EBIHOLWA 8

1Handi Saulo yesi yeboneraho omweene ohufwa hwa Sitefwano huno. Mani hu ludaalo lweene olwo, nihwo hu hwiita huhoongo muno ohwa abafukiiriri bali mu Yerusaalemu hwachaakiraho; mani beecha boosi baasalaanira mu syaalo syoosi sya Yudea nende esya Samaria, ohutusaho Abatume boong'ene nibo abadoong'a. 2Abandu bali baheera muno efukiirira ya Yesu Kristo beecha basiiha Sitefwano, mani bamala bamulira muno. 3Nae Saulo esiha syeene esyo yali naali ohuboniabonia muno abandu bali bafukiirira mu Yesu Kristo, nga yengira mu buli nyumba malondehania, nadiira nahweesa abasaacha alala nende abahasi nabayira nabekalira mu jiela. 4Nae bulaanu, abandu bali nibeerhe nibasalaanire bachaaka ohukendanaanga nibayaala Emboosi eyo. 5Filipo yeecha yehirira yaacha mu siko sihuluundu sya Samaria, mani nayaalira Kristo abandu bali bamenya mubweene omwo. 6Mani okunabuungi kw'abandu nikuli nende omwooyo mulala, kweecha kwafukiirira ebiindu byali nibiri ohuboolwaanga nende Filipo, nibamala ohumutekeeresa handi nende ohubonaanga obulolero buyaholaanga. 7Olwohuba emisaambwa emiingi muno chatulaanga mu bandu bangi abalichingi nibaniinwa nacho, nichiririra mu kono hoongo muno; handi abandu bangi balichiingi nibafwa emibiri oba nibalema baonisibwaanga. 8Mani esangaalo liingi muno lyeecha lyaaba mu siko sihuluundu esyo. 9Nae waliwo omusaacha wundi olaangwa Simooni owali hale niyaholaanga ebyaamayia mu siko sihuluundu omwo mani niyawukianga esyaalo syoosi esya Samaria, handi niyabolaanga ati omweene yali omuundu muhunuufu muno. 10Abandu boosi bali nibamuwulira muno, ohutulira elalira hu muundu wa aasi muno, ohwolera elalira hu muundu muhunuufu muno, nibabolaanga bati, “Omusaacha wuno niye amaani kala aka Nasae akalaangwa mbwe Amahunuufu.” 11Mani abandu boosi bali bamuwulira muno, olwohuba hulwa embaka endeeyi muno, omusaacha oyo yali yabatiisa muno nende amaya kae kano. 12Nae abandu abo nibeecha bafukiirira mu Filipo, koti luyayaala Emboosi Ndai chidiira hu Bwaami bwa Nasae, handi nende eliita lya Yesu Kristo, beecha baabatiisibwaanga sidubaanie, abasaacha nende abahasi. 13Kata nende Simooni mweene yesi yeecha yafukiirira, mani lunyuma lw'ohubatiisibwa, yeecha yachaaka ohukendaanga nende Filipo. Mani niyali nihamala ohubonaanga obulolero bungi alala nende ebyaamayia bihunuufu muno nibiholebwa, yesi yeecha yaatya muno. 14Nae bulaanu abatume bali nibali mu Yerusaalemu nibeecha bawulira bati esiko sihuluundu sya Samaria syali nisimalire ohunyoola emboosi ya Nasae, beecha baabatumira Peetero nende Yowaana, 15abeecha beehirira beecha mani bekongooyera abandu abo eyiri Nasae bati banyale ohunyoola Mwooyo Mwolerefu; 16olwohuba haba sikwali nikwamala ohwiihaho hu muundu yeesi hwaabo, nae bali nibamala ohubatiisibwa busa mu liita ly'Omwaami Yesu. 17Mani Peetero nende Yowaana abo beecha beesa hu bandu abo amahono kaabwe, mani banyala ohunyoola Mwooyo Mwolerefu. 18Nae bulaanu, Simooni niyeecha yamala ohubona ati Mwooyo yali naakabibwa ohubitira mu hwisaanga amahono k'abatume hu bandu, yeecha yahengawo ohubabeeresa eseende, 19naboola ati, “Mumbeerese syesi amaani kano, hu buli muundu yeesi syesi yimba ninjisaho amahono kange anyaleenge ohunyoolaanga Mwooyo Mwolerefu.” 20Nae Peetero yeecha yamuboolera ati, “Efeesa yao eyo, sihirire naawe mweene, olwohuba obaasire oti onyala ohwenyoolera esiyaanwa sya Nasae sino niwehoonyera busa eseende! 