EBIHOLWA 21

1Mani nihwamala ohubatulaho, nihuchaakire ohusyaabala, hwecha hwadiira engira eya tiiri eyicha mu Koosi, mani handi oludaalo lwaloondaho hweemao hwacha mu Rodesi, handi lunyuma hwatula omwo hwacha e Patara, (ebyandiiko bihale biindi bimeedaho nende Mira.) 2Handi nihwemao hwanyoola emeeri yindi eyali niyihalakania niyicha mu Foenisia, hwecha hwengiramo, hwasyaabaliramo. 3Nae nihwali nihwahoola yihwali nihunyala ohubona Saipuraasi, hwecha hwakabuha hwasireha hu muhono mukooda, mani hwasyaabala nihuchoomere Siiria, mani hwamala hwakobera e Tiro; olwohuba eyo niyo yi meeri yali niyicha ohudwiihulira emikuku chaayo. 4Mani nihwali nihumalire ohwakaana abeeki bali bamenya eyo, hwecha hwehala nabo hulw'embaka y'endaalo chitaanu-na-chibiri enaamba. Nibahoonyerwaho nende Mwooyo, abeeki abo beecha baboolera Paulo bati atemeeda nende olukeendo lwae yalwoosa e Yerusaalemu daawe. 5Mani endaalo cheefwe chihwali nihudahire ohumala ebweene eyo nicheecha chaawa, hwecha hwasiingira hwawaao hwachiiririra nende olukeendo lweefwe olwo; boosi, alala nende abahasi baabwe nende abana, beecha batugooba hwacha nabo ohwoola luhwoola erwaanyi w'esiko sihuluundu esyo; mani hwecha hwobba amahumbo aasi nabo hu sikobero esyo, hwekongooya Nasae, hwamala hwahubbirana obeeyo buli otula nende owaasye. 6Bulaanu hwecha hwacha hwengira emeeri, nabo bamala bakobolayo engo waabwe. 7Nihwali nihumalire ohuheneeresa olukeendo lweefwe lutula mu Tiro, hwecha hwoola mu Putolemayi; mani hwamala hwacha hwaheesa abaasyeefwe bali nibamenya omwo, handi nihumala nihwihala nihumala nabo oludaalo lulala lwong'ene. 8Hu ludaalo lwaloondaho, hwecha hwasiingira hwatula omwo, mani hwecha hwoola mu Kaisarea; mani hwecha hwengira mu nyumba ya Filipo omuyaali, owali mulala hu baasye bataanu-na-babiri, mani nihumala nihwihala nabo. 9Yali nende abahaana bae bane abali nibasisiiri ohudeeha abali nibaholaanga omulimo kw'ohubulaanga ebicha ohweholeha. 10Nihwali nihwahamala ohumenyaho nabo endaalo endiidi, omubuuli w'ebicha ohweholeha wundi olaangwa mbwe Agabasi yeecha yeha yeecha natula mu Buyudaaya. 11Mani niyatwoolaho, yeecha yabukula olusibiro lwa Paulo, mani yaboyera amakulu kae nende amahono kae omweene, mani yamala yaboola ati, “Mwooyo Mwolerefu mbawo aboola ati, ‘Nilwo busa lu Bayudaaya bamenya mu Yerusaalemu bacha ohuboya omuundu mweene lusibiro luno handi bamala bamudiisa mu mahono k'Abateende.’ ” 12Nihwawulira sino, efwe alala nende abandu bali nibali awo, hwecha hwekweeda Paulo atacha yoola mu Yerusaalemu daawe. 13Nae Paulo yeecha yakobolamo ati, “Siina syeene sino simuli ohuhola, muli ohulira mundenguse omwooyo? Olwohuba ese siindi omwetekefu ohuboyebwa hwong'ene, nae kata nende ohufwiira mu Yerusaalemu, hulw'eliita ly'Omwaami Yesu.” 14Mani niyahayira elalira ohuwulira kahwali nihumuboolera ako, hwecha fwesi hwaleha mani hwaboola busa huti, “Mulehe busa si Mwaami aaba nadaha, nisyo esiba siholehane.” 15Endaalo chihwaba eyo nicheecha chaawa, hwecha hwetekeha mani hwamala hwacha mu Yerusaalemu. 16Handi abeeki bandi ohutula mu Kaisarea beecha hwacha nabo, mani batuyira enanyuumba ya Manasoni owali natula mu Saipuraasi, handi owali omweeki muhale, yihuba humenye nae. 17Nihwali nihumalire ohwoola mu Yerusaalemu, abafukiiriri basyeefwe batubukaanira nende esangaalo muno. 18Hu ludaalo lwaloondaho, Paulo yeecha yacha naafwe eyiri Yakobbo; yi bahuluundu boosi bali nibeechere. 19Paulo niyamala ohubaheesa, yachaaka ohubakaniayira buli siindu si Nasae yali naaholere mu bandu Abateende ohubitira mu buhalaabani bwae. 20Mani nibamala ohuwulira batyo, beecha bafumya Nasae muno. Mani bamala baboolera Paulo bati, “mwaana weefwe obona, nga chiriwo elifu nende elifu ech'abandu Bayudaaya abanyalire bosi ohufukiirira; boosi bali ohufwiira busa amalako, 21nae bamala ohuboolerwa akahudiiraho mbwe ewe weekesaanga Abayudaaya boosi abamenya mu Abateende oti balehane nende amalako ka Musa, nobaboolera oti batahebaanga abana baabwe, kata nende ohulondakana nende emiduunga ch'Esiyudaaya. 