ABEEFESO 6

1Abana, ticheenge abebusi beeng'we mu Mwaami, olwohuba sino nisyo esiindu sihoyera. 2“Yisaanga oluyaali mu lataao nende maao” (lino nilyo elako litaangira eliriho esisuubise), 3“hubinyale ohuhubeera ebilai handi hwonyale ohuyiindira nooli omulamu hu syaalo huno.” 4Abasacha beebusi, mutachunianga abana beeng'we boola ohudiirwa etima, nae mubahuseenge baba nende ebiima bilai nende ameeko k'Omwaami. 5Abasumba, muwulireenge abakali beeng'we b'ohusyaalo huno, nimutya haandi nimuteengereha, nende omwooyo mulala, koti mwahaholera Kristo; 6ataali olwohuba mbwe ahubona, koti odaha ohusangaasa busa abandu, nae koti omuhalaabani owa Kristo, oli ohuholaanga bi Nasae adaha nende omwooyo mulala. 7Nooli ohuhalaabanaanga nende ohudaha koti luwahaholeraanga Omwaami, handi sikoti oholeraanga abandu busa, 8nomanyire oti hulwa buli siindu silayi syoosi si muundu ahola, achia ohunyoola engaanga yichaaniraho ohutula eyiri Omwaami, kata naaba naali omusuumba oba omulehuule. 9Abakali, mwesi mubaholereenge mutyo, handi mweliindeenge obutatisatisaanga, nimumanyire muti, oyo oli Omukali waabwe handi oli Omukali weng'we, ali Mukulu, handi muti oyo abula nende ohusosola. 10Nimaliirisa, becheenge abomiifu mu Mwaami nende mu maani k'obukali bwae. 11Mwefwaale ebilwaaniro bya Nasae byoosi, hu munyale ohweema tiiri nimweliindire obukodyo bwa Sitaani. 12Olwohuba sihuli hulwaana nende emibiri nende amabaanga busa, nae huli ohulwaania obutuki, ohulwaanisa amaani, ohulwaanisa abatuki b'ohusyaalo bali mu siirima siriho endaalo chino, ohulwaanisa okunabuungi kw'emyooyo mibi ech'obuhyamu buli mu bifwo byo Mukulu. 13Mani sakira bukule ebilwaaniro bya Nasae byoosi, hu munyale ohuyinduulana mu ndaalo mbi, mani nimuba nimumalire ohuhola ebyo byoosi, mudoong'e nimweemere. 14Mani mwemeenge nimumalire ohweboya olusibiro mu sibuno nende obwadyeeri, handi nimumalire ohwefwaala ebbaati ly'ohusirifu elyobulungifu, 15handi nende nimumalire ohufubiha mu makulu keeng'we ebyehoonyerwa by'Emboosi Ndai y'emireembe. 16nimumalireho bino byoosi, bukule engabo y'efukiirira, yimunyala ohusimisira obuyiingo bumesamesana obw'omusuku oyo. 17Handi nimumalire ohubukula ekofya y'obuwonia, nende olugaanga lwa Mwooyo, oluli emboosi ya Nasae. 18Mwekongoyeenge ebiha byoosi mu Mwooyo, nende ohwekongooya hwoosi nende ohwekongooyeraanga abaasyeng'we. Nimumaliirisa mutyo, mubecheenge ameeso nende ohwesimiirisa hwoosi, nimwekongooyeraanga aboolerefu boosi, 19handi hu lwaange syesi, muti hunyale ohulomalomaanga nitatya ninjaala esyaama sy'Emboosi Ndai, 20sindeholera wamwaanda oli mu minyororo; hu nyale ohuyiyaala nitatya, koti luhoyeere ohuyilomaloma. 21Bulaanu hu mwesi mweemeo mumanye koti lundi, nende siindi ohuhola, Tikiku omusyaani weefwe muheerwa, handi omuhalaabani mwesikwa, mu Mwaami, mbao achia ohubaboolera buli siindu. 22Mutumire yimuli hulwesifune syeene sino, endi humunyale ohumanya koti luhuli, handi endi anyale ohubagumia emyooyo cheeng'we. 23Emireembe chibe hu baasyeefwe, nende ohudaha alala nende efukiirira, eyitula eyiri Nasae Seefwe, handi nende eyiri Omwaami Yesu Kristo. 24Omukisa kube nende abo boosi abaheera Omwaami weefwe Yesu Kristo nende ohudaha hutafwa.

will be added

X\