ABEEFESO 4

1Mani sakira ese omuboye hulw'Omwaami, mbekweda ohumenya obulamu buhoyera ohulaangibwa humwalaangibwa, 2obw'ohweyisa aasi koti lubihoyera, nende obuloonga, nende obwesimiirisi, nende ohwesimiirisiraanga abaasyeng'we mu hudaha, 3abali nende amawofu k'ohuliinda obulala bwa Mwooyo muhukeendera mu mireembe. 4Aliwo omubiri mulala nende Mwooyo mulala, koti busa lumwalaangwa ohuba nende esuubi lala elichiana nende ohulaangibwa hweeng'we. 5Omwaami mulala, efukiirira ndala, ohubatiisibwa hulala. 6Nasae mulala handi Seefwe w'efwe fweesi, oli akulu wa byoosi handi obitira mu byoosi handi oli mu byoosi. 7Nae esisa syabeeresebwa buli mulala hweefwe ohukeraania nende esikero, sy'esiyaanwa sya Kristo syaaba nasyo. 8Mani sakira silomalomwaanga siti, “Niyaniina akulu yali niyemiriire okunabuungi kw'abawaambe, handi yabeeresaanga abandu ebiyaanwa.” 9(Muhuboola ati, “Yaniina,” siba syekesa siina syeene nataba handi nateehaho aasi hu lweero lw'esyaalo? 10Mani oyo oweeha niye omweene oyo handi owaniina akulu muno ohubita nende ekulu, hwaanyale ohwichusa ebiindu byoosi.) 11Niye yi biyaanwa byae byali biti abandu bandi banyale ohuba abatume, abandi abanabbi, abandi abayaali, abandi abaayi nende abekesa, 12ohubeeresaanga aboolerefu ebiindu bihoyera omulimo kwobuhalaabani, ohwombahaanga omubiri kwa Kristo, 13ohwoola lu fweesi hunyoola obulala bw'efukiirira nende obw'ohumanya Omwaana wa Nasae, ohwoola hu buwangafu bweene, ohwoola hu sikero sy'emera ya Kristo mu bwiichufu; 14hu bulaanu efwe huhaye ohudoong'a nihusisiiri abaere, nihusuubwa era nende eno handi nihuyikaanisibwa nende buli mboo y'enjekesa chikabuhaane, ohutula hu bandu babachirisi, ohweema hu bukodyo bw'engano chaabwe. 15Ohumalaho ohulomalomaanga obwadyeeri mu hudaha, hunyale ohuhulira mu buli ngira yoosi, mu mweene oyo oli omutwe, mu Kristo, 16yi mubiri kwoosi, kweyambaaniaho handi kwediiraho alala, mu buli nyiingo, yikwabeeresebwa, buli situundu nisihola bulai, sikera omubiri kwahula, handi kweyombaha mu hudaha. 17Bulaanu sino syomiisa handi ndasijulira mu Mwaami endi, eng'we simuhoyeere handi ohuchiiririra nimumenya koti Abateende bamenyaanga, mu buhyaamu bw'ebibaaso byaabwe; 18ohumanya hwaabwe hwamaliyisibwa, bakabuhana nende obulamu bwa Nasae olwobutamanya bubalimo, obweema hu buwangalafu bw'emyooyo chaabwe; 19bamala ohwehola ebikwangara handi bamala ohwewerayo elalira mu obwekoombi, batolyoohera ohuhola buli ngeri y'ebiholwa by'omufuto. 20Mani sino nisyo simweeka ohutula hu Kristo! -- 21nimbaasa endi, mwamala ohuwulira akamudiiraho, handi endi mwekeserwa mu mweene oyo, koti lu bwadyeeri buli Yesu. 22Mwefwaalule obulamu bweeng'we buhale, obuchiana nende ebiima by'obulamu bweeng'we buhale, obwamala ohubiiyira mu obwekoombi budondobanu, 23mani mukaluhanisibwe mube abayaaha mu myooyo ch'ebibaaso byeeng'we, 24mani mwefwaale obulamu buyaaha, obwaloongebwa obufwanana nende Nasae, mu bulungifu bwadyeeri nende obwolerefu. 25Mani sakira, muhwetusaho obwebachirisi, lehe buli muundu yeesi alomalomenge obwadyeeri nende owaasye, olwohuba fweesi huli ababaasyeefwe. 26Nyolereenge nae mutaholaanga esibi; mutalehanga elyuuba likwa nosisiiri nende etima, 27ohayeenge ohubeeresa Sitaani ehabi yoosi. 28Lehe omwiibi yeesi ahaye ohuchiiririra niyeeba, nae muleheenge ahola emirimo, naahola omulimo kw'obwadyeeri nende amahono kae omweene, huyeemeo anyaleenge ohukabaho abo ababa nibali nende obudahano. 29Leheenge enomanoma mbi yihayenge ohutulaangaho mu minwa cheeng'we, ohutusaho echo endayi echinyala ohuhusa, echichiana nende omuholo, chinyale ohuberesa omukisa abo ababa nibachiwulira. 30Haandi mutanyoolesaanga Mwooyo Mwolerefu wa Nasae, yimwalindirwamo ohwoola hu ludaalo lw'ohununulirwaho. 31Mulehe obululu bwoosi nende obwaalaba nende etima nende ohwekanyiisa, nende obumoonyi, bitusibwe mweng'we, alala nende ehiinda yoosi, 32mani buli muundu akwireenge busa esisa owaasye, nende omwooyo mudoto-doto, buli muundu naleheraangamo owaasye, koti lu Nasae mu Kristo yabalehera.

will be added

X\