22Siindu siina syeene mani esihoyeere ohuholebwa? Paka bacha ohuwulira bati omalire ohwoola muno. 23Mani ohoyeere ohuhola busa esyo sihuli ohuhubooleraanga. Mbano huli ano nende abasaacha bane abadiiribwe nende omusango kwohuhalaka amalako ka Musa; 24mani bukula abandu bano ochie nabo mani munyale ohweyosa nabo, mani omale obatuungire bibababaanja, hu banyale ohweebeka emitwe chaabwe. Awo niwo abandu boosi abacha ohumanyira elalira bati, ebiindu bibali nibamala ohuboolerwa ebihudiiraho ebyo byoosi bibulamo amahulundu nae bati hane ewe wesi omweene mbawo olondekanaanga nende amalako ka Musa. 25Nae eyiri abandu Abateende abo boosi abamala ohufukiirira, mbawo humalire ohubatumira ebbarwa eyirimo embaasa yeefwe yiti abo bahoyeere ohwebwaaba ebiindu byoosi ebiba nibimalire ohubeeresebwaho emisaambwa, handi nende amabaanga, handi nende esiindu syoosi esiba nisimikirwe busa, handi nende esifwaabi sy'obuyirani.” 26Bulaanu Paulo yemawo yabukula abasaacha abo yacha nabo, mani hu ludaalo lwaloondaho, yeecha yacha yeyosa yelabya nabo, mani yamala yacha yengira mu nyumba ya Nasae, ohulaangirira obuungi bw'endaalo ch'ohwelabya chicha ohuweeraho, hu siyaanwa sinyale ohutusibwa hulwa buli mulala hu beene abo. 27Endaalo chitaanu-na-chibiri nichali nichiri aambi ohuwa, Abayudaaya bandi ohutula mu Asiiya, abali nibamalire ohumubona naali mu nyumba ya Nasae, beecha bachaaka ohusangulusa esidiyiha esyo syoosi, mani nibamala nibadiira Paulo, 28nibalira lukali bati, “Eng'we abasaacha ba Yisirayiri mweesi, mwiiche mutuhoonye! Wuno niye omusaacha oli ohwekesanga abandu buli abundu nabakabula hu bandu ba muno, nende amalako ka Musa, nende esifwo syeene sino; handi omweene wuno amalire ohuleeta abandu Bayonaani yabengisa mu nyumba ya Nasae yino, mani amalire ohunyaasa esifwo syolerefu sino.” 29Olwohuba abandu bali nibamalire ohubona Turofiimu Omuefeeso naali nae mu siko esyo, mani bali nibabaasirisa bati, Paulo yali nanyalire ohumuleeta handi nohumwiingisa mu nyumba ya Nasae eyo. 30Mani esiko esyo syoosi syeecha syasanguluha, mani abandu bachaaka ohwiruhira alala boosi; beecha badiira Paulo mani bachaaka ohumuhuruudya nibamutusa mu nyumba ya Nasae, mani nibamala nibekala bwaangu esiruwa. 31Mani koti lubali hubaheengaanga amakesi kohwiita Paulo, emboosi cheecha choolera esiina sy'Abasirikari balwaani b'Esiroomu chiti esiko sya Yerusaalemu syoosi syali nisidubuuhe. 32Omhuluundu w'esiina esyo yeecha yabukula abasikaari bandi nende alala nende abasikaari bahoongo bandi, mani nibamala boosi nibeeruha nibachooma abandu bali nibatoocha Paulo; mani abandu nibabona abasikaari abo alala nende abahongo baabwe nibabachoomere, beecha baaleha ohutoocha Paulo. 33Mani omuhulundu oyo yeecha yoola eyiri Paulo, mani yaamudiira, mani yaalagira bamuboye nende enyororo chibiri. Omuhulundu oyo yemawo yacha ohuteeba ati omuundu oyo yali naanu, handi nende siindu siina syeene siyali naaholere. 34Abandu bandi bali mu sidiiyiha behumaanga nibaboola esiindu siindi, nae abandu bosi baboola esiindi; mani koti lubyeecha byamuhaya ohumanya esifune syeene ohweema hu luyoka, yeecha yaalagira ati Paulo ayiribwe mu daala ly'abasikaari. 35Mani niyali niyahoola hu ngaasi yiniina mu daala omwo, yakiingwa busa nende abasikaari ohweema hu bululu bw'esidiiyiha sy'abandu; 36olwohuba okunabuungi kw'abandu kwali nikubaloondaho nikulira nikuboola kuti, “Mumumaleo busa!” 37Koti lu Paulo yali naali ohwingisibwa mu daala ly'abasikaari, yeecha yaalomaloma naboolera omuhulundu oyo ati, “Onyala wafukiirira ndahubooleraho esiindu syoosi?” Nae omuhulundu oyo yaboola ati, “Mani onyala ohuba nomanyire olulimi Luyonaani? 38Ewe haba sineewe Omumiisiri wula hane, owatekeehe ohwediima aambi ano, mani wanyala ohwimirira abandu elifu chine Abeeti wabayira mu sichiimi?” 39Nae Paulo yamukobolamo ati, “Ese ndi Omuyudaaya, ohutula mu Tarusiisi mu Silisia, omwibulaane w'esiko sihuluundu muno; mani ndi ohuhwekweeda, wufukiirire nomalomeho eyiri abandu bano.” 40Mani omuhulundu oyo niyeecha yamukanya ohulomaloma, Paulo yeecha yaasingira yaniina yeema hu ngaasi eyo, yamala yaasingisa omuhono kwae yaakesaho ohuyenjeesa abandu; mani nibyeecha byanyala ohuyenjeera muno, yeecha yachaaka ohubalomalomera mu lulimi Luyibbulaniya, naboola ati:

will be added

X\