EBIHOLWA 5

1Nae omusaacha olaangwa Ananiya, alala nende omuhasi wae Safira, beecha baakusa oluwaande lw'ebiindu byaabwe. 2Mani nibamala ohuwuliirisania nende omuhasi wae oyo, omusaacha oyo yeecha yahayiraho hu seende chatula mu biindu bibali bakusire, mani yayira esituundu busa syong'ene, mani yaasita mu makulu k'Abatume. 3Mani Peetero yeecha yaboola ati, “Ewe Ananiya, lwasiina Sitaani ahuchuubire obwakiire awo ohubacha Mwooyo Mwolerefu, nende ohuhayira hu situundu sy'eseende chitulire mumukuunda kwao? 4Nikwabeere nikutaakusibwa, haba sikwali nikuli busa okwao kweene? Handi nikwali nikumalire ohukusibwa, haba sikwali nikusisiiri mu bunyala bwao? Mani sibeere sitye ewe handi ewe ohwoola ohuheengao ohuhola esiholwa sino mu mwooyo kwao? Mani ewe haba sobachire abandu busa, nae obachire Nasae.” 5Mani Ananiya luyawulira busa emboosi chino, yakwa busa aasi mani yaafwa. Mani obuti bungi muno bweecha bwadiira abandu boosi abasiwulira. 6Mani abasyaani baraaga beecha basiingira mani bamuboya bulai bweene, mani bamala bamukiinga bamutusa erwaanyi, bamala bamusiiha. 7Oluunyuma lw'obweyaango bumala aambi w'esaa chidatu enaamba, omuhasi wae yesi yemawo yeecha natamanyireho esyali nisiholehaane syoosi. 8Mani Peetero yeecha yaamuteeba ati, “Ewe mboolereho nimukusire omukunda okwo hu seende chino chiti.” Nae yamukobolamo ati, “Eee, chaakire busa chityo.” 9Nae Peetero yeecha yaamuteeba ati, “Siina syeene esikerere mwafukiirisania alala ohuhema Mwooyo w'Omwaami? Era mbawo, amakulu k'abandu basiihire wamwo kamalire ohwoola hu mulyaango, mani handi kacha ohukiinga wesi kahutuse muno.” 10Abweene awo, omuhasi oyo yakwa aasi mu makulu ka Peetero, yamala yafwa. Mani abasyaani baraaga bala nibengira busa bati, banyoola omuhasi oyo naamalire ohufwa, mani bamala bamukiinga bamutusa erwaanyi, mani baacha bamusiiha endulo wa wamwe. 11Mani obuti bungi bweecha bwadiira abaloondi ba Kristo boosi, handi nende abandu boosi abawuliraanga hu biindu bino. 12Bulaanu, Abatume beecha baahola obulolero bungi muno, alala nende ebiwukisa. Abaandu boosi bali nibali alala mu siseenge sya Solomooni. 13Abulao omuundu wundi yeesi owadahaanga ohubeyambaaniaho, nae bababeresaanga busa oluyaali luhoongo muno. 14Nae abandu bemeeda busa ohweyambaania hu Mwaami ohuhiraho endaalo chiindi choosi, ebidiyiha by'abasaacha alala nende abahasi, 15ohwoola lu bandu bachaaka ohukingaanga abalwaaye nibabatusa mu mayumba nibabata hu ngira, nibabaalise hu bitaanda byaabwe alala nende hubutalihe bwaabwe, nibaboola bati, koti lu Peetero yali niyeecha naabitira, esiniha syae sinyale ohwegeeng'aangaho hu balwaaye bandi. 16Abandu bandi bosi beecha bebuusaanga alala nibatula mu biko bisibiraane nende Yerusaalemu, nibaletaanga abalwaaye alala nende abo boosi abalichingi nibaseeterwe nende emyooyo mibi, mani boosi beecha baonisibwaanga. 17Nae omulaamisi muhuluundu yeecha yaasingira alala nende abo boosi bali awo nae boosi, esikaanda sya Abasadukaayo nibechuule ehali-hali, 18beecha badiira Abatume abo bamala baabata mu mboyero eyabuli muundu yeesi. 19Nae nibyoola esiro, Malaika w'Omwaami yeecha yekula emilyaango ch'ejiela eyo, mani yamala yabatusa erwaanyi mani yaboola ati, 20“Muche mani mweeme mu nyumba ya Nasae, mani muboolere abandu boosi emboosi chino ech'Obulamu Buyaaha.” 21Mani Abatume nibeecha bawulira batyo, beecha bachaaka ohwingiraanga mu nyumba ya Nasae buli chuli nibeekesa abandu buli buhya. Nae bulaanu, omulaamisi muhuluundu alala nende abandu bayali ali nabo, beecha balaanga esiina syoosi syeecha syehala alala nende abahuluundu ba Yisirayiri boosi, mani baatuma omunwa mu mboyero bati babaleete beehaswe. 