EBIHOLWA 18

1Lunyuma lwabino byoosi, Paulo yeecha yaatula mu Ateeni mani yamala yacha e Koliiti. 2Mani niyoola ebweene eyo, yeecha yakaanana nende Omuyudaaya wundi olaangwa ati, Akwiila, owali omwibulanwa wa Potasi, owali yeecha eyo hale natula mu Yitale naali nende omuhasi wae Purisiila, olwohuba Kilaudyasi yali niyalagira ati Abayudaaya boosi batule mu Roomu. Mani yeecha yacha ohubabonaho; 3nae olwohuba yali naaholaanga omulimo kufwaanana nende echaabwe, yeecha yaanyala ohumenya nabo nibaholaanga emirimo echo ech'ohuhola amaema. 4Mani yaanyala ohuyingana mu Sinagoogi buli ludaalo lwa Sabbaato, mani nanyala ohunyoola Abayudaaya bandi nende Abayonaani bandi ohumuloonda. 5Mani Siila nende Timoteo nibeecha boola awo nibatula e Makedonia, Paulo yali yamala ohufumaalira ohuyalaanga, naatusiraanga Abayudaaya obujulirwa bweekesa buti Yesu yali niye Kristo. 6Nae abandi nibachaaka ohumuyinganianga nende ohumunyekaanga, yeecha yaahuhumula engubo chae mani naamala nababoolera ati, “Amabaanga keeng'we kababe hu mitwe cheeng'we abeene! Ese mbulaho omusango. Ohutula olwaleero nende ohwemeeda mu moni, ese njia ohuchiira Abateende.” 7Mani Paulo yeecha yatula awo mani yacha mu daala ly'omusaacha wundi olaangwa ati Tisio oba Yusito, owali omwiinamiri wa Nasae; enyumba yae yali yasibirana nende Sinagoogi. 8Kurisipa, omutuki wa Sinagoogi eyo, yeecha yesi yafukiirira mu Mwaami, alala nende edaala lyae lyoosi; handi nende Abakoriiti bangi muno nibawuliraanga Paulo nayaala bafukiiriraanga mani beecha baabatiisibwaanga. 9Nae Omwaami yeecha yaboolera Paulo mu huboneherwa mu siro siindi ati, “Otatya daawe, nae lomaloma busa handi otawuleera daawe; 10olwohuba ese ndi alala naawe, mani abulao omuundu yeesi ochia ohunyala ohuhuseeta ahuwumise; olwohuba ndi nende abandu bange abangi muno mu siko sihuluundu muno.” 11Mani yeecha yaamenyayo omwaaka mulala nende emyoosi chisaasaba, nasomesaanga emboosi ya Nasae mu bandu abo. 12Nae Galiyo niyeecha yaaba Gafana wa Akaia, Abayudaaya beecha batekeha ohuseeta Paulo alala, mani banyala ohumuleeta mu moni w'ekooti, 13nibaboola bati, “Omusaacha wuno ali ohuchuusa abandu beenamireenge Nasae esitafukiirirwa nende amalako.” 14Nae Paulo niyali aambi ohuchaaka ohulomaloma, Galiyo yeecha yaboolera Abayudaaya ati, “Nisiba nisyali ohuhola esitadahibwa, oba ohuhola esibi sibi muno, mba ndi nende esifune esyohubesimiirisa Abayudaaya eng'we; 15nae koti lusiri busa esidiira hu biteebo bidiira hu mboosi busa, nende ameeta busa, nende amalako keeng'we abeene, abeene mubyeholereho; Ese ngaana ohuba omukayi w'ebiindu bino.” 16Mani yeecha yabeerusa ohutula mu kooti. 17Mani boosi beecha baakwa hu Sosenesi, owali omutuki wa Sinagoogi, mani nibamala nibamuhubbira mu moni w'ekooti. Nae Galiyo haba siyafwaayo hu siindu sino daawe. 18Lunyuma lwasino, Paulo yeecha yadoong'a eyo endaalo enyiingi echemeedaho, mani naamala alehana nende abafukiiriri, naamala asyabala naliingire mu Siiria, naali nende Purisiila nende Akwiila. Niyoola mu Checherea, yeecha yaabekaho efwiiri lyae, olwohuba yali niyechuba ati achia ohuhola atyo. 19Mani bamala beecha boola mu Efeeso, nae amala abaleha ebweene eyo; nae omweene yemawo yaacha mu Sinagoogi mani nachaaka ohuyingana nende Abayudaaya. 20Nae nibamusaba bati adoong'eho nabo hulw'esiha sileeyi hooho, nae yeecha yakaana; 21nae niyali naalehana nabo yeecha yaboola ati, “Njia ohubakobolera Nasae nadaha,” mani naamala achaaka ohusyaabala atula mu Efeeso. 22Niyali naamalire ohukoba mu Kaisarea, yaasingira yaacha mberi ohuheesa abafukiiriri, mani naamala yeeha achia mu Atyoko. 23Lunyuma lwohumalaho endaalo endiidi ebweene eyo, yaasingira yawaawo mani yacha naakeniya ebifwo bikabuhaane naahalakania mu syalo sya Galatia nende mu syaalo sya Firigia, niyomiisa abeeki boosi. 24Bulaanu, Omuyudaaya wundi olaangwa ati, Apolo, owali omwibulanwa wa Alekisaandaria, yeecha yoola mu Efeeso. Yali omusaacha omanyire ohulomaloma bulai bweene, handi yali yamanya muno ebyandiiko byolerefu. 25Yali niyali yekeswa bulai muno obulamu bu Mwaami adaha; mani koti luyali naali omubalabalanu mu mwooyo, yeecha yaanyala ohulomaloma handi nende ohweekesa bulai bweene ebiindu bidiira hu Yesu, kata nende niyali yabatiisibwa busa mu hubatiisibwa hwa Yowaana hwong'ene. 26Mani yemawo yachaaka ohulomalomaanga naatatya mu Sinagoogi; nae mani Purisiila nende Akwiila nibeecha banyala ohumutekeeresaho, beecha bamubukula mani bacha bamutotolera bulai bweene obulamu bu Nasae adaha. 27Mani niyali nadaha ohuhalakania aweo ache mu Akaia, abafukiiriri beecha bamugumia, mani bamala bandiikira abeke ebbarwa bati bamubukaanire. Mani niyeecha yolayo, yahoonya muno abo abali hulwesisa sya Nasae, nibanyala ohufukiirira, 28olwohuba yayingania nende amaani mahoongo muno Abayudaaya mu lwichuule lw'abandu, niyeekesa niyehoonyera ebyandiiko byolerefu ati Yesu yali niye Kristo.

will be added

X\