EBIHOLWA 19

1Apolo niyali naali mu Koliiti, Paulo nae yacha yahalakania emukulu w'esyaalo esyo mani naamala niyoola mu Efeeso. Yabukaana ebweene eyo abeeki bandi. 2Mani yemawo yababoolera ati, “Mani mwanyoola Mwooyo Mwolerefu esiha simwafukiiriramo?” Nabo baboola bati, “Haba, efwe hutawuliraho huti Mwooyo Mwolerefu aliwo.” 3Mani yeecha yaboola ati, “Ni mu siina syeene mani mumwabatiiswa?” Baboola bati, “Mu hubatiisibwa hwa Yowaana.” 4Nae Paulo yemawo yaboola ati, “Yowaana yabatisaanga nende ohubatiiswa hwohweyolobya, nabooleraanga abandu ohufukiirira mwooyo owali naacha ohwiicha lunyuma lwae, oyo niye, Yesu.” 5Nibawulira batyo beecha baabatiisibwa mu liita ly'Omwaami Yesu. 6Nae Paulo niyali naamalire ohubeesaho amahono kae, Mwooyo Mwolerefu yeecha yabeechaho; mani bamala banyala ohulomaloma mu nimi chikabuhane handi nende ohutuumbula ebicha ohubaao. 7Alala boosi bali aboola aambi wa ehumi nende babiri. 8Mani yemawo yacha yengira mu Sinagoogi, mani hulwa embaka y'emyoosi chidatu yali naalomalomaanga naatatya, nayinganaanga handi nayalaanga ebidiira hu bwaami bwa Nasae; 9nae abandu bandi nibeecha bachaaka ohubonehana koti abali abamayiingi handi nibahaya ohufukiirira, nibalomalomaanga bubi hu Ngira yino mu moni w'abandu bebuusire, Paulo yeecha yabatulamo, nawawo nende abeeki bali eyo, handi nachaaka ohuyingana buli ludaalo naali mu nyumba y'ohwebuusiramo eya Tiranu. 10Sino syachiiririra busa sityo ohumala emyaaka chibiri, ohwoola lu bandu boosi abali nibamenya mu Asiiya beecha banyala ohuwulira emboosi y'Omwaami, Abayudaaya alala nende Abayonaani nasilala. 11Mani Nasae yeecha yemeeda ohuholera mu mahono ka Paulo ebiindu byaamaya ebiingi muno, 12ohwoola lu bitaambaya oba engubo ebyohumubiri kwae byeecha byakingibwaanga nibiyirirwaanga abalwaae, mani obulwaae nibubalehaanga handi nende emisaambwa nichibatulaangamo. 13Mani Abayudaaya bandi abakendanaanga nibeerusa emisaambwa hu bandu, bosi nibemao nibachaaka ohutuumbuliraanga eliita ly'Omwaami Yesu hu bandi balichiingi nibali nende emisaambwa, nibaboola bati, “Hwiruhania nende Yesu yi Paulo ayalaanga.” 14Abasayaani bataanu-na-babiri ab'Omuyudaaya mulaamisi muhuluundu olaangwa ati Sikebba nibo abali nibaholaanga batyo. 15Nae omusaambwa kundi kweecha kwabakobolamo kuti, “Yesu ese mumanyire, handi Paulo ese mumanyire, nae eng'we ning'we banaanu?” 16Mani omusaacha yi musaambwa okwo kwali nikumulimo yemawo yabaduumiraho, mani nabakwaho boosi alala, mani nabayingira amaani, ohwoola lu beecha beeruha batula mu nyumba omwa syekenye handi nibanyaalirwe. 17Mani sino syeecha syamanyiha eyiri abandu boosi abali nibamenya mu Efeeso, Abayudaaya alala nende Abayonaani; mani obuti bweecha bwabadiira boosi; mani eliita ly'Omwaami Yesu lyeecha lyakinisibwa muno. 18Abangi hu bandi bali nibamalire ohufukiirira bosi bachaaka ohwichanga nibeyolobya handi nibebwaaba ebiholwa byaabwe bibi. 19Mani abangi hwaabo abali nibaholaanga obukodyo bw'amaya, beecha babusaanga ebitabo byaabwe alala mani nibabisambaanga mu moni w'abandu boosi; mani beecha baabalaanga ebbeyi yaabyo, mani nibanyoola mbwe yali yaakana nende eya ebikero by'efeesa elifu amahumi kataanu. 20Mani sakira emboosi y'Omwaami yeecha yahula, mani yatabaala muno. 21Bulaanu, lunyuma lwebiholwa bino byoosi, Paulo yeecha yahengawo mu Mwooyo, ohuchia ohubita naahalakania mu Makedonia handi nende mu Akaia nende ohuchia mu Yerusaalemu, mani niyemao naboola ati, “Lunyuma lwohubaho eyo, hoyeere ohuchia ndabonaho e Roomu yosi.” 22Mani niyali naamalire ohutuma mu Makedonia abahalaabani bae babiri, Timoteo nende Erasito, yemawo omweene yadoong'a mu Asiiya hulw'embaka endiidi. 