EBIHOLWA 7

1Mani omulaamisi muhuluundu yeecha yaboola ati, “Hane siri sityo?” 2Nae Sitefwano yaboola ati, “Basyaange nende ba laata yange, mutekeerese. Nasae w'oluyaali luhoongo muno, yabonehera Yibbulaimu seefwe, niyali naali mu Mesopotamia, nateecha yamenya mu Harani 3mani yamuboolera ati, ‘Tula mu syalo syao nende mu banaluya bao, mani omale ochie mu syaalo siinjia ohuhweekesa.’ 4Mani yeecha yaatula mu syaalo sy'Abakaludaayo, mani yaacha yamenya mu Harani. Mani lunyuma lwa simwaana ohufwa, Nasae yeecha yamutusa awo, yaamuleeta mu syaalo sino simumenyeremo bulaanu; 5nae haba siyamubaaho obusiha bwoosi mu bweene muno, kata busa obuleeyi bwaaka nende efuuti ndala yong'ene, nae yalaka ohusimubeeresa sibe esyae alala nende olwiibulo lwae olwiicha-nyuma, kata nende niyali nataali nende omwaana. 6Handi Nasae yalomaloma nasilala atyo, ati olwiibulo lwae luno lucha ohuba olukeni mu syaalo sy'abandu bandi busa, abacha ohubeekalira bababoniabonie, emyaaka emia chine emilaamba. 7Handi Nasae yaboola ati, ‘Nae njia ohuheengera omusango esyaalo esyo sibachia ohuba nibasihalaabanira batyo, mani lunyuma lwesyo, bacha ohutulamo mani beeche baanyinamire mu sifwo syeene sino.’ 8Mani Nasae yeecha yabeeresa Yibbulaimu embuliirisania y'ohuhebwa. Mani Yibbulaimu yeecha yaaba simwaana Yisaka, mani yamala yaamuheba hu ludaalo lwa chitaanu-na-chidatu; mani Yisaka yeecha yaaba simwaana wa Yakobbo, mani Yakobbo yaaba owa ba kuuka yeefwe bahuluundu ehumi-na-babiri. 9“Mani bakuuka yeefwe abo, ehali-hali nilyabadiirira Yosefu, beecha bamukusa mu Misiri; nae Nasae yaba nae, 10mani yeecha yamuwonia yamutusa mu buchuuni bwae bwoosi, mani yamala yaamuheera, yamuba amakesi maangi muno mu moni wa Faraao, omutuki wa Misiri, oweecha yaamuhola yaaba Gafana wa Misiri, handi ow'edaala lyae lyoosi. 11Bulaanu esiminyu syeecha syakwaao mu Misiri mwoosi nende mu Kanani, nende obudinyu bungi muno, mani ba seefwe abo beecha baahaywa ohunyoolaho esy'ohulya syoosi. 12Nae Yakobbo niyeecha yawulira ati emere yali niyiri mu Misiri, yeecha yaatuma ba kuuka yeefwe abo ehabi litaangira. 13Mani hu lukeendo lwaabwe lwohubiri, Yosefu yeecha yeyanjula eyiri ba mwaanang'ina abo, mani olwaanyi lwa Yusufu lweechula lwamanyihana eyiri Faraao. 14Mani Yosefu yeecha yaatuma yalaanga Yakobbo simwaana, nende abanaluya bae boosi, abandu amahumi kataanu-na-kabiri; 15mani Yakobbo yeecha yehirira yeecha mu Misiri. Mani yeecha yaafwa, omweene alala nende ba seefwe abo boosi, 16mani beecha bakiingwa baakalusibwa engo e Sekemu mani basiihibwa mu ng'ani yi Yibbulaimu yali yakula obuungi bw'eseende ch'efeesa chiyatusa hu basyani ba Hamori mu Sekemu bweene omwo. 17“Nae koti lu siha syalakwa nisyali nisisuda aambi ohwoola, si Nasae yali yadiisa Yibbulaimu, abandu abo beecha bachaaka ohwemeeda mu muno, nende ohwingiya nibali mu Misiri 18ohwoola lu mutuki wundi we Misiri yeecha yaatulayo owali nataamanyire Yosefu. 19Yecha yasaandia oluyia lweefwe olwo muno, yayikaanga ba seefwe abo ohusukunaanga abaana badoto baabwe, nadaha babaawo abalamu. 20Esiha sino nisyo si Musa yebulirwamo, mani yeecha yaaba omulai muno mu moni wa Nasae. Mani yeecha yahusirwaho mu nyumba ya simwaana hu lwembaka y'emyoosi chidatu chong'ene; 21mani niyamala ohusukunibwa, omuhaana wa Faraao yeecha yaamudoola mani yamala yaamuhusa koti omusyaani wae mweene. 