ABAKOLOSAYI 2

1Olwohuba ese ndaha eng'we mumanye obukali bw'ohulwaanira hwange, nende abo abali mu Laodesia, handi nende abo boosi abasisiiri ohubonaho obweeni bwaange, 2hu bulaanu emyooyo chaabwe chinyale ohwomiisibwa koti lubediira alala muhudaha, ohunyala ohunyoola engaanga yoosi eyohumanya hweene nende ohumanya esyaama sya Nasae esya Kristo, 3owakisibwamo obugaga bwoosi obw'amakesi nende ohumanya. 4Mboola sino omweene hu bulaanu abulewo omuundu yeesi onyala ohwiicha yababachirisa nende enomanoma ch'obukodyo. 5Olwohuba kata nende nimba nitaali awo mu bundu, nae ndi naang'we mu mwooyo, nisangaala ohubona endekeha ndayi yeeng'we, nende obwomiifu bw'efukiirira yeng'we mu Kristo. 6Koti mani lumwamala ohunyoola Omwaami Kristo Yesu, mani mumumenyemo, 7nimumwingiisemo emisi cheeng'we, handi nimumuhuliiremo, handi nimweyombaahe mu fukiirira, koti busa lumweekeswa, nimwichuule ohwebasaanga. 8Muboneenge muti, omuundu yeesi siyeecha yaabalia niyehoonyera amayiingi nende obubacha bwereere, ebitula mu miduunga ch'abandu, ohweema hu myooyo chafwa ech'ohusyaalo huno, ataali ohweema hu Kristo. 9Olwohuba ni mumweene oyo nimwo mu bwanasaye bwiichufu bwadyeeri bwamenya, 10handi mwanyala ohuwangaalira mu mweene oyo, handi oli omutwe kw'obutuki bwoosi nende obunyala bwoosi. 11Mu mweene oyo, mwamala ohuhebwa nende ohuhebebwa hutaholebwa nende amahono, nimwefwaalula omubiri kw'enyama mu huhebwa hwa Kristo; 12handi mwasiihibwa alala nae mu hubatiisibwa, mu mwesi handi mweecha mwasyuhisibwa nae mu fukiirira muhudaha hwa Nasae, owamusyuusa ohutula mu bafu. 13Mani eng'we abali mwafwiira muhuhola ebibi nende obutahebebwa enyama yeng'we, Nasae yabalamusira alala nae, naamalire ohutuleheramo ebibi byeefwe, 14handi naamalire ohubwiiha hu sigiingi syali syatuhiinga nende amalako bikadaha; yeecha yaasudya ebyeene bino endulo, nabihoma hu musalabba. 15Yang'uula emiduunga nende amaani mabi ebilwaaniro, mani yamala yabyaniha alafu yeekesa esihoyera ohubihola byoosi, nabisenakirira mu mweene oyo. 16Mani sakira lehe omuundu yeesi alehe ohubaheengera omusango hulw'ebidiira hu byohulya nende ebyohung'wa oba nende ohweema hu sidyaalo syoosi, oba hu mwoosi mudoto oba Sabbaato. 17Bino byoosi ni esiiniha busa sy'ebiindu bicha ohwiicha; nae amahulundu keene ka Kristo. 18Lehe omuundu yeesi alehe ohubakwiisa, niyeemere hu hudaha ohwesangaasa omweene, nende ohwiinamira bamalaika, naheengereo ohuchiira huhuboneherwaanga, nende ohweniinia abula esifune, ohweema hu bibaaso bitaalimo ohwesimiirisa, 19ataali ohwediira yeyomiisa hu Mutwe, okuliisa handi okuwambaania alala omubiri kwoosi, nikwehoonyera enyiingo chaakwo, nende efwonero chaakwo, kuhula nende ehula yidahibwa nende Nasae. 20Mu Kristo mwafwa eyiri emyooyo chafwa chiri musyaalo muno, lwasiina handi osimenyere koti omuundu ow'esyaalo sino? Lwasiina oloonda amalako kaboola mbwe, 21“Otadiiraanga husino,” “Otahombaangaho hu sino,” “Otegeng'aangaho hu sino”? 22(Nolomaloma hubiindu biwa-buwa nibyehoonyerwa), ohweema hu mbaasa nende enjekesa ch'abandu busa? 23Mu bwadyeeri bweene, ebiindu koti bino, bifwaana koti eby'amakesi, muhumeeda omwooyo kwohudaha Nasae, nende ohwefumia omweene, handi nende ohunyaala omubiri, nae bibulamo obuhoonyi, muhufuka obwekoombi bw'omubiri.

will be added

X\