23Esiha syeene esyo, ohusasakala hu hoongo hwecha hwakwaao ohudiira hu Ngira yino. 24Olwohuba omuundu wundi olaangwa Demetiriya, owali omwitaanyi w'efeesa, owali naaholaanga obuyumba bw'amasabo obw'efeesa obwa nasaye olaangwa Aritemi, yali naaholaanga engaanga ehoongo muno eyiri abahosi bae. 25Yabuusaanga ebiindu bino byoosi alala, nende abahosi baasye, mani naamala naboola ati, “Basaacha eng'we, mumanyire muti omulimo kuno nikwo kuhunyolaangamo obunyali bweefwe. 26Mani muli ohubona handi ohuwulira muti ni haba si mu Efeeso mwong'ene nae mu aambi wa mu Asiiya yoosi, Paulo wuno amalire ohuyingira nende ohukosa omukanda kw'abandu muhoongo muno, naboolaanga ati, banasaye baholebwa nende amahono haba si banasaye nibo. 27Mani aliwo amasira mbwe, omulimo kw'efwe kuno kwong'ene okucha ohukwa mu mayiingani, nae byosi mbwe enyumba y'ohwiinamiramo nasaye muhasi muhunuufu Aritemi yicha ohuweeramo elalira obuhoonyi, mani anyale ohutusibwaho oluyaali lwae, nasaye wuno yi Asiiya yoosi alala nende esyaalo syoosi siinamiraanga.” 28Mani nibawulira batyo, boosi beecha banyoolera muno, mani bachaaka ohulira nibaboola bati, “Aritemi w'Abaefeeso niye omuhunuufu ohira!” 29Mani sakira esiko sihuluundu esyo syeecha syoosi syatabuha; mani boosi beecha beeruha nibacha mu nyumba y'emibayo, nibahwehweesa nibacha nende Gayasi nende Arisitariiko, Abamakedoniya abali bakeendaanga nende Paulo. 30Paulo yeecha yekomba ohuchia yengire mu sidiyiiha esyo, nae abeeki bamukayira; 31nende abandu hu bandu Basiyariko bosi, abali abeecha bae, beecha baacha yaali mani bamwekweeda atateemaho ohuchia ohwingira mu nyumba y'emibayo eyo. 32Bulaanu abandu bachaaka abandi ohulira nibaboola esiindu siindi, nae abandi nibaboola esiindi; mani oluhung'aano olwo lweechula lwabaamo ohutabuha ohungi muno, mani abandi beecha baakotwa esyali nisikerere bebuusa batyo. 33Abandu bandi bali mu sidiyiiha beecha bachaaka ohutangana Alekisaanda, yi Bayudaaya bali nibateereyo. Nae Alekisaanda yeecha yekesera omuhono kwae, nadaha ohwelomalomaho eyiri abandu. 34Nae nibeecha ohumanya bati hane yesi yali naali Omuyudaaya, hulweembaka y'esaa chibiri enaamba, boosi bali nibaliraanga busa alala nibaboola bati, “Aritemi ow'Abaefeeso niye omuhunuufu!” 35Mani omuhulundu w'esiko niyali naamalire ohunyala ohuyenjeesa esidiyiha esyo, yeecha yaboola ati, “Eng'we abandu bomu Efeeso, muundu siina oliwo otaamanyire ati, esiko sihuluundu sy'Abaefeeso, nisyo esiriindi sy'enyumba ya Aritemi omuhunuufu, handi nende esyeene kina lyolerefu elyakwa nilitula mu maleesi? 36Mani oluunyuma lwohubona muti ebiindu ebyo haba sibinyala ohuyinganisibwa, muhoyeere ohuwuleera mani mwahaya ohuyuyuhana ohuholaho esiindu syoosi. 37Olwohuba muleetere abasaacha bano ano abataali abanyoomi b'ediini oba abahyeya nasaye weefwe muhasi. 38Mani sakira Demetiriya alala nende abetaanyi abali nae nibaba nibali nende esiindu syoosi sibekanyiisa hu muundu yeesi, ekooti njikule nicho, handi abahengi b'emisaango baliyo; mulehe bayire emisaango chaabwe hu basyaabwe ebweene eyo. 39Nae nimuba nimuli ohukoonya esiindu siindi ohuhiraho awo, esyo siba sichia ohwihasibwa mu luhung'aano lweefwe lwamanyihana. 40Olwohuba huli mu masira akohuhengerwa omusango kw'ohusasakala olwaleero, naaba nabulao esifune esinyala syaseemba oluhero luno.” 41Mani niyali niyahamala ohuboola atyo, yeecha yaseebula oluhung'aano olwo lwasalaana.

will be added

X\