22Mani Musa yeecha yakerakirwa nende amakesi koosi akali kahoyera Abamiisiri, mani yeecha yaaba nende enomanoma alala nende ebiholwa bihunuufu muno. 23“Niyoosa emyaaka ch'obuhuluundu amahumi kane, yeecha yahengawo mu mwooyo kwae ohuchia ohukeniya abaana ba Yisirayiri abali abanaluya bae. 24Mani niyabona mulala hwaabo naali ohusaandisibwa, yeecha yaamuhoonya mani yesasusa mu hubbenguula omusaacha Mumisiri, mani yamwitirawo. 25Yecha yasiyira ati Abayisirayiri baasye bali nibacha ohumanya bati hane Nasae niye owali naali ohubanunula nende omuhono kwae, nae haba sibamanya batyo. 26Handi nibwahya oludaalo luloondaho, Musa yeecha yeecha yibali mani yakaana Abayisirayiri abo nibali ohusoolanaanga, mani yahengawo ohubakaya nababoolera ati, ‘Basaacha eng'we, ngandi muli abebulaane, mani lwasiina muli ohunyoolesanianga abeene-na-beene?’ 27Nae omusaacha wali naali niye oli ohukoseraanga owaasye yeecha yaasindiha Musa endulo namuboolera ati, ‘Ewe Musa, naanu mweene ohubekereo ohuba omwemeresi weefwe, handi ohuba omukayi weefwe? 28Ewe oli ohudaha ohunjita koti luweetere Omumiisiri wula ekulo?’ 29Musa niyawulira sino, yeecha yeruha, mani yaacha yekisa musyaalo sya Midiani, yiyeecha yebulira abana basyani bae babiri. 30“Mani emyaaka amahumi kane nicheecha chaabitawo, malaika yeecha yaamubonehera naali mu sichiimi esy'Olugulu lwa Sinai, naali mu muliro kwaaduha mu sichaha. 31Mani Musa niyeecha yabona atyo, yeecha yawuka muno emboneha eyo; mani niyali hwasuda aambi ohwehaliirisa, ekono ly'Omwaami lyeecha lyawuliirihana liti, 32‘Nise Nasae wa ba lataao, Nasae wa Yibbulaimu nende Yisaka nende Yakobbo.’ Mani Musa yeecha yateenga muno mani byamuhaya ohwehaliirisa bulai. 33Mani Omwaami yeecha yamuboolera ati, ‘Fwalulamo ebiraato ebyo mu makulu kao ako, olwohuba esifwo siwemeremo esyo, syolerefu nisyo. 34Mubwadyeeri bweene, ese malire ohubonera elalira ohusaandisibwa hw'abandu bange abali mu Misiri, handi nende ohuwulira ohwelira hwaabwe, mani njihira aasi ohubawabina. Mani ewe bulaanu yicha, njia ohuhutuma ochie e Misiri.’ 35“Musa wuno, niye yi bandu Bayisirayiri bali bebwaaba nibaboola bati, ‘Ewe naanu mweene owahubeka ohuba omwemeresi handi omukayi?’ Niye yi Nasae mweene yeecha yaatuma ache abe omwemeresi handi omununuli niyehoonyera omuhono kwa malaika wula owamubonehera naali mu sichaha. 36Musa oyo yeecha yaabemirira yabatusayo, naamalire ohuhola ebyaamayia biingi muno nende obulolero bungi muno mu Misiri nende hu Nyaanja Njahanyu, handi nende mu sichiimi ohumala emyaaka amahumi kane. 37Musa wuno niye oyo oweecha yaboolera Abayisirayiri ati, ‘Nasae achia ohubasingisira omunabbi ohutula mu bebulaane beeng'we beene koti lu yasingisa ese.’ 38Wuno niye omweene oyo owali mu mukaanda kwali mu sichiimi alala nende malaika oyo owamulomalomera hu Lugulu lwa Sinai, handi nende ba seefwe; handi niye oyo owadiiswa amalako malamu ohutubeeresa. 39Ba seefwe abo beecha baahaya ohumuwulira, nae bamusiindiha busa endulo, mani beecha mu myooyo chaabwe beecha bachuuha baachitingaasa e Misiri, 40nibaboolera Arooni bati, ‘Ewe tuholere ba nasaye banatwimirireenge; olwohuba Musa wuno owatwiimirira ohutulira elalira mu syalo sya Misiri, efwe hukoterwe esimweholeeheho.’ 