ABEEFESO 5

1Mani sakira mubecheenge ababonera hu Nasae, koti abaana baheerwa. 2Mani mukendereenge mu hudaha, koti Kristo yatudaha mani yewaayo omweene hulweefwe, esiyaanwa syesing'aari, handi esiyaanwa sya Nasae. 3Nae obudamba nende ebiindu by'omufuto byoosi, oba obwekoombi sibihoyeere kata ohutumbulwaanga mweng'we, koti ebihoyera ohuba mu bandu boolerefu. 4Mutakanyaanga esiindu syesibboli syoosi sibabaamo, oba embaha y'obusiru, kata busa ohuyemula, ebitahoyera; nae musifwo syeebyo, abechengewo ohwebasaanga busa Nasae. 5Mwehaliirise sino, mbwe abulao omudaamba yeesi oba omuundu w'omufuto, oba omuundu mwekoombi (esyeekesa ow'emisaambwa), oli nende obusiha mu bwaami bwa Kristo nende obwa Nasae. 6Mutalehaanga omuundu yeesi ababachirisa nende embaha chitaalimo amahulundu, olwohuba ni hulw'ebiindu bifwaana biti ebicha ohukera obwaalaba bwa Nasae bweehera hu baana b'obutawulira. 7Mani sakira mutaholeganaangaho nabo, 8olwohuba mwesi hale mwalichiingi esiirima syeene, nae bulaanu muli obulafu mu Mwaami; mani kendeenge koti abaana b'obulafu 9(olwohuba esyaamo situla mu bulafu, sinyolehanira mu biindu byoosi ebilai, handi ebilungifu handi ebyadyeeri), 10mani muteemeho ohweeka ohuholaanga ebisangaasa Omwaami. 11Muteyingisaanga muhuhola ebiindu bitaalimo obuhoonyi eby'esiirima, nae mu sifwo syohuhola mutyo, eng'we mubituumbuleenge busa. 12Olwohuba ni eby'esoni kata ohulomaloma hu biindu bi bandu abo bahola mu ngiso; 13nae esiindu syoosi nisikisulwa nende obulafu, siicha syabonehana, olwohuba esiindu syoosi esibonehana nisyo obulafu. 14Mani sakira siboolwaanga siti, “Simuha, Ewe omukoni, mani osiingire otule mu bafu, mani Kristo achia ohuhubeeresa obulafu.” 15Mani tingaala bulai obone koti lwokeenda, otaba koti otaali omukesi nae koti oli omukesi, 16mani wehonyereenge bulai muno ebiha byoosi, olwohuba endaalo chino mbi. 17Mani sakira, mutabechaanga abasiru, nae manyeenge si Mwaami aaba nadaha. 18Handi mutameraanga amalwa, olwohuba kacha busa ohuhunyaasa, nae mwichusweenge nende Mwooyo, 19nimukerakirana nende abaasyeng'we mu sabbuli nende enyembo ch'ediini nende enyembo cha Nasae, nimweemba handi nimuchilungira Omwaami nende omwooyo mulala, 20buli siha syoosi, nende hulwa buli siindu syoosi, nimwebasaanga Nasae Seefwe mu liita ly'Omwaami weefwe, Yesu Kristo. 21Buli muundu aticheenge owaasye ohweema huhwiisa oluyaali mu Kristo. 22Abahasi, ticheenge abasaacha b'eng'we koti lumwahatya Omwaami. 23Olwohuba omusaacha niye omutwe kw'omuhasi koti lu Kristo ali omutwe kw'abafukiiriri, abali omubiri kwae, nae omweene ali Omuwonia waabwe. 24Koti lu bafukiiriri batya Kristo, nilwo lu bahasi bosi baba batye mu buli ngeri yoosi, abasaacha baabwe. 25Abasacha, daheenge abahasi beeng'we, koti lu Kristo yadaha abafukiiriri mani yewaayo omweene hulwaabwe, 26hwaanyale ohubalabya naamalire ohuboosa nende ohwoosa hw'amaachi, alala nende emboosi, 27hwaanyale ohwediisa omweene abafukiiriri abo, nende obunyiri, nibabulaho ekoondo lyoosi, kata busa ohwekoda hwoosi, oba esiindu syoosi esifwaanaho sityo, hu banyale ohuba aboolerefu handi ababulaho obubi bwoosi. 28Kata katyo, abasaacha bahoyeere ohudahaanga abahasi baabwe koti lubadaha emibiri chaabwe. Omusaacha yeesi odaha omuhasi wae aaba yedaha omweene. 29Olwohuba abulao omuundu yeesi osyulangaho omubiri kwae kweene, nae akuliinda handi yakuliisa, koti lu Kristo aholaanga abafukiiriri, 30olwohuba huli ebituundu by'omubiri kwae. 31“Mani hulw'esifune sino, omusaacha achia ohulehaanga simwaana nende ng'ina, mani amala aambanisibwa nende omuhasi wae, mani bombi bamala baba omubiri mulala.” 32Esyaama sino sihuluundu muno, handi ndi ohuboolaanga endi, sidiira hu Kristo nende abafukiiriri; 33nae kata katyo, lehe buli mulala hweeng'we adahenge omuhasi wae koti luyedaha omweene, handi lehe omuhasi abonenge ati atya omusaacha wae.

will be added

X\