EBIHOLWA 9

1Nae Saulo, nasisiiri nende ohudaha ohusitiisa-tiisa nende ohwiita abeeki b'Omwaami, yeecha yaacha eyiri omulaamisi muhunuufu 2mani yaamusaba ebbarwa chicha mu Sinagoogi chiri mu Damasiko, hubulaanu naaba niyakaanayo oyo yeesi omuloondi w'Engira, abasaacha nende abahasi, anyale ohubaboya mani yabaleeta e Yerusaalemu. 3Nae bulaanu niyali nakeenda nasuda e Damasiko, mani abweene busa awo, obulafu obutula Mukulu bweecha bwamyesuha bwamwebodohania. 4Mani Saulo yeecha yaakwa hu buloba mani yeecha yawulira ekono nilimuboolera liti, “Saulo, Saulo, lwasiina wumboniabonia?” 5Nae Saulo yeecha yaboola ati, “Omwaami, niiwe naanu?” Nae Omwaami yeecha yaboola ati, “Ndi Yesu, oyo yooli ohuboniabonia; 6nae siingira mani omale ochie wingire mu siko sihuluundu esyo, mani ochia ohuboolerwa syooba nodahibwa ohuhola.” 7Abasacha bali nibali ohukeenda nae beecha beema nibang'ang'lire busa, nibawulira busa ekono elyo, nae nibatabonaho omuundu yeesi. 8Saulo yeecha yaasingira ohutula hubuloba; nae emoni chae nichali nichiliimbula, haba siyali nanyala ohubonaho esiindu syoosi; mani sakira yeecha yemirirwa nende abandu bandi nibamudiirire omuhono mani beecha bamwoosa mu Damasiko. 9Mani ohumala embaka y'endaalo chidatu, Saulo yali natanyala ohubonaho daawe, mani handi haba siyalya kata busa ohung'wa hwosi. 10Nae bulaanu, yaliwo omweeki wundi owali yamenya mu Damasiko olaangwa ati Ananiya. Omwaami yeecha yamuboolera mu huboneherwa ati, “Ananiya.” Nae yeecha yaboola ati, “Omwaami, mbano ndi ano.” 11Nae Omwaami yeecha yamuboolera ati, “Siingira mani ochie hu ngira yilangwa yiti Tiiri, mani oteebe mu nyumba ya Yuda omusaacha otula e Tarusiisi olaangwa ati Saulo; olwohuba boneho, ali ohwekongooya Nasae, 12mani abweene omusaacha wundi olaangwa ati Ananiya niyengira mu nyumba yalimo mani namwisaho amahono kae hwaanyale ohunyoola handi ohubona hwae.” 13Nae Ananiya yakobolamo ati, “Omwaami, ndahawulira ohutula hu bandu bangi muno hu muundu wuno, obuungi bw'ebiindu bibi biyahamala ohuhola hu boolerefu bao mu Yerusaalemu; 14handi nguno ano ali nende obunyala ohutula eyiri omulaamisi muhunuufu ohuboya abo boosi abahwiinamiranga.” 15Nae Omwaami yeecha yamuboolera ati, “Ewe cha busa, olwohuba oyo ni omuhalabani wange mudoole ochia ohuyira eliita lyaange eyiri Abateende nende abatuki handi nende abaana ba Yisirayiri; 16olwohuba njia ohumweekesa koti ohusaanda hwae hucha ohwaaka hulwaange.” 17Mani Ananiya yeecha yaasingira yawaawo, mani yaacha yengira mu nyumba omwo. Mani niyali namwisaho amahono kae yaboola ati, “Saulo mwaana weefwe, Omwaami Yesu owahuboneheere hu ngira yiwabeere niwichiraho, yandumire yooli onyale ohunyala ohubona handi, handi onyale ohwichusibwa nende Mwooyo Mwolerefu.” 18Mani abweene awo, ni esiindu sifwaana koti amakaamba syeecha syakwa nisitula hu moni chae mani yeecha yaanyala ohubona handi. Mani yeecha yaasingira mani yabatiisibwa, 19mani yamala yaalya, mani yanyoola amaani. Hulw'endaalo nyiingi, yeecha yadoong'a naali nende abeeki abo e Damasiko. 20Handi abweene awo, yeecha yaacha mu Sinagoogi nyiingi nayaala Yesu naboolaanga ati, “Yesu niye Omwaana wa Nasae.” 21Mani abandu boosi abamuwuliraanga besinduhaanga muno, handi nibaboola bati, “Wuno siniye omusaacha owaboniabonia muno abandu benamiraanga eliita lino mu Yerusaalemu? Ni handi ngandi yabeere yeechere muno hulw'esichiiririrwa syeene sino, ohubayira mu moni w'abalaamisi bahunuufu nibaboyerwe.” 22Nae Saulo yeecha yemeeda muno ohunyoola amaani, mani yekusa Abayudaaya bali nibamenya mu Damasiko nanyonyola koti lu Yesu yali niye Kristo. 