EBIHOLWA 2

1Oludaalo lwa Petekoote nilwoola, abatume bali nibebuusire alala mu sifwo silala. 2Mani abweene awo, ekono lyawuliiriha nilitula Mukulu niliwoola koti omuyaka kw'amaani, mani lyeechula mu nyumba mwoosi yi batume bali nibehaale. 3Mani babona enimi chifwaana koti omuliro nichisalaanire mani cheecha cheema hu buli muundu. 4Mani boosi beecha beechusibwa Mwooyo Mwolerefu, mani bachaaka ohulomaloma mu nimi chitaali nasilala, koti lu Mwooyo oyo yabanyalira ohulomaloma. 5Nae mu Yerusaalemu mwalimo Abayudaaya, abasaacha badaha Nasae muno ohutula mu buli mbeka yoosi eyo hu syaalo huno. 6Mani olwawulira ekono lino, beecha bebuusa alala, mani bawuka muno, olwohuba buli muundu yali awulira abatume nibalomalomera mu lulimi lwae lweene. 7Mani beecha besinduha handi bawuka muno nibaboola bati, “Mani abandu bali ohulomalomaanga bano boosi haba si Bagalilaaya? 8Nae siba sitye mbwe efwe huwulira, buli muundu mu lulimi lwae lweene? 9Abapasia nende Abameede nende Abalamayiti nende abamenya mu Mesopotamia, Buyudaaya nende Kapadosia, Potasi nende Asiiya, 10Firigia nende Pamufilia, Misiri nende ebituundu bya Libbia ebiri aambi nende Sireeni, nende abakeni ohutula e Roomu, Abayudaaya alala nende Abateende basoma ediini y'Abayudaaya, 11Abakureete nende Abaraabbu, huli ohubawulira nibaboola mu nimi cheefwe ebiindu by'amaani bi Nasae yahola.” 12Mani boosi beecha bawuka mani bamala bateng'eng'ala nibaboolanira abeene-na-beene bati, “Sino syekesa siina?” 13Nae abandi badyabuha nibaboola bati, “Abo bameerere efwiini njiaha.” 14Nae Peetero, yeecha yeema alala nende ehumi-na-mulala, mani yaasingisa ekono mani yachaaka ohulomaloma nababoolera ati, “Eng'we abasaacha Bayudaaya basyaange, alala nende eng'we mweesi abamenyere mu Yerusaalemu, mutekeerese muwulire bimbaboolera. 15Abasacha bano haba sibameere koti lu mubaasa, olwohuba luchiri busa esaa chidatu ch'echuli; 16nae sino nisyo si munabbi Yoweeri yalomaloma naboola ati: 17‘Nasae aboola ati, bino nibyo ebicha ohubaao mu ndaalo chimaliiriha, njia ohuchuha Mwooyo wange hu bandu boosi, mani abasyaani b'eng'we nende abahaana b'eng'we bacha ohutuumbula ebicha ohubaao, handi abasyaani baraaga b'eng'we bacha ohuboneherwa, handi abasaacha bahuluundu b'eng'we bacha ohuloota ebilooto; 18eee, handi hu bahalaabani bange basaacha nende abahalaabani bange bahasi mu ndaalo echo, njia ohubachuhaho Mwooyo wange; mani bacha ohutuumbula ebicha ohubaao. 19Handi njia ohuhola ebiwukisa akulu Mukulu nende obulolero aasi hu syaalo, achia ohubaao amabaanga, nende omuliro, nende okwoosi kudiraane; 20elyuuba licha ohukaluhana libe esiirima nae omwoosi nakwo kukaluuhane kube koti amabaanga, oludaalo lw'Omwaami nilutoola, oludaalo luhuluundu handi olw'oluyaali muno. 21Mani buli bundu yeesi olilangaanga eliita ly'Omwaami yahawonisibwe.’ 22“Eng'we Abayisiriyari, muwulire emboosi chino: Yesu Omunasareeti, niye omusaacha womisibwa mu moni weng'we nende ebiholwa by'amaani nende ebiwukisa nende obulolero bi Nasae yamuholerangamo koti lu eng'we abeene mumanyire busa. 23Muhutekeha hwa Nasae nende muhumanya hwa Nasae, Yesu wuno, yadiiswayo mani mwamuhomerera handi yeetwa nende abandu bataloondakana nende amalako. 24Nae Nasae yamusyuhisa ohutula mu bafu, yamuboolala mu buchuuni bw'ohufwa, olwohuba haba sisyali nisinyalihana ohudoong'a mu maani k'ohufwa. 