bali ohubanyaasa-nyaasa nibakesaho ohuhyaamya Emboosi Ndai ya Kristo. 8Kata nihuba nihuli efwe, oba malaika ohutula Mukulu, nabayaalira Emboosi Ndai eyikabuhaane nende eyo yihwabayaalira, lehe aholimirwe. 9Ndi ohuboola handi koti luhwaboola hale endi: Niwichuhira omuundu yeesi yabayaalira Emboosi Ndai yikabuhana nende eyo yimwafukiirira hale, ahoyeere ohusihiriswa. 10Mani bulaanu mubaasa muti ndi ohukesaho siimibwe nende abandu, kose Nasae? Haba daawe. Mubaasa muti ndi ohukesaho ohusangaasa abandu? Nimba nisichiiririra ohusangasaanga abandu busa, awo siimba niihoyera ohuba omuhalaabani wa Kristo. 11Basyaange, ndaha mu manye muti, Emboosi Ndai yi njaala haba si yitula hu muundu busa. 12Olwohuba haba sindayinyoola ohutula hu muundu yeesi, oba omuundu yayinjekesa bweekesa. Nae Yesu Kristo mweene niye owayimbwihulira. 13Mwawulira ebidiira hu bulamu bwaange koti lu ndali, linondakana nende ediini y'Esiyudaaya, handi mwawulira koti lundalwanianga muno ataali ohukwiira esisa emikaanda ch'abandu bafukiirira Nasae mu Kristo, ndakesaho koti lu nyala ohuchisihirisa. 14Ndali hirira elalira Abayudaaya basyaange bandahula nabo mu hudiira emiduunga ch'abakuuka yeefwe ech'ediini y'Esiyudaaya. 15Nae Nasae mu sisa syae yandoola ni sisiiri ohwiibulwa, mani yanaanga ohumuhalaabanira. 16Mani niyaheengao ohumbwihulirao mwaana wae hu nyale ohuyaala Emboosi Ndai yimudiiraho, eyiri Abateende, haba sindachia eyiri omuundu yeesi ohumweteebaho, 17oba haba sindachia e Yerusaalemu ohubona abo abandangirira ohuba Abatume. Nae ohutusaho ndachia bwaangu mu Buwaraabbu mani ndeecha ndakobola e Damasiko. 18Nae emyaaka chidatu nichabitao, ndachia e Yerusaalemu ohubona Keefa, mani ndaamenya nae embaka y'ejuma chibiri. 19Nae sindabonanaho nende omutume wundi ohutusaho, Yakobbo mwaanang'ina Mwaami weefwe. 20Biindi ohwandiika bino byadyeeri. Nasae yesi amanyire ati haba siindi hubacha. 21Nindamala endyo, ndeecha ndaachia mu bituundu by'e Siiria nende Silisia. 22Esiha esyo, abandu bafukiiriri mu Kristo ab'Ebuyudaaya bali nibasisiiri ohuumanya. 23Bali nibawuliraanga buwulira bati: “Oyo owatulwanisaanga bulaanu niye oli ohuyalaanga efukiirira yiyali naakesaho ohusihirisa!” 24Mani beecha baakinia Nasae hu lwaange.

will be added

X\