EBIHOLWA 23

1Nae Paulo niyeecha yahang'aasa emoni chae esiina esyo syoosi, yemawo yaboola ati, “Eng'we basyaange, ese ndahamenya mu moni wa Nasae nimanyire endi mbechaanga omulungifu ohwolera elalira hu ludaalo luno.” 2Nae omulaamisi muhunuufu olaangwa mbwe Ananiya yeecha yaalagira abo abali nibeemere aambi nae ohumuhuya hu munwa. 3Bulaanu Paulo yeecha yamuboolera ati, “Nasae mweene niye ochia ohuhuhuya, ewe esida syabahwa echooka! Wihaale ano ohuheengera omusango ohweema hu malako ka Musa, nihaandi niiwe ohalaka amalako ako nolagira oti ese huywe busa endyo?” 4Abo abali nibeemere aambi awo becha baboola bati, “Ewe, onyala otye ohunyohoolesa omulaamisi muhunuufu wa Nasae?” 5Nae Paulo yeecha yaboola ati, “Basyaange, ese haba simbeere nimanyire endi, niye omulaamisi muhunuufu; olwohuba syandiikwa siti, ‘Otalomalomanga bubi hu mwemeresi w'abandu bao.’ ” 6Nae Paulo niyoola ohumanya ati, oluwaande lulala lwali olw'Abasadukaayo, nae olundi lwali olw'Abafalisaayo, yeecha yehuuma mu siina naboola ati, “Eng'we basyaange, ese ndi Omufalisaayo mweene, omusyaani w'Abafalisaayo beene; mbwe olwohuba ese ndi nende esuubi, handi fukiirira mu husyuhira hw'abafu, sakira ndi ohuwoseswa omusango.” 7Mani niyali naamalire ohuboola atyo, amayingani keecha kakwao akati w'Abafalisaayo nende Abasadukaayo; mani oluhung'aano lweecha lwakabuhanamo. 8Olwohuba Abasadukaayo baboola bati, abulao ohusyuuhira, kata nende bamalaika, kata nende emyooyo; nae Abafalisaayo nabo bafukiirira mweebyo byoosi. 9Bulaanu amawumumu maangi keecha kasiingira; mani abandiiki ba malako ka Musa ab'esikaanda sy'Abafalisaayo beecha basiingira beema mani bachaaka ohuyingana muno bati, “Efwe haba sihuli ohubonaho esiindu sihyaamu syoosi nende omusaacha wuno. Awundi omwooyo kundi nikwo okulomaloome nae, oba malaika?” 10Mani amayingani ako keecha kachaaka ohutuliramo enduli, omuhulundu w'abasikaari oyo natiire ati awundi Paulo anyala ohwoola yahalakwa busa mu bituundu nende abandu abo, yeecha yaalagira abasikaari ohuchaayo handi nende ohumutusa mu bandu abo nende amaani, handi nende ohumuleeta mu daala ly'abasikaari. 11Mu siro esyo, Omwaami yeecha yeema aambi nae mani yaboola ati, “Guma omwooyo, olwohuba koti lwomalire ohunjulira mu Yerusaalemu, ohoyeere otyo handi ohuchia ohunjulira mu Roomu mwosi.” 12Nibwahya muchuli, Abayudaaya beecha bahola olukwe, mani bamala bechuba bati sibachia hulya, kata ohung'wa esiindu syoosi ohwoola nibamalire ohwiita Paulo. 13Bali abandu bahira amahumi kane, abahola olukwe luno. 14Mani beemao bacha eyiri abalaamisi bahuluundu alala nende eyiri abahuluundu boosi, nibaboola bati, “Efwe humalire ohweboyera nende esichubo silala esyohutahoombaho hu syohulya syoosi, ohwoola nihumalire ohwiita Paulo. 15Mani sakira eng'we alala nende esiina syoosi, muhoyeere ohuboolera omuhulundu w'abasikaari amuleete eno yimuli, koti lumwahaba nimudaha ohwehaliirisa omusango kwae bulai. Nae efwe humalire ohwetekeha bulai muno ohumwiita kata natoola aambi ano.” 16Nae bulaanu, omusyaani wa mboochong'e Paulo yeecha yaanyala ohuwulira ebidiira hu lukwe olwo; mani yemawo yacha yengira mu daala ly'abasikaari elyo, mani yaboolera Paulo atyo. 17Mani Paulo yesi yemawo yalaanga mulala hu bahoongo b'abasikaari, mani yamuboolera ati, “Bukula omusyaani wuno omuyire eyiri omuhulundu w'abasikaari oyo; olwohuba ali nende esiindu syadaha ohumuboolera.” 