ABAKOLOSAYI 4

1Abaami, direenge abaambe beeng'we koti lusidahibwa handi bulai, nimumanyire muti, eng'we mwesi muli nende Omwaami oli Mukulu. 2Muchiririre nende obwomiifu muhwekongooya, nimwetekeheramo nende ohwebasaanga; 3handi mutwekongooyerenge fwesi, hunyale ohuyalaanga ebyaama bya Kristo, esifune syakera ese ndaaba niindi mu mboyero, 4muti nyale ohulomaloma bulai koti luhoyeere. 5Mweyireenge mu ngira y'amakesi eyiri abataali mu mukaanda kweefwe, nimuhola ebihoyera ohuholebwa esiha syoosi. 6Leheenge enomanoma cheeng'we buli siha chibe echesiroonyo, echilungirwemo omuunyu, hu munyale ohumanya koti lumuhoyeere ohukobolaanga mu buli muundu. 7Tikiku, achia ohubaboolera ebidiira hu mirimo change; musyaani weefwe mukoosi muno handi omuhalaabani mwesikwa handi omuhalaabani wasyaange mu Mwaami. 8Mutumire yeecha yimuli hulwesifune syeene sino, endi munyale ohumanya koti luhuli handi endi hunyale ohubakobosamo omwooyo, 9handi mbawo Onesimu yesi ali ohwiicha nae, omusaacha omwesikwa handi omuheerwa handi atula hu mukaanda kweeng'we okwo. Bombi bacha ohubakaniayira bulai bweene ako koosi akeholehenge eno. 10Alisitaluuko, omuboye wasyaange abaheesa, handi nende Mariko mwaanang'ina Bbarunabba ow'oluyia (yimunyoolere amakerako kamudiiraho, niyoola yimuli, mumubukaanire bulai), 11nende Yoswa olaangwa Yusito yesi abaheesa. Bano nibo abasaacha bahebwa bong'ene mu bahalaabani basyaange abahalaabanira Obwaami bwa Nasae, handi babeere nibaangumia muno omwooyo. 12Epafura, mulala hweeng'we abahalaabani ba Kristo Yesu, yesi abaheesa, koti lu yamenya ebiha byoosi nabechulisira elalira mu hwekongooya Nasae hwae, ati munyale ohweyira koti abahuluundu handi nimuli nende esuubi liichufu mu biindu bi Nasae adaha. 13Olwohuba syesi museemba endi yahabalamo nende esinani siingi, nende abo abamenya mu Laodesia nende mu Hyerapoli. 14Luka omusirihi muheerwa alala nende Deema bosi babaheesa. 15Beresa amaheeso kange abaasyefwe bali mu Laodesia, alala nende Nimufa, alala nende Abakurisito abomunyumba yae. 16Mani noomala ohusoma ebbarwa yino, teemaho muno nga lwonyala ebbarwa eyeene yino yinyale handi ohusomebwa mu nyumba ya amalaamo eyiri mu Laodesia yosi. Haandi nasilala otyo, muhoyeere musome nende ebbarwa eyo yosi yi bafukiirira mu Kristo abali mu Laodesia bweene omwo, baba nibachia ohuhutumira. 17Handi muboolere Arikipo “Ewe ohoyere obone oti omaliirisa ohuhola omulimo okwo kuwatumibwa mu obuhalaabani buno obwo Omwaami weefwe.” 18Neende omuhono okwaange ese omweene, mbano nyandiika endi: Amaheeso ohutula eyiri Paulo. Nae muteebiriraanga eminyororo ekiaange kino! Omukisa okwa Nasae kuhoya kwaaba ninaang'we.

will be added

X\