ABEEFESO 1

1Ohutula eyiri Paulo, omutume wa Kristo Yesu, ohweema hu hudaha hwa Nasae, Yichiire abandu ba Nasae bali mu Buwefeeso, abesikwa mu bulamu bwaabwe nibuli alala nende Kristo Yesu: 2Esisa nende emireembe bitula eyiri Nasae Seefwe nende Omwaami Yesu Kristo bibe nang'we. 3Hwebase muno Nasae handi Simwaana Mwaami weefwe Yesu Krsito! Olwohuba ohubitira mu bulala bwefwe nende Kristo, yatubeeresa ehabi natubeeresa buli habi cha Mwooyo chiri mu syaalo syo Mukulu. 4Kata nende esyaalo nisyali nisitaloongwa, Nasae yali niyamala ohutudoola hube abandu bae ohubitira muhuba bulala nende Kristo, hu hunyale ohuba aboolerefu handi abataaliho obubi bwoosi mu moni wae. Ohweema hu hudaha hwae 5Yatutekehera ohuba mu hudaha, ohuba abaana bae ohubitira mu Yesu Kristo, ohweema hu sichiiririrwa sy'ohudaha hwae, 6afumisibwe hulwesisa syae syoluyaali, siyatuberesera mu muheerwa wae. 7Mu mweene oyo nimwo muhuli nende ohununulibwa ohubitira mu mabaanga kae, ohuleherwamo ohw'ebibi byeefwe, ohweema hu bungi bw'esisa syae 8siyatusiindihira mu bungi muno. 9olwohuba yatubwihulirawo hwamanya ohubitira mu makesi koosi, nende ohubaasa hwoosi, esyaama sy'ohudaha hwae, ohweema hu sichiiririrwa syae siyatuteera mu Kristo 10koti endekeha y'esiha nisyahoole, ohumuwambaanisiramo ebiindu byoosi ebiindu biri Mukulu nende ebiindu biri mu syaalo. 11Ebiindu byoosi biholebwa ohweema hu tekeha nende eheengao ya Nasae; handi Nasae yatudoola ohuba abandu bae beene mu bulala nende Kristo ohweema hu sichiriirirwa syae, ohweema hu tekeha yae. 12Lehe efwe abachaaka ohwesika humenye mu bulamu bufumia handi obuberesa Nasae oluyaali. 13Mu mweene oyo, eng'we mwesi, abamala ohuwulira emboosi y'obwadyeeri, Emboosi Ndai y'Obuwonia bweeng'we, handi mani mwamala mwamufukiiriramo, mwamala ohufuundihirwa nende esisuubise sya Mwooyo Mwolerefu, 14oli esyomiisira elalira esuubi ly'ohunyoola obusiha bwefwe, ohwoola luhulinyala ohubunyoolera elalira, hulwohufumia oluyaali lwae. 15Mani ohweema hu sifune sino, olwohuba ndamala ohuwulira ebidiira hu fukiirira yeng'we mu Mwaami Yesu nende hu hudaha hweeng'we hw'abandu boolerefu boosi, 16haba sindeheraangaho ohubeebasira Nasae, nimbechulisaanga mu hwekongooya hwange hwoosi, 17endi Nasae w'Omwaami weefwe Yesu Kristo, Seefwe w'oluyaali, anyale ohubabeeresa omwooyo w'amakesi, nende owohwikulirwawo mu humumanya hwae, 18emoni cheeng'we chemyooyo cheeng'we nichimalire ohwaamuha, hu munyale ohumanya esuubi lihoyeere lyeene liyabalaangira, nende engaanga yeene koti luyiri eyobusiha bw'oluyaali obuli muboolerefu, 19handi nende koti lubuhunuufu bubitiirifu lu buli, obw'obunyala bwae buli mweefwe abafukiiririra, ohweema hu huhola hw'obunyala bwae bukali muno 20buyooseresera mu Kristo niyamusyuusa yaamutusa mu bafu, handi yaamuhola yaanyala ohwihala hu muhono kwae muluungi mu bifwo biri Mukulu, 21esiri akulu muno ohuhira obutuki bwoosi nende obunyala bwoosi, nende amaani koosi, nende obuhunuufu bwoosi, handi nende akulu ohuhira buli liita lyoosi elikulihibwaanga, ataali mu ndaalo chino chong'ene, nae nende mu ndaalo chicha ohwiicha; 22handi yamala ohuta ebiindu byoosi aasi w'amakulu kae, handi yamala ohumuhola ohuba omutwe kw'ebiindu byoosi, hulw'omukanda kw'abafukiiriri boosi, 23okuli omubiri kwae, obwiichufu bwae owichusira elalira byoosi mu byoosi.

will be added

X\