25Olwohuba Daudi alomaloma ebimudiiraho naboola ati, ‘Ndabona Omwaami naali naange ebiha byoosi, tateenga olwohuba ali hu muhono kwaange muluungi; 26sakira omwooyo kwaange kwasangaala, handi olulimi lwaange lwehoya; handi omubiri kwaange kwosi kucha ohuba nende esuubi liingi. 27Olwohuba haba sochia huleha omwooyo kwaange emakoombe, oba ohuleha Omwolerefu wao ohubola. 28Omalire ohunjekesa engira y'obulamu; handi ohuba aambi naawe, hucha ohunjichusa esangaalo.’ 29“Basyaange, hambaboolere ataali ohutya hwoosi ebidiira hu Daudi kuuka yeefwe endi, yafwa mani bamusiiha, handi esiriindwa syae sisisiiri naafwe ohwoola buti. 30Olwohuba koti luyali omunabbi, handi namanyire ati Nasae yechuba namwelayirira ati, yahehase hu sisaala syae sy'obutuki mulala hu beechuhulu bae. 31Daudi yali amanyire hale ebicha obubao, mani yaalomaloma hu husyuha hwa Kristo naboola ati, haba siyahalehe omubiri kwae emakoombe oba yaleha omubiri kwae ohubola. 32Yesu wuno Nasae yamusyuhisa handi efwe fweesi huli abajulisi bahwo. 33Naamalire ohuniinisibwa yaaba hu muhono muluungi kwa Nasae, handi naamalire ohubukaana Mwooyo Mwololerefu yi Simwaana yalaka, achuhire sino simuli ohubona, handi ohuwulira. 34Olwohuba Daudi haba siyaniinaho Mukulu; nae omweene aboola ati, ‘Omwaami yaboolera Omwaami wange ati, yihala hu muhono kwaange muluungi, 35ohwoola lundihola abasuku bao ohuba esiteni syowuluusiraho amakulu kao.’ 36Leha enyumba ya Yisirayiri yoosi yimanyire elalira nende obwomiifu yiti, Nasae amalire ohuhola Yesu yimwahomerera wuno, ohuba Omwaami handi Kristo.” 37Nae bulaanu nibawulira sino, syabachuunira elalira ohwoola hu ndasi, mani baboolera Peetero alala nende Abatume basye boosi bati, “Baana beefwe, siina syeene sihuba huhole?” 38Nae Peetero yababoolera ati, “Mweyolobye, mani buli muundu abatiisibwe mu liita lya Yesu Kristo ohuleherwamo ebibi byeeng'we; handi mucha ohubukaana esiyaanwa sya Mwooyo Mwolerefu. 39Olwohuba esisuubise sino syeng'we, alala nende abana beeng'we, alala nende abo boosi abali eyale muno; oyo yeesi yi Nasae Omwaami weefwe aba nalaangire ohwiicha yaali.” 40Mani Peetero yeecha yaalomaloma niyehoonyera emboosi nyiingi muno mani yabekongooya naboola ati, “Mwewonie abeene ohutula hu luse ludondobanu luno.” 41Mani abo boosi abafukiiririra emboosi chae, beecha baabatiisibwa. Mani hu ludaalo olwo, abemeeda hu mukaanda kw'abafukiiriri bali abandu aambi elifu chidatu (3000). 42Mani beecha bomiirira hu njekesa y'Abatume nende ohuholera alala, nende ohuliiraanga omugaati alala nende ohwekongoyeraanga alala. 43Mani obuti bweecha bwadiira buli muundu; mani Abatume beecha bahola ebiindu biwukisa alala nende obulolero bungi muno. 44Mani abafukiiririra beecha baholera alala mani buli siindu syabechaanga esyaabwe boosi; 45mani beecha bakusaanga emikaangi chaabwe nende ebiindu byaabwe, mani bamala baakabiraanga buli muundu koti luyalichiingi nadaha. 46Mani buli ludaalo bekongoyeraanga alala mu nyumba ya Nasae, handi baliiraanga omugaati mu madaala kaabwe, handi balichaanga ebyohulya nende emyooyo misangaafu alala nende emyooyo mikabi. 47Bakinianga Nasae, handi abandu boosi babadahaanga. Mani buli ludaalo Omwaami yeecha yameedaanga hu bungi bwaabwe abo abalichingi nibaonisibwa.

will be added

X\