ABEEFESO 3

1Mani hulw'esifune sino, ese Paulo, omuboye wa Kristo Yesu hulweng'we Abateende 2nimbaasa endi mwamala ohuwulira hu buliindi bw'esisa sya Nasae, bundabeeresebwa hulweng'we, 3koti lu syaama syeecha syambuulirwa ohubitira mu huboneherwa, koti lunyandiikire mu bwimbikiti. 4Nimuchia ohusoma sino, mucha ohunyala ohumanya esibaaso syaange, esidiira hu syaama sino esya Kristo. 5esitabuulirwa abandu boosi, mu njibulo chiindi echabita koti lubulaanu simalire ohubwiihulirwa omutume wae mwolerefu wuno, nende abanabbi ohubitira mu Mwooyo. 6esyaama siri mbwe, koti lu Abateende bosi bali abasiha, abandu b'ohumubiri mulala, handi abakabani bohusisuubise ohubitira mu Kristo Yesu, handi ohubitira mu Mboosi Ndai. 7Hulw'Emboosi Ndai yino, ese ndeecha ndaholebwa ohuba omuhalaabani waayo, ohweema hu siyaanwa sy'esisa sya Nasae, sindabeeresebwa ohubitira mu buhosi bw'amaani kae. 8Ese naange, kata nende lundi omudiidi ohira mu boolerefu boosi, ndabeeresebwa esisa sino, hunyale ohuchia ohuyaalira Abateende engaanga yitanyolehananga eyiri mu Kristo, 9handi nende ohuchia ohuhola abandu boosi banyale ohubona endekeha koti luyiri eye syaama syali syakisibwa mu Nasae waloonga ebiindu byoosi, hulwendaalo nyiingi. 10mbwe, ohubitira mu mukaanda kw'abafukiiriri, amakesi maangi kakabuhaane aka Nasae, kanyale bulaanu ohwekesebwa kaamanyihana eyiri obunyala nende amaani mu bifwo byo Mukulu. 11Sino syeema hu ndekeha eyolubeerera ya Nasae yiyoseresera mu Kristo Yesu Omwaami weefwe, 12yihulimo nende obusimbiifu nende obwesikwa ohusuda eyiri Nasae ohubitira mu fukiirira mu Kristo. 13Sakira ndi ohubasaba mutawaamo omwooyo ohubona koti lundi ohubanyahanira, esyahabeere esy'oluyaali yimuli. 14Hulw'esifune sino, sakira hubba aasi amahumbo kange mu moni wa Seefwe, 15otulaho eliita lyabuli lwaanyi oluli Mukulu oba hu syaalo, 16hu mbwe, ohweema hu bungi bw'oluyaali lwae, anyale ohubabeeresa obunyala bw'ohwomiiswa nende amaani mahoongo ohubitira mu Mwooyo wae, obuli mukati w'emyooyo cheeng'we bweene. 17handi mbwe, Kristo anyale ohumenya mu myooyo cheeng'we ohubitira mu fukiirira; mbwe eng'we, nimuba nimumalire ohuwaanda nende ohwomiiswa mu hudaha, 18munyale ohunyoola amaani k'ohufukiirisania nende aboolerefu boosi ohumanya obubaambali nende obulambiifu nende obuleeyi nende obwoloberefu, 19handi nende ohumanya ohudaha hwa Kristo ohufumaalira amakesi koosi, hu munyale ohwichusibwa nende obwiichufu bwa Nasae. 20Bulaanu eyiri oyo yihubitira mu maani kali ohutuholeramo, anyala ohutuholera ebiindu bibitiirifu muno ohuhirira elalira nende koti bihunyala ohumusaba nende ohubaasaho, 21oyo aberesebwa oluyaali mu mikaanda ch'abafukiiriri handi nende mu Kristo Yesu eyiri enjibulo choosi, ebiha nende ebiha. Amiina.

will be added

X\