18Mani omuhongo oyo yeecha yabukula omusyaani oyo mani yaamuyira eryi omuhulundu oyo mani yamala yaboola ati, “Paulo muboye wula yanangire mani yaasaba ati ndeete omusyaani wuno yooli, koti lwali nende esiindu syadaha ohuhuboolera.” 19Omuhulundu oyo yeecha yadiira omuhono kw'omusyaani oyo mani yamala yaamusudya endulo yibali bong'ene mani yaamuteeba ati, “Ni siina syeene syodaha ohumboolera?” 20Nae yeecha yamuboolera ati, “Abayudaaya bano bamalire ohufukiirisania ohuhusaba ohuleeta Paulo eyiri esiina muchuli, koti lubahaba nibadaha ohumuhemeresa bulai ebimudiiraho. 21Nae otabafukiirira daawe; olwohuba bali nende abasaacha babita amahumi kane abelindiriirire ohumukwaaho, nibamalire ohweboya silala nende esichubo obutalyaaho kata busa ohung'waaho esiindu syoosi ohwoola lubanamala ohumwiita; mani bulaanu bamalire ohwetekehera elalira, baliindiriire busa ewe syonabaholere.” 22Mani sakira omuhulundu oyo yeecha yamala ohuseebula omusyaani oyo, naamalire ohumuhuutira ati, “Otabooleraho omuundu yeesi oti omalire ohumbooleraho esiindu sino.” 23Bulaanu omuhulundu oyo yeecha yalaanga abahongo babiri bandi mani nababoolera ati, “Esaa chidatu ch'esiro mutekehe abasikaari emia chibiri nende abalwanira esuhiri amahumi kataanu-na-kabiri, nende abalasi b'amafumo emia chibiri bache ohwolera elalira mu Kaisarea. 24Handi mutekehere Paulo yesi esuhiri chi anyala yeruhiraho, mani mumale mubone muti mumwoosa nende emireembe mu moni wa Felikisi Gafana.” 25Handi yeecha yandiika ebbarwa eyiboola ebyeene bino ati: 26“Kilaudyasi Lisia ohuchiira owoluyaali luhoongo Gafana Felikisi, amaheeso. 27Omusaacha wuno yali nadiriibwe nende Abayudaaya, handi nibali busa aambi ohumwiita, syesi nindabeduuyaho niindi nende abasikaari mani ndanyala ohumuwonia, nimalire ohumanya endi, hane yali omwibulanwa wa Roomu. 28Mani nindali nindaha ohumanya omusango kubali nibamufwaambya, ndeecha ndamuleeta mu siina syaabwe. 29Ndeecha ndafumbula endi hane, yali nafwambisibwa ebiindu bidiira hu malako ka Musa kaabwe, nae natawabiirweho esiindu syoosi esihoyera ohumwiita kata busa ohumuboya. 30Mani nisyeecha syamanyihana yindi mbwe hane achia ohubaao olukwe lumudiiraho, njichire ndaheengao ohumuleeta yooli bwaangu muno, handi nende ohulagira abandu boosi ababa nibo abali nende esiindu syoosi sibamufwaambya bosi banyale ohubaaho nende sibahuboolera mu moni.” 31Mani sakira Abasirikari, nibeema hu bibaboolerwa, beecha baabukula Paulo mani bamuleeta esiro eyiri Atipatiri. 32Mani nibwahya, beecha bakobola mu daala lyaabwe, nibaleha abalwanisanga esuhiri ohuchiiririra nibamugooba. 33Nibeecha boola mu Kaisarea mani banyala ohudiisa Gafana ebbarwa eyo, beecha bamudiisa Paulo yesi. 34Niyamala ohusoma ebbarwa eyo, yeecha yateeba Paulo esituundu sy'esyaalo siina siyaba niyamenyamo. Niyecha yaamanya ati hane Paulo atula mu Silisia 35yemawo yaboola ati, “Ese njia ohuhutekeeresa abahuwabira nibamalire ohwoola.” Mani yeecha yaalagira ati bamuliindire mu sipaapi sya Herode.

will be added

X\