EBIHOLWA 28

1Nihwali nihumalire ohuwona, hwecha hwanyala ohumanya huti, hane esisiinga esyo syali silaangwa mbwe Malita. 2Handi abebulanwa bohubweene ohwo beecha batwekesa esisa sihutabonaangaho, olwohuba beecha banyala ohutwadusira omuliro kw'ohwoota handi batubukaanira fweesi bulai muno, olwohuba efula yali niyichaakire ohukwa mani emboo yali enyiingi muno. 3Paulo yali nanyalire ohuteenya oluhanya lw'ehwi naamalire ohuchita mu muliro, mani endemo niyeecha yachituliramo hulw'obubafu hw'omuliro, mani niyimala niyimweboya hu muhono kwae. 4Mani abebulanwa abo nibeecha baabona esisuku esyo nisideembera hu muhono kwae, beecha bachaaka ohuboolanira buli muundu owaasye bati, “Abulao ohukana-kana, omuundu wuno n'omwiiti w'abandu niye. Ayahaba naonere enyaanja, obwaakanirisi haba sibuchia humukanya abeewo omulamu daawe.” 5Nae omweene kata katyo, yeecha yasisimulira mu muliro okwo mani syahaya ohumuholaho esidinyu syoosi. 6Nabo baba awo nibaliindiriire bati awundi achia ohufwiimba oba ohukwa busa nafwiira abweene awo; nae nibaba nibamalire ohuliinda hulw'embaka ndeeyi muno, nae nibahayire ohubonaho esidinyu syoosi nisimukwiireho, beecha bakaluhania ebibaaso byaabwe mani bamala baboola bati, yali naali nasaye busa. 7Nae bulaanu aambi w'esifwo esyo, yaliwo amaloba kali nikali akeene muhuluundu w'esisiinga esyo, olaangwa mbwe Pubiliusi, oweecha yatubukaanira handi yamala yatusangaasanga natuliisa hulw'endaalo chidatu enaamba. 8Syeecha syaaba mbwe simwaana Pubiliusi wuno yali nalwaala omuyaka handi nanyalala; mani Paulo yeecha yamukeniya mani yamwekongooyera Nasae, mani niyali namwisaho amahono kae, yeecha yaanyala ohumuwonia. 9Mani sino nisyali nisimalire ohuholehana, abandu badong'ereyo boosi abali nibamenya hu sisiinga ohwo, abali nibali nende obulwaae bukabuhaane bosi beemao bachaaka ohwichaanga nibaonisibwa. 10Beecha batubeeresa ebiyaanwa biingi muno; mani nihwali nihusyaabala nihuwaao, beecha baata mu meeri ebiindu bihwali nihudaha byoosi. 11Lunyuma lwohumala emyoosi chidatu emilaamba, hwecha hwaheengao ohusyabalira mu meeri yali niyeyikaame endaalo ch'emboo hu sisiinga esyo, emeeri yali ey'Alekisaandaria, niyiri nende obwandiike buboola mbwe 'Banasaae Banabahwana.' 12Nihwoola mu Sirakuuse, hwecha hwamala awo endaalo chidatu enaamba. 13Handi ohutula abweene awo, hwecha hwehuyuunga hweemao hwoola mu Regiamu; mani lunyuma lwohumala oludaalo lulala lwong'ene, buyanja kutulira emwaalo kuchaaka ohuwuucha, mani hu ludaalo lwohubiri hwecha hwanyala ohwoola e Puteoli. 14Nihwoola eyo hwecha hwabukaana abafukiiriri baasyeefwe abangi muno, mani beecha batulangaanga ohubakeniya nihumenya nabo, hwamala endaalo chitaanu-na-chibiri enaamba. Mani hutyo nilwo luhwoolera e Roomu. 15Mani abaasyefwe bali nibali eyo, nibeecha bawulira akatudiiraho, beecha batukoonya ohwolera elalira mu Muhung'aano kwa Apiusi nende Enyuumba Chikonwamo Chidatu ohubonana busa naafwe. Mu hubabona busa, Paulo yeecha yebasa muno Nasae, mani yamala yomisibwa muno omwooyo. 16Mani nihweecha hwoola mu Roomu, Paulo yeecha yafukiirirwa ohumenya yeng'ene, nende omusikaari mulala yeng'ene owali naamulindaanga. 