EBIHOLWA 22

1“Eng'we baana beefwe nende eng'we ba laata yange, mutekeereseho ohwelomalomaho hwange hundi bulaanu ohuta mu moni weeng'we.” 2Mani nibeecha bawulira bati Paulo yali nabalomalomera mu lulimi Luyibbulaniya, beecha bemeeda ohunyisania. Mani yeecha yababoolera ati: 3“Ese ndi Omuyudaaya, owebulirwa e Tarusiisi mu Silisia, nae owahusirwa mu siko syeene sino mu makulu ka Gamalieli, oweekesebwa bulai ohuchiana nende emiima myomiifu echa amalako ka Musa aka baseefwe, owali omulwaaniriri wa Nasae koti lu mwesi muli muti leero. 4Ndasandianga Engira yino ohufwa-bufwa, nimboyaanga handi nidiisaanga abahasi nende abasaacha mu mahono ka ejiela, 5koti lu omulaamisi muhuluundu nende esiina syoosi esy'abakofu banyala ohusiira nimboola endyo. Ndaberesebwaanga ebbarwa enyiingi muno ohutula hu beene abo, chindayiriraanga abafukiiriri, mani ndasamulaanga ninjola e Damasiko ohudiira abo abalichingi ebweene eyo nimbaleeta nimbahadaangire mu Yerusaalemu basaandisibwe. 6“Koti lu ndachaaka olukeendo lwaange mani ndakeenda niindi aambi ohwoola e Damasiko, aambi w'esaa chisaasaba ech'esideete, obulafu bungi muno bwamyesuha lulala mani bwahosaho nibutula Mukulu. 7Mani abweene awo, ndeecha ndaakwa aasi, mani handi ndeecha ndawulira ekono nilimboolera liti, ‘Saulo, Saulo, lwasiina wusandianga?’ 8Mani ndeecha ndakobolamo endi, ‘Oli naanu mweene, Omwaami?’ Nae yeecha yamboolera ati, ‘Ese ndi Yesu Omunasareti y'oli ohusaandianga.’ 9Bulaanu, abandu bandali nabo bosi banyala ohubona obulafu obwo, nae haba sibanyala ohuwulira ekono ly'omuundu wali naalomalomaanga naange. 10Mani ndeecha ndaboola endi, ‘Siina syeene siimba hole, Omwaami?’ Nae Omwaami yeecha yamboolera ati, ‘Ewe siingira, mani omale ochie wingire mu Damasiko, mani nonaba nomalire otyo, ochia ohuboolerwa ebyo byoosi ebihutekeheerwe ohuhola.’ 11Nae koti lundali nitanyala ohubona ohweema hu humyeesuha hungi ohw'obulafu obwo, ndeecha ndadiirwa busa oluhuuchiro nende abo bandali ndi nabo, mani hwamala hwengira mu Damasiko. 12“Mani omuundu wundi olaangwa ati Ananiya, owali omusaacha odaha muno Nasae ohweema hu malako ka Musa, handi owali nasiimwaanga muno nende Abayudaaya boosi abali nibamenya mu siko omwo, 13yemawo yaasuda yindi mani yeema aambi naange, mani yamala yamboolera ati, ‘Mwaana weefwe Saulo, nyala ohubona handi.’ Mani mu siha syeene esyo, ndeecha ndanyoola ohubona hwange handi, mani ndanyala ohumubona bulai. 14Mani yeecha yaboola ati, ‘Nasae wa baseefwe oyo, yahudoola onyale ohumanya ohudaha hwae, onyale ohubona Oyo Omulungifu mweene handi nende ohunyala ohuwulira ekono elitula mu munwa kwae; 15olwohuba ewe ochia ohuba omujulisi wae eyiri abandu boosi hu bidiira hu biindu byobweene handi byowuliire bino. 16Mani bulaanu, lwasiina oli ohuchelebera ano oti? Siingira mani omale obatiisibwe, mani omale weyoseho ebibi byao byoosi, niwekongooya eliita lyae.’ 17“Nindali nimalire ohukobola mu Yerusaalemu, handi nindali ndi ohwekongooyanga mu nyumba ya Nasae, ndeecha ndeengira mu huloota 18mani ndeecha ndanyala ohumubona naali ohumbooleraanga ati, ‘Yanguyaho muno, mani omale wanguyirise ohutula mu Yerusaalemu, olwohuba, haba sibachia hufukiirira obujulisi bwao obundiiraho daawe.’ 19Mani ndeecha ndaboola endi, ‘Omwaami, abeene bano bamanyire bulai bweene bati, mu buli Sinagoogi, ese ndengiraanga nindiira handi nindoocha abo abalichingi nibafukiirira mwewe. 20Handi amabaanga ka Sitefwano omujulisi wao mweene nikali hu keediswa, ese syesi ndali ninyemere aambi awo handi syesi nisikwiira, handi niniindire engubo ch'abandu bali nibamwiita.’ 21Nae yeecha yamboolera ati, ‘Tula ano; olwohuba ese njia ohuhutuma ochie eyale muno eyiri abandu Abateende.’ ” 22Ohwolera elalira hu mboosi yene yino, abandu bali nibamutekereese busa; nae bulaanu beemao bachaaka ohusiingisa amakono kaabwe nibaboolera akulu bati, “Mumale hu syalo huno omuundu ofwaana ati! Haba sahoyera ohubaao omulamu.” 23Mani koti lubali nibali ohulira batyo, nibakuya engubo chaabwe mu mboo handi nibadumuula olufu mu mboo, 24omuhulundu w'abasikaari oyo, yeecha yaalagira ati bamuleete bamwiingise mu daala ly'abasikaari, handi naamala nalagira ati bamuwosese nibamunaala ehoba, nibadaha ohumanya esikera abandu nibamwehuumaho batyo. 25Nae nibaba nibamalire ohumuboya nende ehoba, Paulo yeecha yaboolera omuhongo wundi wali niyeemere aambi nae ati, “Mani sifukiirirwa mu malako eng'we ohunaala omuundu oli omwibulanwa wa Roomu nasisiiri ohuheengerwa omusango?” 26Mani omuhongo oyo niyeecha yawulira atyo, yeecha yaacha eyiri omuhulundu w'abasikaari mweene mani namuboolera ati, “Siina syeene sino simuli aambi ohuhola? Olwohuba omuundu wuno, mwibulanwa wa Roomu niye.” 27Mani sakira, omuhulundu w'abasikaari oyo yeecha yaacha eyiri Paulo, mani yamuboolera ati, “Ewe mboolere bulai bweene, oli omwibulanwa wa Roomu kose?” Nae yamukobolamo ati “Eee.” 28Bulaanu omuhulundu oyo yeecha yakobolamo ati, “Ese ndakula obwibulanwa buno eseende enyiingi muno.” Nae Paulo yemawo yaboola ati, “Nae ese ndebulwa busa hundaaba omwibulanwa.” 29Mani sakira abandu bali nibali aambi ohuchaaka ohumuwosesa beecha bamwiiruhaho bwaangu; mani omuhulundu oyo yesi yeecha yaatya muno olwohuba yeecha yaamanya ati, hane Paulo yali omwibulanwa wa Roomu handi ati, hane yali naamalire ohuhadaanga. 30Nae hu ludaalo lwaloondaho, omuhulundu oyo nasiteemaho ohumanya bulai esyakera Abayudaaya nibamuwabira batyo, yeecha yamuboolola, mani yaalagira abalaamisi bahuluundu, alala nende esiina syoosi beeche bebuuse alala mani yamala yaleeta Paulo yamuta mu moni waabwe.

will be added

X\