ABAKOLOSAYI 1

1Ohutula eyiri Paulo, ohweema huhudaha hwa Nasae, ali omutume wa Kristo Yesu, nende ohutula hu Timoteo omusyaani weefwe. 2Ohuchiira abolerefu handi abesikwa basyeefwe mu Kristo abamenya mu Kolosaayi: Esisa sya Nasae Seefwe nende emireembe chae bibe naang'we. 3Efwe hwamenya nihuubbiraanga Nasae otyo muno, simwaana Omwaami weefwe Yesu Kristo, buli luhubasabiraanga, 4ohubeera hwamala ohuwulira abidiira hu fukiirira yeeng'we mu Kristo Yesu handi nende ohudaha hweeng'we koti lumudaha abolerefu boosi, 5ohweema hu sisuubise syababiihirwa Mukulu. Mwamala ohuwulira hu syeene sino mu mboosi y'obwadyeeri, Emboosi Ndai 6eyabeechera, koti mubwadyeri bweene yeecha mu syaalo syoosi mu yiri ohwamaanga ebyaamo handi niyihula--yityo mweng'we, ohutulira elalira hu ludaalo lumwawuliirira handi mwamala mwamanyira elalira esisa sya Nasae lu siri mu bwadyeeri, 7koti lumwayeeka ohutula hu Epafura omuhalaabani wasyeefwe muheerwa. Muhalaabani mwesikwa muno mu Kristo hulweefwe 8handi niye owatuboolera huhudaha hweeng'we mu Mwooyo. 9Mani, ohutulira elalira hu ludaalo luhwawulira huhudaha ohwo, haba sihwalehera ohubasabiraanga, nihwekweeda huti, mwesi muhoyeere ohwichusibwa nende ohumanya syaaba nadaha mu makesi k'omwooyo nende ohumanyaanga, 10ohumenyaanga obulamu buhoyeere ohuba mu Mwaami, obumusangaasira elalira, nibwamaanga ebyaamo mu buli mulimo mulai, handi nibwemeeda ohumanyaanga Nasae. 11Muhoyeere ohwomiisibwaanga nende amaani koosi, akeema hu buhunuufu bwae bw'oluyaali, mu hwomiira hwoosi nende ohwesimiirisaanga nende esangaalo, 12nimwebasaanga Seefwe, owanyala ohutuhola abahoyera ohukabana hu mukabo kw'aboolerefu mu bulafu. 13Yanyala ohututusa mu bunyala bw'esiirima, handi yatukinga yaatuleeta mu Bwaami bw'Omusyaani wae mukoosi, 14yihunyooleramo ohununulibwa, nende ohuleherwamo ebibi. 15Kristo niye esifwaanani sya Nasae otanyala ohulolehana, handi niye omwikula-nda w'ebiindu byoosi ebyaloongwa; 16olwohuba ohubitira mu mweene oyo nimwo mu Nasae yaloongera ebiindu byoosi ebiri Mukulu nende hu syaalo, ebibonehana nende ebyo ebitabonehana, kata obutuki bwoosi, oba obuhoongo bwoosi, endekeha choosi, oba obunyala bwoosi, ebiindu byoosi byaloongwa ohubitira mu mweene oyo, handi hulwomweene oyo. 17Kristo yaliwo ebiindu byoosi nibitaabaao, handi ni mu mweene oyo nimwo mu biindu byoosi binyala ohwomiisibwa alala. 18Niye omutwe kw'Abakurisito, omubiri kwae; niye enjaaka, omwikula-nda w'abasyuuha ohutula mu bafu, hubulaanu anyale ohuba omutangirisi mu buli siindu. 19Olwohuba ni mweene oyo, nimwo mu Nasae yeesi yasiima ohumenya, 20handi ohubitira mu mweene oyo hu Nasae anyale ohusasania niyekalusaho ebiindu byoosi, kata ebiba nibiri hu syaalo, oba Mukulu, niyehoonyera amabaanga k'omusalabba kwae ohutaawo emireembe. 21Handi eng'we, abali hale nimwakabuhana handi nimwasyuulana mu bibaaso, nimuholaanga ebiholwa bibi, 22bulaanu anyale ohuba naamalire ohubasasanisiria mu mubiri kwae kw'enyama ohubitira mu hufwa hwae, hwaanyale ohubayira mu moni wa Nasae nimuli aboolerefu, handi abataaliho nende esibi syoosi, handi abatanyala ohulekeresebwa, 23nikali mbwe mucha ohuchiiririra nimuli nende efukiirira, ohuba ab'amaani handi abomiifu, nimutachuuha mwatula hu suubi ly'Emboosi Ndai yimwawulira, eyamala ohuyaalirwa buli siloonge syoosi aasi w'Ekulu, handi eyeene eyo y'ese Paulo mweene ndeehola ohuba omuhalaabani wayo. 24Bulaanu ndi ohusangaalira mu husaandisibwa hwange hu lweng'we, nae mu mubiri kwaange, ndi ohumaliirisaanga ebyo ebitoolerera mu huchunisibwa hwa Kristo hulw'omubiri kwae, okulaangwa mbwe Abakurisito, 25okweene okwo ku syesi ndeecha ndeehola ohuba omuhalaabani waakwo ohweema humulaanga kutula Mukulu okwamberesebwa hulweng'we, ohukera Emboosi ya Nasae yimanyihane mubwichufu, 26esyaama syakisibwa humbaka ndeeyi, handi hu njibulo nyiingi muno, nae bulaanu esyabwihuliirwe aboolerefu bae. 27Eyiri abeene abo Nasae yahengawo ohukera bamanye obuhunuufu aabwaaka obuli mu Abateende engaanga y'oluyaali lw'esyaama sino, esiri nisyo Kristo oli mweng'we, esuubi ly'oluyaali luhoongo muno. 28Oyo niye y'efwe huyaala, nihulabula buli muundu handi nihweekesa buli muundu nende amakesi koosi, huhunyale ohuyira buli muundu naali omuwangafu mu Kristo. 29Mani ni hulwesifune syeene sino, sakira ndidiihana, ningesaho ohuhola nende amaani kosi, esiindu syoosi syanyala ohuba niyandeeremo ohuhola.

will be added

X\