EBIHOLWA 3

1Olwoola, Peetero nende Yowaana bali bacha mu nyumba ya Nasae, esaa chitanu-na-chine esiha sy'ohwekongooya. 2Mani niboola hu siruwa sy'enyumba ya Nasae esilaangwa siti Esiruwa siroonyo, babukaanawo omusaacha walema ohutula mu budoto bwae nasabirisaanga. 3Niyabona busa ati, Peetero nende Yowaana nibengira busa bati mu nyumba ya Nasae, yabasaba obuhoonyi. 4Nae Peetero nende Yowaana beecha bamutingaala tiiri mu moni, mani Peetero yamuboolera ati, “Tutingaale.” 5Mani yeecha yabahayisiraho emoni, nabaasa ati bacha ohumubaaho esiindu. 6Nae Peetero yeecha yamuboolera ati, “Ese mbulaho kata efeesa oba esaabbu, nae njia ohuhubeeresa esiindu siindi nasyo; mu liita lya Yesu Kristo Omunasareeti, siingira okeende.” 7Mani yeecha yaamudiira omuhono muluungi mani yamusingisa; mani abweene-na-bweene awo, amakulu kae alala nende ebiseenero byae byeecha byomiira. 8Mani yeecha yaduuma yema mani yachaaka ohukeenda mani yengira mu nyumba ya Nasae alala nende Peetero nende Yowaana, mani yakeenda natuumakala naakinia Nasae. 9Mani abandu boosi bamubona nakeenda handi naafumia Nasae, 10mani beecha baamanya bati niye owehalaanga nasabirisa hu Siruwa Siroonyo sy'enyumba ya Nasae; mani beecha bawuka handi besinduha muno hulwebiindu byali bimweholehaneho 11Omusaacha oyo niiyali nasyomeere hu Peetero nende Yowaana, abandu boosi bawuka beeruha beecha yibali mu siseenge silaangwa esya Solomooni. 12Nae Peetero niyabona atyo, yeecha yaboolera abandu ati, “Eng'we Bayisirayiri basyaange, lwasiina sino sibawukisa, oba lwasiina mutudangaaliireho, muti fwaana niifwe abakerere omusaacha wuno yakeenda hulw'amaani keefwe abeene oba hulw'obwolerefu bwefwe abeene? 13Nasae wa Yibbulaimu nende Yisaka nende Yakobbo, Nasae wa bakuuka yeefwe, niye owaberesa Yesu omuhalaabani wae oluyaali. Oyo yimwawayo handi mwamwekaana mu moni wa Pilaato, owali naheengereo ohumulehuula. 14Nae eng'we mwekaana Oyo Omwolerefu handi Omulungifu mweene, mani mwasaba babalehuulire omwiiti. 15Nae eng'we ning'we abeeta Omweene bulamu, yi Nasae yasyuhisa ohutula mu bafu. Niifwe abajulisi ba sino. 16Olwohuba eliita lyae, nende ohufukiirira mu liita lyae, nibyo ebikerere omusaacha wuno yimubona handi yimumanyire yanyoola amaani; handi efukiirira mu Yesu niyo eyikerere omusaacha wuno yaaba omulamu mweene koti lu mweesi mubona. 17“Mani bulaanu basyaange, manyire endi mwasihola mubutamanya, koti lu batuki beeng'we bosi bahola. 18Nae, esyo si Nasae yalomalomera hale mu banabbi boosi, ati Kristo wae ahoyeere ohusaanda, yasyoseresa abweene atyo. 19Sakira mweyolobye ebibi byeeng'we, mukaluhe eyiri Nasae, hu bibi byeeng'we binyale ohusangulwao, mani hu biha byohwekobosa buyaaha bibecheere nibitula eyiri Omwaami, 20mani abatumire Kristo yiyabadoolera, oli Yesu. 21Yesu oyo niye ohoyeere ohuba Mukulu yi ohwolera elalira hu biha byeebyo byoosi bi Nasae yalomalomera mu banabbi bae boolerefu boosi ohutula hale byaholerere. 22Olwohuba Musa yaboola ati, ‘Omwaami Nasae weng'we achia ohubatumira omunabbi otula mu bandu beeng'we koti luyanduma. Muhoyeere mumuwulire mu buli siindu syababoolera. 23Mani omuundu yeesi otahawuliire emboosi ch'omunabbi oyo, achia ohutusibwa mu bandu mani asihirisibwe.’ 24Mani abanabbi boosi abalomaloma hale, ohutulira elalira hu Samueli nende abamulondaho, bosi balomaloma ebidiira hu ndaalo chino. 25Eng'we ning'we abana ba banabbi handi abelakano li Nasae yabeeresa bakuuka yeeng'we naboolera Yibbulaimu ati, ‘Njia ohuberesa ehabi abandu b'ohusyaalo syoosi nimbitira mu lwiibulo lwao.’ 26Mani Nasae niyamala ohudoola omuhalaabani wae, yataangira ohumutuma eyiri eng'we, ohubabeeresa ehabi naakaluhaania buli muundu hweeng'we ohutula mu ngira cheeng'we mbi.”

will be added

X\