21Ewe haba sooli nende kata omukabo kwoosi, oba eha yoosi mu biindu bino, olwohuba omwooyo kwao haba simuluungifu mu moni wa Nasae. 22Mani ohoyere ohweyolobya mu buhyaamu bwao buno, mani omale wekongooye eyiri Omwaami oti nisiba nisinyalihana, esichiririrwa siri mu mwooyo kwao okwo sihoyeere sinyale ohuhuleherwamo. 23Olwohuba ndi ohubona endi mbawo hane oli akati mu buchuuni bwehali-hali handi nende mu buboye bw'ebibi.” 24Mani Simooni yeecha akobolamo ati, “Ndekongoyereho eyiri Omwaami oyo, oti kata esiindu silala hwebyo byoosi byolomaloomeho sitanyala ohunjolaho.” 25Bulaanu, nibali nibamalire ohutusa obujulirwa handi nende ohulomaloma emboosi y'Omwaami, beecha bakobola e Yerusaalemu, nibayaala Emboosi Ndai mu ngoongo nyiingi muno ech'abandu Basamaria. 26Nae malaika w'Omwaami yeecha yaboolera Filipo ati, “Siingira mani ochiire ebuleka mwaalo eyiri engira yiihirira niyitula e Yerusaalemu niyicha e Gasa.” Engira yino neyomusiparara. 27Mani Simooni yeecha yaasingira mani yaacha. Nae boneho, omuundu Muyisoopia, omulade, omubiihi muhunuufu w'eseende ch'Omutuki muhasi ow'abandu Bayisoopia yali niyeechere mu Yerusaalemu ohwiinamira Nasae 28mani yali hwali ohukobolayo engo; niyali mbwe huyehaale mu sigaari sihweeswa nende esuhiri, yali naali ohusomaanga mu sitabo sy'omunabbi Yisaaya. 29Mani Mwooyo yeecha yaboolera Filipo ati, “Yalaalaho wakaane esigaari sino.” 30Mani Filipo yeecha yeruha yamwoolaho, mani yachaaka ohuwulira omusaacha oyo naali ohusomaanga Yisaaya munabbi, mani yateeba ati, “Mani oli ohutegeeraanga ebyo byooli ohusomaanga?” 31Nae yaboola ati, “Ndahanyala endye ohutegeera, omuundu wundi natanyimiriire?” Mani yeecha yalaanga Filipo aniine akulu yaali, yehale nae. 32Bulaanu esituundu sy'ebyandiiko byolerefu siyali naali ohusomaanga syali sino: “Koti ekoondi liyirwa ohusiinjwa oba omwaana kw'ekoondi nikuli mu moni womubeki kudimbaanga, mani yesi kata haba siyasamaho omunwa kwae. 33Naali muhuswaasibwa, obwadyeeri bwamwiimwa. Wina onyala ohutotola olwiibulo lwae? Olwohuba obulamu bwae buli ohumalibwa hu syaalo.” 34Mani omulade oyo yeecha yaboolera Filipo ati, “Ni hu wiina mweene, mu bwadyeeri bweene, yi munabbi wuno ali ohulomalomaho bino, yelomalomaho omweene, oba hu omuundu wundi?” 35Mani Filipo yesi yeecha yaasama yachaaka ohulomaloma, nachakira hu mandiiko keene kano, yeecha yoola ohumuboolera Emboosi Ndai cha Yesu. 36Mani nibali nibasikendaanga hu ngira eyo beecha boola eyiri amaachi, mani omulade oyo yeecha yaboola ati, “Bonaho, amaachi ngano! Siina syeene esinyala ohuhaya ohubatiisibwa hwange?” 37Nae Filipo yeecha yaboola ati, “Nooba nofukiirira nende omwooyo kwao kwoosi, onyala wabatiisibwa.” Nae yamukobolamo ati, “Fukiirira endi Yesu Kristo niye Omwaana wa Nasae.” 38Mani yeecha yaalagira esigaari syeeme, mani bombi beemao beeha aasi baacha mu maachi, Filipo alala nende omulade wula, mani yamala yamubatiisa. 39Mani nibeecha bombi batula mu maachi, Mwooyo w'Omwaami yeecha yabukula Filipo; mani omulade oyo haba siyanyala ohumubonaho handi, mani yeecha yachaaka ohwewerawo niyehoya. 40Nae Filipo yeecha yabonehanira naali mu Asootu, mani nachiiririra nende olukeendo lwae, yeecha yayalaanga Emboosi Ndai eyiri ebiko byoosi ohwoola luyoola e Kaisarea.

will be added

X\