22Nae abahuluundu b'ejiela nibeecha, haba sibabakaana mu mboyero eyo daawe, mani beecha bakobola baboola batyo koti lubabweene bati, 23“Efwe hwakaanire ejiela niyikaalwe bulai bweene handi buli muliindi niyeemere hu mulyaango kwae, nae nihwikuuleo, haba sihwakaanire omuundu yeesi haba.” 24Mani bulaanu, omuhongo w'enyumba ya Nasae, alala nende abalaamisi bahuluundu beecha bawulira emboosi chino, beecha baatya muno abandu bano, nibakanakana yi biindu bino bicha ohwoola. 25Nae omuundu wundi yeecha busa yababoolera ati; “Abasacha bala bamwaata mu mboyero, ngandi mbala beemere mu nyumba ya Nasae mani bali ohweekesa abandu emboosi chaabwe busa.” 26Bulaanu, omuhongo w'enyumba ya Nasae alala nende abahuluundu abo, beemao baacha badiira Abatume abo, bamala baabaleeta nende omuleembe, olwohuba bali batiire bati abandu bandi bali bacha ohubahubba amakina. 27Mani nibaba nibamalire ohubaleeta, beecha baabemesa mu moni w'esiina. Mani omulaamisi muhuluundu yachaaka ohubateeba, 28naboolaanga ati, “Efwe hwabahuutira huti haba simuhoyeere ohweekesa mu liita lino, nae boneho bino biti, eng'we mumalire ohwichusa Yerusaalemu yoosi nende enjekesa yeeng'we eyo, handi muli ohuchiiririra ohutuleetaho amabaanga k'omuundu kabe hweefwe.” 29Nae Peetero alala nende Abatume abo beecha bakobolamo bati, “Efwe huhoyeere ohutya Nasae ohuhira ohutya omuundu busa. 30Nasae wa baseefwe oyo niye owasyuusa Yesu oyo yimweeta nimumwaniihe hu musaala. 31Nasae mweene yeecha yaamuhusa yamuta hu muhono kwae muluungi yaaba Omwimirisi handi Omuwonia, huyeemeo anyale ohubeeresa Abayisirayiri omukisa kwohweyolobya, nende ohuleherwamo ebibi. 32Mani efwe huli abajulisi ba ebiindu bino byoosi, koti busa lu Mwooyo Mwolerefu yesi ali, oyo yi Nasae yamala ohubeeresa abo boosi abamwisamo oluyaali.” 33Nae abo nibamala ohuwulira batyo sino, beecha baniinwa nende elalu ly'etima mani baaona ohwiita abandu bano boosi. 34Nae kata katyo, Omufalisaayo wundi owali mu siina esyo, olaangwa mbwe Gamalieli, handi owali omweekesa w'amalako ka Musa, mani owali yesibwamo oluyaali luhoongo nende abandu boosi, yeecha yaasingira yeema, mani yamala yaalagira ati abasaacha abo boosi mberi batusibweho erwaanyi budiidi. 35Mani omusaacha oyo yeecha yemawo yaboolera abandu abo boosi ati, “Eng'we abebulanwa ba Yisirayiri mweesi, mweliinde bulai bweene, esiindu syoosi simudaha ohuhola abasaacha bano. 36Olwohuba mu ndaalo cheene chino enyuma hooho eyo, yasikuuheyo omusaacha wundi olaangwa mbwe Tawuda niyeyekesera elalira omweene mbwe niye omuundu mweene liita, mani abandu bandi hooho, aboola koti emia chine chiti, beecha bamweyambaaniaho; nae lunyuma omusaacha mweene oyo yeecha yetibwa busa, mani abandu bala boosi abali nibamuloondere, beecha basalaana beemao bakotera elalira bati koto. 37Lunyuma lwooyo ohumala atyo, Yuda Omugalilaaya yesi yeecha yaatulayo, mu ndaalo chohubaliramo abandu, mani yesi yeecha yebuusiraho abandu bandi yaacha nabo; yesi nasilala atyo, yeecha yahamyuhawo busa, mani abandu bali bamulondere boosi bosi beecha basalaana busa. 38Mani sakira hu habi lino ese ndi ohubaboolera endi, mutule hu basaacha bano, mubalehe buleha bong'ene; olwohuba nikali mbwe etekeha yino, oba omulimo kuno kwabandu-buundu, kucha ohufwa bufwa; 39nae nikali mbwe kwa Nasae mweene, kali mbwe eng'we haba simuchia ohunyala ohubayiingira daawe. Olundi awundi eng'we beene ning'we abacha ohubonehana koti abali ohuyinganianga Nasae mweene!” 40Mani abandu abo boosi beecha badiira engeraka yae eyo, mani lunyuma lwohulaanga Abatume abo ohwingira mu siina, baheengawo ohubahubbaho chibooko nibamala babahuutira obutemeeda ohulomalomaanga mu liita lya Yesu, mani baamala baabalehuula bawaao. 41Mani Abatume abo boosi, beemao basiingira baatula, mu siina, nibehoya olwohuba hane bali bayiriibwe koti abahoyera ohujaarwa nende ohuboneresebwa hulwa eliita elyo. 42Mani ohuchaakira elalira ohutula hu ludaalo olwo, oba nibali mu nyumba ya Nasae oba mu madaala busa, haba sibaleheraanga ohweekesa alala nende ohuyaala Yesu koti lwali niye Kristo.

will be added

X\