EBIHOLWA 25

1Bulaanu, Feesito niyali naamalire ohwiicha mu situundu syesyaalo syae sino, lunyuma lw'endaalo chidatu ohuwa, yeecha yaacha mu Yerusaalemu natula mu Kaisarea. 2Mani abalaamisi bahuluundu nende abandu bahunuufu abali mu Bayudaaya beecha bamwekesa ebidiira hu Paulo; handi bamala bamwekweeda, 3nibamusaba nadaha ohubasangaasa, anyale ohufukiirira omusaacha oyo ayerekesebwe mu Yerusaalemu, nibali ohutekehaanga olukwe ohumukwaaho bamwiite naali hu lukeendo olwo. 4Feesito nae yakobolamo ati Paulo yali ahoyeere ohuliindibwa naali mu Kaisarea, handi ati kata omweene yesi yali natekehaanga ohuchia ebweene eyo bwaangu. 5“Mani sakira,” yemeeda ohuboola, “mani mulehe abasaacha b'oluyaali abali mweng'we bache naange, mani naaba naliwo esiindu syoosi esitahoyera hu musaacha oyo, hu beemeo bamuwabire.” 6Niyali niyahamala ohuba nabo hulw'embaka y'endaalo kata echitaduma mu ndaalo munaana oba ehumi chiti, yemawo yaacha mu Kaisarea; mani hu ludaalo luloondaho, yeecha yehala hu sisaala syae syohuheengeraho emisango mani naamala nalagira ati Paulo aleetebwe yaali. 7Mani Paulo niyali amalire ohwiicha, Abayudaaya bali nibatulire mu Yerusaalemu beecha beema bamwebodoohania, nibamuwabira emisango mibi muno chibatanyala kata ohwomiisa. 8Paulo niyali huyeosaho yaboola ati, “Kata busa eyiri amalako ka Musa ak'Abayudaaya, kata busa eyiri enyumba ya Nasae, kata busa eyiri Kaisaali, abulao yeesi yindakosera kata nabudiidi.” 9Nae kata katyo, olwohuba Feesito yali nadaha ohukwiira Abayudaaya, yeecha yaboolera Paulo ati, “Onyala ohuba nodaha ohuchia mu Yerusaalemu, yooba nodaha ohuba nonyala ohuwoseserwa emisango chino choosi mu moni wange?” 10Nae Paulo yaboola ati, “Ese mbano nyemere mu moni w'esiina sya Kaisaali, yihoyeere ohuba nimboseserwa; eyiri Abayudaaya, ese haba sindaholaho esiindu syoosi esitahoyera, koti wesi lwomanyire bulai bweene. 11Mani nikali mbwe ese ndi omukoseefu, nihaandi ndamala ohuhola esiindu syoosi siimba nihoyera ohufwiiraho, ese haba siindi ohukoonya endi ndeekae ohufwa daawe; nae nikali mbwe mu misaango chaabwe echo, sibulamo esiindu syoosi esinjooma, abulao omuundu yeesi oba ali nende obunyala ohundeha mi mahono kaabwe. Mani ese njulira eyiri Kaisaali.” 12Bulaanu Feesito, niyali naamalire ohweteeba hu siina syae, yemawo yakobolamo ati, “Mbao omweene ojuliire eyiri Kaisaali; mani ni eyiri Kaisaali niyo yocha ohuchia.” 13Bulaanu endaalo chiyera nichali nichahamala ohubitao, Aguripa omutuki nende Bberiniise beecha boola mu Kaisarea ohubukaanira Feesito. 14Koti lubehala eyo endaalo enyiingi hooho, Feesito yeecha yaanyala ohuta omusango kwa Paulo mu moni w'omutuki oyo naboola ati, “Aliwo ano omusaacha yi Felikisi yaleha naali muboye; 15mani nindali niindi mu Yerusaalemu, abalaamisi bahuluundu alala nende abahuluundu b'enjia Bayudaaya beecha bamumbooleraho akamudiiraho, nibasaba mbwe ese muheengere omusango kumuhire. 16Nae ese ndeecha ndabakobolamo endi eyo haba siyali ehola y'Abaroomu ohuheengera omusango omuundu yeesi, omuwabirwa nasisisiiri ohubukaananaho nende abawabi bae tiiri, handi nataberesebwaho ehabi eyohutusa obujulisi bwae budiira hu sifune sibaba bamubeeyera. 17Mani sakira nibeecha bebuusira ano, ese haba sindabahiindya daawe, nae hu ludaalo lwaloondaho, ndeecha ndabukula ndeehala hu sisaala syaange siheengerwaho emisango mani ndamala ndalagira omusaacha oyo yengisibwe mukati. 18Mani abawabi nibeecha basiingira beema, haba sibanyala ohuleeta ohwekanyiisa hwoosi ohudiira hu musaango kwae kuno ohubi muno koti lundali nimbaasa daawe; 19nae byaboneha busa mbwe bali nende amayingani akati waabwe nende omusaacha oyo akadiira hu misiro chaabwe abeene handi nende hu muundu wundi olaangwa mbwe Yesu, owali niyamala ohufwa, nae yi Paulo yali niyomisaanga ati aliwo mulamu. 20Mani olwohuba mbwe ese haba sindali ninyala ohumanya bulai bweene engeri yinyala ndateeberesa bulai ebiindu bidiira hu biteebo bino, ese ndeecha ndamuteeba naaba nadaha ohuchia mu Yerusaalemu mani anyale ohuwoseserwa ebweene eyo emisango chino. 21Nae Paulo niyali naamalire ohusaba ati ahole nasiliinda busa, naliindiriire eheengao y'omutuki muhunuufu oyo, ese ndeecha ndalagira endi ahoyere ohuba nadiirwa busa ohwoola lundahanyale ohumuyira eyiri Kaisaali.” 22Mani Aguripa yeecha yaboolera Feesito ati, “Ese ndaha omweene mbuliirise omusaacha oyo byaalomaloma omweene.” Feesito yamukobolamo ati, “Muchuli bweene, onaba omuwuliirisa.” 23Mani sakira nibwahya muchuli, Aguripa nende Bberiniise beecha bahola omuholo omuhongo muno, mani bamala beecha beengira mu nyumba y'olwichuule lw'abandu alala nende omuhulundu w'Abasirikari, handi nene abandu bahunuufu b'omusiko omwo. 24Mani Feesito yemawo yachaaka ohulomaloma naboola ati, “Omutuki Aguripa alala nende abandu boosi abali ano naafwe, muboneho omusaacha wuno yi Bayudaaya boosi bandekanyiisiraho, kata niindi mu Yerusaalemu nende handi niindi ano, nibehuuma bati haba sahoyeere obubao omulamu natafwiire. 25Nae ese ndeecha ndafumbula endi haba siyali naali naaholereho esiindu syoosi esimuhoyera ohwiitwa; nae koti omweene yajulira eyiri omutuki muhunuufu, ndeecha ndaheengao ohumutuma yaali. 26Nae ese omweene mbulaho esiindu syomiifu sinyala ndandiikira omwaami wange esimudiiraho. 27Olwohuba esiindu sino simbonehera ohuba esitaalimo amahulundu koosi, endi nimba ninduma omuboye yeesi, ohutanyala ohuboolaho ebidiira hu musaango kwae.”

will be added

X\