EBIHOLWA 26

1Aguripa yeecha yaboolera Paulo ati, “Mbao onyoolere ehabi y'ohwelomalomaho omweene.” Mani Paulo yeecha yaakolola omuhono kwae akulu, mani yamala yachaaka ohutusa embosa yae ati: 2“Ese ndi ohwebukula omweene ohuba omuundu oli nende ehabi muno ohuba mbwe ni mu moni wao, Omutuki muhunuufu Aguripa, mundi ohwewoseraho olwaleero luno ohwekaya emisango choosi ech'Abayudaaya, 3olwohuba ewe oli nende obumanyirifu bungi muno obudiira hu miduunga alala nende obulomboloombo obw'Abayudaaya; mani sakira ndi ohuhwekweeda otekeere kanja ohulomaloma nende ohwesimiirisa muno. 4“Engeri y'obulamu bwaange ohutulira elalira mu budoto bwaange, koti lundamenyaanga busa mu syaalo syaange sino, handi niindi mu Yerusaalemu, bumanyihaane nende Abayudaaya boosi. 5Bamanyire bati, hulw'embaka ndeeyi muno, nikali mbwe banyala ohuba nibadaha ohusiseemba, mbwe ohweema hu mukaanda kw'ediini y'efwe mujing'u muno ese ndamenya koti Omufalisaayo. 6Nae bulaanu, mbano nyemere ano niindi ohuwosesebwa hulw'esuubi mu sisuubise syaholwa nende Nasae eyiri baseefwe, 7si kata enjia cheefwe ehumi nende chibiri choosi chisuubira ohunyoola, koti lubenamiraanga Nasae nende omwooyo mulala, esiro nende esideete. Nihaandi ni hu suubi lyeene lino, limbabiirweho nende Abayudaaya beene bano, Aaa mutuki wange! 8Lwasiina sibaasibwa nende omuundu yeesi hw'eng'we mbwe sisinyaliha Nasae ohusyuusa abafu? 9“Ese mweene ndali nindamanya busa bulai bweene endi hoyerwa ohuholaanga esinyaliha syoosi, ninyingania eliita lya Yesu owa Nasareti. 10Mani ndeecha ndasihola muno mu Yerusaalemu muno; Haba sisyali mbwe ndanyala ohwikalira abalungifu ba Nasae abangi mu mboyero, nifunire obunyala ohutula eyiri abalaamisi bahoongo, nae mbwe kata nende abandi nibeetibwaanga, ndakwiiraanga esiholwa esyo. 11Handi ndeecha ndoola ndanyalaanga nende omweene ohubasaandyanga butoli-toli mu Sinagoogi choosi, handi ningesaho muno ohubona endi mbahola boola ohufwoola Nasae; mani handi nindalichiingi nimbadiirire egiili libira busa, ndabasandyaanga muno kata nende nibalichiingi mu biko biteende byeyale. 12“Endyo nilwo lundali niindi hu lukeendo ninjia e Damasiko niindi nende obunyala nende esilagiro sy'abalaamisi bahoongo. 13Esideete ng'alang'ala, Aaa mutuki wange, ndeecha ndanyala ohubona obulafu butula Mukulu niindi hu ngira eyo, obuhiraho nende elyuuba, nibwaaduha nibumbodohaane nende abo boosi abali nibakeenda naange. 14Mani fweesi nihwali nihumalire ohukwa hu buloba, ndeecha ndanyala ohuwulira ekono nilimboolera mu lulimi Luyibbulaniya liti, ‘Saulo, Saulo, lwasiina oli ohusaandya otyo? Sihunyala nooba notachia hu mayingo.’ 15Naange ndeecha ndaboola endi, ‘Niiwe naanu, Omwaami?’ Nae Omwaami yeecha yaboola ati, ‘Niise Yesu yooli ohusaandyaanga. 16Kata katyo, ewe siingira weeme hu makulu kao; olwohuba ese huboneheere hulw'esifune sino siti, ohuhudoola ochie wuhalabanire, handi otuse obujulisi obw'ebiindu biwamala ohumbonamo, handi nende ebyo mu biinja ohuhuboneheraangamo, 17nihukaya ohutula hu bandu bao, handi nende ohutula hu bandu Abateende, abo bandi ohuhutumamo 18ohubaliimbusa emoni chaabwe, hu banyale ohukaluhana ohutula mu siirima ohuchia mu bulafu, handi ohutula mu maani ka Sitaani, ohuchia hu Nasae, hu beemeo banyale ohunyoola ohuleherwamo ohw'ebibi byaabwe, handi nende esifwo mwabo abali ohulabisibwa ohubitira mu fukiirira mwese.’ 