23Mani endaalo enyiingi nicheecha chabitao, Abayudaaya abo beecha bachaaka ohukiiya ohumwiita, 24nae ohumukiiya hwaabwe ohwo, hwecha hwamanyihana eyiri Saulo. Abeene abo beecha baabechaanga nibalindaanga hu biruwa byoosi esideete nende esiro bamubone bamwiite; 25nae abeeki bae beecha bamubukula esiro, mani banyala ohumwiisira aasi hu sida, naali mu simweero. 26Mani niyali naamalire ohwiicha mu Yerusaalemu, yeecha yateemaho ohweyambaania hu beeki ba Yesu Kristo bala; nae boosi beecha bamutya muno, olwohuba haba sibafukiirira yali yesi niyeholere omweeki wa Yesu Kristo. 27Nae Bbarunabba yeecha yaamubukula, mani yamala yaamuleeta eyiri Abatume ba Yesu Kristo, mani naamala nababoolera bulai koti lu Saulo niyali naali hu ngira yeecha yabona Omwaami, oweecha yaalomaloma nae, handi nende koti lu yali naali e Damasiko yeecha yayaalanga nataali nende esoni mu liita lya Yesu. 28Mani Saulo yeecha yachaaka ohukendaanga nabo nibatula nende nibengira mu Yerusaalemu, 29nibayaalanga ataali ohutya hwosi mu liita ly'Omwaami. Handi yeecha yachaaka ohulomalomaanga handi nende ohuyinganianga nende Abayudaaya bali nibalomalomaanga oluyonaani; nae nabo bali nibakiiyaanga busa ohumwiita. 30Nae abasyaabwe bandi nibeecha basimanya, beecha bamwiihirisa yeecha e Kaisarea, handi nibamala nibamutuma aweo ache e Tarusiisi. 31Mani sakira abafukiiriri ba Yesu Kristo abali mu Buyudaaya mwoosi alala nende mu Galilaaya mwoosi, handi nende mu Samaria mwoosi, beecha banyoola omuleembe mani beecha beyombaha bomiira; mani nibali nibamenya mu bulamu bw'ohutya Omwaami, handi nende mu hulemesebwa omwooyo hwa Mwooyo Mwolerefu, beecha biingiya muno. 32Bulaanu koti lu Peetero yali nabakendamo buli siha, yeecha yehirira yaacha emwaalo eyiri aboolerefu abali nibamenya mu Lidiya. 33ebweene eyo, Peetero yeecha yakaanayo omusaacha wundi olaangwa Ayeneya, owali niyadota esitaanda hu buliri hu mbaka ye myaaka chitaanu-na-chidatu, niyafwa omubiri kwoosi. 34Mani Peetero yeecha yaboola ati, “Ayeneya, Yesu Kristo ali ohuhuwonia; siingira mani waale obuliri bwao.” 35Mani abandu boosi abali nibamenya mu Lidiya nende mu Sharoni beecha bamubona, mani bamala bakaluhana baloonda Omwaami. 36Nae bulaanu, mu Yopa mwalimo omweeki wundi wali alaangwa Tabbisa, esyeekesa Dorika, esyeekesa esijusu. Yali omuhasi owechula emirimo milai myereere nende ebiholwa by'omuhono mukabi. 37Mu ndaalo cheene omwo, yeecha yalwaala mani yeecha yaafwa; mani nibaba nibamalire ohumwooka, beecha bamwaalisa mu siseenge siri akulu mu goroofa. 38Nae olwohuba mbwe Lidiya syali nisiri aambi nende Yopa, abeeki nibawulira bati Peetero ali abweene eyo, beecha baatuma abasaacha babiri yaali, nibamusaba nibaboola bati, “Nokanya, yichaho eno yihuli bwaangu.” 39Mani Peetero yeecha yaasingira mani yachiana nabo. Mani niyaba naamalire ohwiicha, beecha bamubukula bamuniinia mu siseenge syali akulu mu goroofa. Abahasi bafwiirwe boosi bali nibeemere aambi nae nibali ohuliraanga, handi nende nibali ohwekesaanga amaganjuula alala nende engubo chiindi chi Dorika yaholaanga niyali nasisiiri ninabo. 40Nae Peetero yeecha yabatusa boosi erwaanyi, mani naamala nasigama mani nachaaka ohwekongooya Nasae; nae niyakaluuhanira omulambo yeecha yaboola ati, “Tabbisa, siingira.” Mani Tabbisa yeecha yaalimbula emoni chae, mani niyeecha yaabona Peetero, yeecha yaasingira yehala. 41Mani Peetero yeecha yamubeeresa omuhono kwae mani yaamusingisa yaamwemesa. Mani niyeecha yalaanga aboolerefu alala nende abahasi bafwiirwe boosi nibeechere, Peetero yeecha yabeekesa Tabbisa naali omulamu abweene. 42Mani esyo syeecha syamanyihana mu Yopa mwoosi, mani abandu bangi muno beecha bafukiirira mu Mwaami. 43Mani Peetero yeecha yadoong'a mu Yopa hulw'endaalo enyiingi namenyere nende Simooni wundi, omubaambi w'amaseero.

will be added

X\