ABEEFESO 2

1Hale mwali mwafwa mu mwooyo ohweema hu buhyaamu bweeng'we nende ebibi byeeng'we. 2bimwakenderaangamo, nimuloondakana nende ehola y'esyaalo sino, nimuloondakirira omuhombe w'amaani k'emboo, mwooyo oli bulaanu ohuholeraanga mu baana bahayuha. 3Mu beene bano, nimwo mweefwe fweesi hwali hwamenya mu obwekoombi bw'emibiri cheefwe, nihuloondakana nende obwekoombi bw'emibiri nende ebibaaso, mani ohweema hubyeene ebyo, hwali mu bwibulanwa hwali abaana b'egiili, koti busa abandu bandi badong'ereyo boosi. 4Nae Nasae, oli nende esisa sibitiirifu ohutulana hu hudaha huhunuufu hwatudahiramo, 5kata nende nihwali nihwamala ohufwa, ohubitira mu buholi bw'ebibi hweefwe, yeecha yatuhola hwabeera abalamu mu Kristo (esyeekesa mbwe hwaonisibwa hulw'esisa busa), 6handi yatusyuusira alala nae, handi yatwihasa alala nae mu bifwo byo Mukulu ohubitira mu Kristo Yesu, 7ati mu muleembe kwiicha hwahanyale ohweekesa obubitiirifu bw'esisa syae sitanyala hukerwa muhutukwiira esisa ohubitira mu Kristo Yesu. 8Olwohuba ohubitira mu sisa, mwaonisibwa ohubitira mu hufukiirira; handi sino haba sisyali esiholwa syeng'we abeene, nae syali esiyaanwa sya Nasae 9esiteemere hu biholwa oti hu muundu yeesi anyale ohwefumiaho. 10Olwohuba efwe fweesi huli omulimo kw'amahono kae mahaya, abalongebwa buyaaha ohubitira mu Kristo Yesu huholeenge emirimo milai, chi Nasae yatekeha hale, ati efwe hunyaleenge ohuchikeenderaangamo. 11Mani sakira muhoyeere ohwichulisa muti, eng'we hale abali abandu Abateende mu mubiri, nimulaangwa mbwe ohutahebwa nende abali nibelaanga bati ohuhebwa, ohuholebwaanga busa hu mubiri, handi nihuholebwa busa nende amahono 12mwichulisa muti, esiha syeene esyo mwali nimwatusibwa hu Kristo, nimusosoolwe ohutula hu bulala bwa Yisirayiri, handi nimuli Abateende ohweema hu mbuliriisania ch'esisuubise, nimutaaliho nende esuubi lyoosi handi nimutaaliho nende Nasae mu syaalo muno. 13Nae bulaanu mu Kristo Yesu, eng'we hale abandu bali eyale muno, mwasudisibwa aambi ohubitira mu mabaanga ka Kristo. 14Olwohuba oyo niye emireembe ch'efwe, oyo owatuhola fweesi hwaaba esiindu silala, handi yamala ohulikulira elalira esida sy'obusuku syali nisitukabuhaanie. 15nabitira muhumalirao elalira nabitira mu mubiri, amaani k'amala ka Musa nende obulagiro bwosi, huyeemeo anyale ohweholeramo omweene omuundu muyaaha mulala yeng'ene, musifwo syohuba nende abandu babiri, abateemaho ohutaawo emireembe, 16handi hwaanyale ohutusasania nende Nasae nihuli omubiri mulala ohubitira mu musalabba, abweene awo niyemao nanyala ohwakamisira elalira obusuku bwaliwo obwo. 17Mani yemawo yeecha yaabayaalira emireembe eng'we hale abali nimuli eyaale muno handi yayaala emireembe eyiri abo hale abali nibali aambi; 18olwohuba ohubitira mu mweene oyo nilwo luhuba fweesi alala huba bucha ohunyala ohunyoola obunyala bw'ohusuda aambi nende Seefwe nihuli mu Mwooyo mulala. 19Mani hulweesyo, eng'we haba simusisiiri Abateende handi abakeesi busa, nae muli abebulanwa alala nende aboolerefu, handi muli abandu b'omunyuumba ya Nasae, 20eyombahibwa hu musiingi kw'abatume nende abanabbi, Kristo Yesu mweene naali esiiro, 21yi syombahe syoosi syeyambaaniaho alala, handi syemeeda ohuhulaanga nisyehola enyuumba ya Nasae enjolerefu ohubitira mu Mwaami; 22yi mwesi mwombahirwamo ohuba esimenyo sya Nasae ohubitira mu Mwooyo.

will be added

X\