41Mani beecha baahola emoosi mu ndaalo echo, mani beemao bachaaka ohutusira ebiyaanwa esilongwaloongwe esyo, handi bamala bachaaka ohwehoyera emirimo ch'amahono kaabwe echo. 42Nae Nasae yeecha yeecha yabakaluhania, mani yabachoomya ohwiinamiraanga ebilongwalongwe by'akulu, koti busa lubyandiikwa mu sitabo sy'abanabbi biti: ‘Mani mwambeeresangaho ebisolo siinjirwe alala nende ebiyaanwa, emyaaka amahumi kane cho nimuli mu sichiimi, Aaa, eng'we enyumba ya Yisirayiri? 43Mani mweecha mwakiinga eyeema lya Molechi nasaye, nende ening'ining'i ya Refani nasaye, ebifwaanani ebyo bi mweecha mweholera ohubiinamiraanga; mani ese njia ohubamalao mbayire eyale ohuba e Bbabbilooni.’ 44“Baseefwe beecha baaba nende eyeema lya Nasae mu sichiimi, koti lwooyo owalomaloma nende Musa yali yamubaliirira koti lwahoyeere ohulihola libe, ohuchiana nende omusono kuyali abweeneho omweene. 45Baseefwe bosi batyo, beecha balingisa nende Yoswa nibali nibamalire ohwirusa mu byaalo abandu beenebyo koti lu Nasae yabasukunaanga erwaanyi mu moni wa baseefwe, mali abeene nibamalire ohubimenyamo. Mani byali busa bityo ohwolera elalira mu ndaalo cha Daudi, 46Daudi niyeecha yanyoola ohudahibwa muno mu moni wa Nasae, mani yeecha yaasaba ohulehwa anyale ohunyoolera Nasae wa Yakobbo oyo obumenyo bwomiifu. 47Nae syeecha syaaba mbwe ni Solomooni niye owanyala ohwombahira Nasae oyo enyumba. 48Abyahaba mbwe Oyo owa Akulu Bweene haba saamenyaanga mu mayumba koombahiibwe nende amahono busa; koti lu munabbi wundi aboola ati, 49‘Ekulu nilyo esisaala sy'obutuki syaange, nae esyaalo nisyo esiteeni singeeng'aho amakulu kange. Nyumba siina yeene yi ewe onyala ohunyombahira, Omwaami aboola, oba sifwo siina syeene esyahaba simbuluhiramo? 50Si mahono kange keene akahola ebiindu bino byoosi?’ 51“Eng'we abandu baangalafu amakosi, abatahebebwa mu myooyo, nende amatwi, mwamenya nimuhalaandanira Mwooyo Mwolerefu. Koti lu baseeng'we bahola hale, nilwo lu mwesi muli ohuhola busa bulaanu. 52Munabbi siina mweene yi baseeng'we bahayaho ohusaandyaanga? Handi betaanga abo abalangiriraanga hale-hale ohwiicha Hwoyo Omulungifu, oyo yibulanu mwaliiremo olukwe handi mwamala mweta, 53eng'we beene abadiiswa amalako koti lukaleetwa nende bamalaika mani mwahaya ohukadiira.” 54Bulaanu, abandu abo nibeecha baawulira ebiindu bino byoosi, beecha baaniinibwa etima liingi muno, mani beecha bachaaka ohumulumira ebyaasa byaabwe. 55Nae omweene, niyechuule Mwooyo Mwolerefu, yadangaalira emoni chae Mukulu, mani yeecha yabona oluyaali luhoongo lwa Nasae, nende Yesu niyeemere hu muhono muluungi kwa Nasae; 56mani yeecha yaboola ati, “Boneho, ndi ohubona Ekulu nilikuulwe, handi nende Omwaana w'Omuundu niyeemere hu muhono muluungi kwa Nasae.” 57Nae nabo beecha bachaaka ohulira mu kono hoongo muno handi nende ohusiiba amatwi kaabwe nende ohwiruhira alala boosi nibamuchoomere. 58Mani beecha bamusukuna erwaanyi w'esiko sihuluundu esyo, mani nibamala nibamuhubba amakina ohumwiita; nae abajulisi beecha baatechaanga engubo chaabwe mu makulu k'omusyaani muraanga olaangwa mbwe Saulo. 59Mani koti lubali nibali ohuhubbaanga Sitefwano nende amakina, omweene nae yali naali busa ohwekongoyaanga ati, “Omwaami Yesu, bukula omwooyo kwaange.” 60Mani Sitefwano yeecha yaasigama aasi, mani yaalira nende ekono hoongo muno naboola ati, “Omwaami, otababaliraho esibi sino daawe.” Mani niyali niyahamala ohulomaloma atyo, yeecha yaakona endoolo.

will be added

X\