17Lunyuma lw'endaalo chidatu, Paulo yeecha yalaanga yabuusa abemeresi b'abandu babuli ludaalo Abayudaaya; mani nibaba nibamalire ohwebuusa, yeecha yachaaka ohubaboolera ati, “Basyaange, kata andahaba nindali nitaholaho abandu esiindu syoosi, oba emiduunga cha baseefwe, kata katyo ndoola ndaleetebwa koti omuboye ohutula mu Yerusaalemu mu mahono k'Abaroomu. 18Mani nibamala ohumbosesa, beecha babona bati syahabeere esilai nimba nindalehuulwa, olwohuba yabulawo esifune syoosi esihoyera ohutungwa nende ohufwa mu musaango kwaange. 19Nae mani Abayudaaya nibeecha bakaana, byeecha byanjika ohujulira Kaisaali--andahaba mbwe sindali nende omusango kwoosi kunyala ohwekanyiisa hu syaalo syeefwe sino. 20Mani hu sifune syeene sino sakira ese ndahire ohubabona mani male nomalome nang'we, koti lu siri mbwe ohweema hu suubi lya Yisirayiri elikera nimboyeebwe nende olunyororo luno.” 21Nabo beecha bamuboolera bati, “Efwe husisiiri ohunyoolaho ebbarwa yoosi ohutula mu Buyudaaya eyihudiiraho, handi abulao mulala hu basyeefwe bechaanga eno owahuwabiraho oba yahulomalomaho esiindu sibi syoosi. 22Nae kata katyo, efwe hudaha ohuwulira ohutula hwewe omweene, ebibaaso byao koti lubiri; olwohuba ohweema hu mukaanda kw'ediini kuno, hu manyire huti buli abundu woosi kuli ohulomwalomwaangaho bubi.” 23Mani nibaba nibamalire ohumutekehera oludaalo lwae, beecha bakobola yaali, abundu yiyali niyamenya nibali abangi muno. Mani yeecha yatotola esifune syae bulai yibali ohutulira elalira echuli, ohwolera elalira engoloobe, niyomisaanga ebidiira hu bwaami bwa Nasae handi nateemaho ohubaserera bafukiirire akadiira hu Yesu ohutulira elalira mu kali mu malako ka Musa ohwoolera elalira hu kali mu banabbi. 24Mani abandi beecha banyala ohwikuswa bulai nende ako kayali naababoleere, nae abandi nibahayuha busa. 25Mani sakira, koti lu bachaaka obutawuliirisania mu beene, beemao basalaana, lunyuma lu Paulo yaboola esiindu silala ati: “Mwooyo Mwolerefu hane yali owadyeeri niyaboolera baseeng'we nabitira mu Yisaaya omunabbi ati: 26‘Cha eyiri abandu bano mani oboole oti, Mucha mu bwadyeeri bweene ohuwulira busa, nae haba simulimanya daawe, handi mu bwadyeeri bweene mucha ohutingaalaanga busa, nae haba simwingisa daawe, 27Olwohuba omwooyo kw'abandu bano, kwamala ohuwumumala, handi amatwi kaabwe kasidoyera muno ohuwulira, handi emoni chaabwe, bamala ohuchiliimbya; hu beemeo bahaye ohwiingisa nene emoni chaabwe, handi ohuwulira nende amatwi kaabwe, mani banyale ohungaluuhanira mbaonie.’ 28Mulehe mani simanyihane yimuli siti ohuwonisibwa huno ohwa Nasae, hwayirwa eyiri abandu Abateende; bacha ohutekeeresa.” 29Mani niyali naamalire ohuboola emboosi chino, Abayudaaya boosi beecha basiingira bawaao, nibanyoolereere abasyaabwe muno 30Mani yeecha yaanyala ohumenya emyaaka chibiri emilaamba niyeliisa omweene yeng'ene handi nabukaaniraanga abo boosi abachichaanga yaali, 31nabayaaliraanga obwaami bwa Nasae handi bekesaanga ebidiira hu Mwaami Yesu Kristo mu bwahaahu, nabulao kata omukayira.

will be added

X\