EBIHOLWA 6

1Bulaanu endaalo chino, abeeki nibachaaka ohwemeeda ohwingiya mu bungi, Abayudaaya balomalomaanga oluyonaani bachaaka ohwekanyiisa Abayudaaya beene bati abahasi bafwiirwe baabwe bali nibalehebwaanga nibatabeereswa obuhoonyi bwakabibwanga. 2Mani abeeki ehumi-na-babiri abo beecha balaanga omukanda kwa abeeki boosi mani bababoolera bati, “Haba sisihoyera efwe ohulehuulira ohuyalaanga emboosi ya Nasae handi huchaake ohukabaanga abandu ebiindu by'obuhoonyi. 3Mani sakira basyaange, mwedoolemo abasaacha bataanu-na-babiri abali nende ebiima bilai, abechula Mwooyo alala nende amakesi, bahuhoyeere ohubeeresa omulimo kuno. 4Nae hweweyo nende omwooyo mulala hwedeeke ohwekongoyaanga Nasae alala nende ohuyalaanga emboosi ya Nasae.” 5Mani ebiindu bibaboola ebyo byoosi byeecha byasangaasa abandu abo boosi, mani badoola Sitefwano, omusaacha wali niyechula efukiirira alala nende Mwooyo Mwolerefu, alala nende Filipo, alala nende Purochoora, alala nende Nikanoori, alala nende Timoni, alala nende Palumena, alala nende Nikola, Omuyonaani wali natula mu Atyoko niyakaluhanisibwa yaaba Omuyudaaya. 6Abandu bano beecha bateebwa mu moni w'Abatume, mani beecha baabekongooyera eyiri Nasae, mani bamala baabeesaho amahono kaabwe. 7Mani emboosi ya Nasae yeecha yemeeda ohusasaana; mani obuungi bw'Abeeki bweecha bwengiya muno mu Yerusaalemu, mani okunabuungi kw'abalaamisi kweecha kwosi kwesa oluyaali mu fukiirira yino. 8Mani Sitefwano, niyeecha yechula esisa siingi alala nende amaani, yeecha yahola ebiindu by'amaya ebihuluundu muno, alala nende obulolero mu bandu abo. 9Mani bulaanu, abandu bandi bali abomu Sinagoogi y'abandu Baboolole (koti luyali niyilangibwa), alala nende eya Abasireeni, alala nende Abalekisandariya, alala nende abandu batula mu Silisia alala nende Asia, basiingira bachaaka ohuyingana nende Sitefwano. 10Nae haba sibanyala ohuyingania amakesi alala nende Mwooyo bi Sitefwano yehoonyeraanga naalomaloma nabo. 11Mani bachaaka ohuserera abasaacha bandi mu bweekisi baboole bati, “Humuwuliire naalomaloma emboosi chifwoola Musa alala nende Nasae.” 12Mani beecha basangulusa abandu boosi alala nende abahuluundu b'enjia, alala nende abekesa b'amalako ka Musa, mani boosi beecha bamukwaaho bamudiira, mani bamala bamuleeta mu moni w'esiina, 13mani bamala bataawo abajulisi b'obubacha ababoola bati, “Omusaacha wuno yalumiirira obutayeera ohulomalomaanga emboosi mbi hu sifwo syolerefu sino alala nende amalako ka Musa; 14olwohuba efwe humuwuliraanga naboola ati, Yesu wa Nasareti wuno achia ohusihirisa esifwo sino, handi achia ohukaluuhania emiduunga chi Musa yatudiisa.” 15Mani abandu boosi abali mu siina omwo nibali nibamuhang'asiireho emoni chaabwe, babona bati obweeni bwae bwali nibufwaana koti obweeni bwa malaika.

will be added

X\