19“Ohweema hweesyo, Aaa Aguripa Mutuki wange, haba sindeecha ndanyala ohuhaya ohwiisa oluyaali mu huboneherwa ohwo Mukulu daawe, 20nae ndeecha ndachaakira hu huyaalira abo abali nibamenya mu Damasiko, mani ndalondyaho abali mu Yerusaalemu, handi ndalondyaho esyaalo syoosi esya Buyudaaya, handi nende eyiri abandu Abateende bosi, endi bahoyeere beyolobye mani bamale bakaluhane eyiri Nasae, mani bamale banyale ohuhola ebiholwa bichiana nende ohweyolobya hwaabwe. 21Mani ohweema hu sifune sino, Abayudaaya beecha bangwaho nindali niindi mu nyumba ya Nasae, nibadaha ohunjita. 22Ohwoola olwaleero, ese mbereenge busa niindi ohunyoolaanga busa obuhoonyi butula eyiri Nasae yeng'ene, mani sakira nyalire ohweema ano niindi ohwelomalomaho eyiri abandu badiidi nende abakali sidubaanie, nitaboolaho esiindu siindi ohutusaho ebyo bi banabbi alala nende Musa baboola bati bicha ohuholehana: 23biti Kristo mweene achia ohusaandisibwa, handi biti, mu huba otangira ohusyuuha ohutula mu bafu, alinyala ohuyaala obulafu eyiri abandu bano, nende eyiri abandu Abateende sidubaanie.” 24Mani koti lu Paulo yali naali ohutusaanga obujulisi bwae, Feesito yeecha yaalomalomera mu kono ly'akulu ati, “Ewe Paulo, ngandi oli omulalu; obweekese bwao bubitiirifu obwo, mbawo buli ohuhulalusa.” 25Nae Paulo yeecha yaboola ati, “Ese haba siindi mulalu daawe, ewe Feesito owoluyaali luhiramo, nae ndi busa ohulomalomaanga ohwadyeeri bukwalaafu. 26Olwohuba kata omutuki muhunuufu yesi amanyire ebiindu bino bulai bweene mani sakira ndi ohulomalomaanga niindi omulehuule mu moni wae; olwohuba ese ndi nende obwomiifu bumala endi abulao kata esiindu silala hu bino esinyala ohuba nisimudondobaaneho ohumanya, olwohuba sino haba sisiholeerwe mu ngiso daawe. 27Aguripa mutuki wange muhunuufu, mani haba sofukiiriraanga ka banabbi baboolaanga? Ese manyire endi ewe ofukiirira.” 28Mani Aguripa bulaanu yeecha yaboolera Paulo ati, “Mu bweyaango obudiidi buti, oli ohubaasa oti omalire ohungaluuhania ohuba Omukuristo!” 29Mani Paulo yemawo yaboola ati, “Kata nisiba esiimbikiti, kata esileeyi, ndahasidahiise Nasae endi, kata haba sooba ewe weng'ene, nae kata abo boosi abali ohutekeeresa kandi ohuboola ludaalo lwaleero luno, endi boosi bahoyeere ohukaluhana baaba koti lweese fwaana, ohutusaho nibataaliho eminyororo chino.” 30Bulaanu, omutuki muhunuufu oyo yemawo yaasingira yeema, mani handi nende Gafana alala nende Bberiniise handi nende abo boosi abali nibehaale nabo; 31mani nibaba nibamalire ohuwaao, beecha bachaaka ohuboolanira buli otula nende owaasye bati, “Hane omusaacha wuno abulaho esiindu syoosi syaholaanga esinyala syamuhoyera ohufwa kata busa nende ohwikalirwa mu mboyero.” 32Mani Aguripa yeecha yaboolera Feesito ati, “Omusaacha wuno aba yamala ohulehuulibwa hale aba natajulira eyiri Kaisaali.”

will be added

X\