EBIHOLWA 24

1Mani lunyuma lw'endaalo chitaanu ohubitao, omulaamisi muhunuufu Ananiya, yeecha yaaloondaho yeecha nende abahuluundu alala nende omulomalomi mulala, olaangwa mbwe Teritulusi Beecha batekeha omusango kubafwaambya Paulo mu moni wa Felikisi Gafana; 2mani Teritulusi niyalaangwa, yeecha yachaaka ohuwabira Paulo naboola ati: “Koti busa ohubitira mwewe, efwe huli ohwehoyera emireembe, handi koti busa ohweema hu maani kao, owoluyaali Felikisi, engaluuhana ndayi enyiingi chileteebweo hulwobulai bw'esyaalo syeefwe, 3mani mu ngira choosi, handi buli abundu woosi efwe hufukiirira ebiindu bino byoosi bi ewe Felikisi Gafana ohola, nende ohusiima hwoosi. 4Nae obutanyala ohwemeeda ohuhuhiisa, ndi ohuhusaba hulw'esisa syao, otutekeeresaho mu bwimbikiti. 5Olwohuba efwe hubweene omusaacha wuno ohuba omuundu musuku mubi muno, omutabusi w'Abayudaaya mu syaalo syoosi, handi omwemeresi w'ediini y'Abanasareeti. 6Kata yakesaho nende ohunyaasa enyumba ya Nasae, nae hwanyala ohumudiira busa. 7Handi fwesi hwadaha ohumuwosesa nende amalako ka Musa keefwe keene. Nae Kabuteeni muhuluundu olaangwa mbwe Lisia yeecha nende amaani maangi muno mani yaanyala ohutung'uula omusaacha wuno mu mahono keefwe, handi yalagira abo boosi abali nibamufwaambya omusango ohwiicha mu moni wao. 8Nonanyala ohumuteeba omweene, wesi onanyala ohumweekaho ebidiira hu buli siindu syoosi sihumufwaambya.” 9Abayudaaya bosi beemao beyingisa mu huwaba ohwo nibomiisa bati bino byoosi byali bityo busa. 10Mani Gafana niyali niyahamala ohumusakula achaake ohulomaloma, Paulo yakobolamo ati: “Niindi nende obumanyirifu endi hu mbaka y'emyaaka emiingi muno, obeere nooli omukayi w'esyaalo sino, ndi omusangaafu muno ohutekeha ohwelomalomaho hwange mu moni wao. 11Koti lwooba nomalire omweene ohumanya, haba sichibita endaalo ehumi nende chibiri ohutula nindachia e Yerusaalemu ohwekongooya; 12handi haba sibanyoolaho niindi ohuyingana nende omuundu yeesi kata niindi ohusangulusa esidiiyiha syoosi, oba mu nyumba ya Nasae, oba mu Sinagoogi choosi daawe, oba mu siko bweene. 13Handi kata haba sibanyala ohwomiisa mu moni wao bino bibali bulaanu ohundechaangaho bulaanu buti. 14Nae sino njia ohusifukiirira mbwe, ohweema hu Ngira yino, yibali ohulaanga bati n'ediini, ese nyinamiraanga Nasae wa baseefwe, nifukiirisania nende buli siindu syoosi esyateebwao nende amalako ka Musa, oba esyandiikwa mu banabbi, 15niindi nende esuubi mu Nasae li beene bano bosi bafukiirira, mbwe yicha obubao ohusyuuhira ohw'abandu balungifu nende abataali abalungifu. 16Mani sakira ese ndamenya nindechunianga ohubona endi nyale ohunyoola embaasa ndayi hu Nasae nende hu bandu boosi. 17Bulaanu lunyuma lw'emyaaka chiindi hooho, ndeecha nindeetera esyaalo syaange ebikabwa nende ebiyaanwa busa ebiha ebiingi. 18Mani koti nindali hundi ohuholaanga endyo, beecha banjakaana mu nyumba ya Nasae niindi omwoose mweene, nitaaliho nende esidiiyiha syoosi daawe, oba okunabuungi. Nae Abayudaaya bandi abali nibeechere ohutula mu Asiiya 19bahoyeere bosi ohuba nibali ano mu moni wao, ohutekeha omusango kundi, nikali mbwe bandiho nende emboosi yoosi. 20Ataali awo, mani mulehe abasaacha bano abeene baboole esibi syoosi sibanyoola niihola lundeemera mu moni w'esiina, 21ohutusaho esiindu silala syong'ene sindaayuha nindali nimbeemeremo akati endi, ‘Olwohuba mbwe fukiirira mu husyuhira hw'abafu, sakira ndi ohuwosesebwa mu moni w'eng'we olwaleero luno.’ ” 22Nae Felikisi, ohuba niyali naali nende amakesi kahoyera aka Engira yino, yeecha yabakaana busa naboola ati, “Lisia owali omuhulundu w'abasikaari niyeecha ano, nilwo lunja ohuheenga omusango kweeng'we kuno.” 23Bulaanu yemawo yabeeresa ebilagiro abahongo b'abasikaari ati Paulo ahoyeere ohuteebwa mu buliindi bulai, nae handi ahoyeere ohubeeresebwa emireembe ohuhola syadaha, handi bati abulao kata mulala hu beecha bae ochia ohukayirwa ohumuleetera biyaba nadaha byoosi. 24Lunyuma lw'endaalo endiidi ohubita, Felikisi yemawo yeecha nende Durusila omuhasi wae, owali naali omuhasi Muyudaaya; mani yalaanga Paulo mani yaamutekeeresa naalomaloma hu fukiirira mu Kristo Yesu. 25Mani koti luyali naali ohulomalomaanga hu bwaakanirisi nende ohwefuka omweene, nende ohuheengerwa omusango ohuchia ohubaao hale, Felikisi yeecha yaatya mani yaboola ati, “Tula yindi ano; nindaba niindi nende ebiha biindi, njia ohuhulaanga wiiche.” 26Esiha nasilala esyo, yasuubiranga ati Paulo anyala ohuba naanamubeeresaho eseende. Mani yeecha yachaaka ohumulangaanga butoli-toli niyobba nae embaha. 27Nae emyaaka chibiri nichoola ohuwa, Felikisi yeecha yakeramwa hu bwaami nende Porichisi Feesito; mani koti luyali nadaha ohusangaasa Abayudaaya, Felikisi yeecha yaaleha Paulo naali mu mboyero.

will be added

X\