EBIHOLWA 17

1Bulaanu, nibali nibamalire ohuhalakania mu Afipolisi nende mu Apoloniya, beecha boola mu Tesaloniika, eyalimo Sinagoogi ey'Abayudaaya. 2Mani Paulo yeecha yayingiramo, koti lukwali omunyira kwae, mani hulwa ejuma chidatu enaamba, yachimala naali ohuyinganaanga nabo ohweema hu byandiiko byolerefu, 3nanyonyola handi niyeekesera alala ati syali nisihoyera muno Kristo ohusaandisibwa yetibwa handi yamala yasyuuhira ohutula mu bafu, mani naboolaanga ati, “Yesu wuno, yindi ohubayaaliraanga, niye Kristo.” 4Mani abandu bandi beecha bafukiirisania nae, mani bamala beyambaania hu Paulo alala nende Siila; koti bu lu Bayonaani banadiini bangi muno bahola alala nende abahasi bangi beemeresi. 5Nae Abayudaaya beecha bachaaka ohuba nende ehali-hali, mani nibeecha baabukula abasohoni bohumakira, beecha bahung'aania esidiiyiha sihoongo, mani bamala baata esiko esyo syoosi mu husasakala, handi nibamala nibaseeta enyumba ya Jasooni, nibadaha babatuse erwaanyi eyiri abandu. 6Nae nibyeecha byaabahaya ohubanyoola, beecha baakwa hu Jasooni, mani bamala bamuhwehweesa alala nende abafukiiriri bandi baabayira mu moni w'abandu bali nende obunyala mu siko sihuluundu esyo, nibalira nababoola bati, “Abasacha bano abamalire ohufumaasa esyaalo syoosi bamalire ohwiicha muno mwosi, 7nihaandi Jasooni amalire ohubabukaanira; mani boosi bali ohuholaanga ebiyingania amalako ka Kaisaali, nibaboola bati aliwo omutuki wundi, Yesu.” 8Mani abandu alala nende ab'obunyala abomusiko bosi beecha bawuunga nibawulira esyeene sino. 9Mani nibamala ohutusa hu Jasooni nende abaasye omusiingo, beecha baabaleha bawaao. 10Abweene awo, abafukiiriri beecha baabukula Paulo nende Siila, mani bamala baabayira esiro e Bberoya; mani nibamala ohwoolayo, beecha baacha beengira mu Sinagoogi y'Abayudaaya. 11Nae bulaanu, Abayudaaya bano bali abawulisi ohuhiraho abo abali mu Tesaloniika, olwohuba bano beecha bakaanira bulai emboosi nende ohudaha ohuhoongo muno, nibewuunja nibakeraania bulai ebyadiikwa byolerefu buli ludaalo, ohubona ebiindu bino nibyali nibiri bityo. 12Mani abandu bandi beecha banyala ohufukiirira, alala nende Abayonaani bahasi aboluyaali lwaakulu, alala nende abasaacha bosi. 13Nae mani Abayudaaya abamenya mu Tesaloniika nibeecha beeka bati emboosi ya Nasae yali niyiyaalwa nende Paulo mu Bberoya mwosi, bosi beecha cheecha ebweene eyo, mani nibachaaka ohusangulusa nende ohuchuuba emikaanda ch'abandu. 14Mani abweene awo, abafukiiriri handi beecha baabukula Paulo bamala bamutusao yawaawo yaacha hu nyaanja, nae Siila alala nende Timoteo badoong'a mu bweene omwo. 15Abo abemirira Paulo beecha bamuyira bamwoosa mu Ateeni; nae nibamala ohunyoola esilagira ohutula eyiri Paulo ati bache baleete Siila nende Timoteo yaali bwaangu, beecha bamuleha awo bawaao. 16Bulaanu, Paulo niyali nasibalindiire mu Ateeni, omwooyo kwae kweecha kwasererwa koti luyabona esiko sihuluundu esyo nisyali syechula banasaye baloonge. 17Mani yeecha yachaaka ohuyinganira mu Sinagoogi nende Abayudaaya alala nende abandu bandi bosi abali badaha Nasae muno, handi nende mu siito buli ludaalo nende abo boosi abali nibafunireho ehabi ohuba ebweene eyo. 18Abandu bandi bosi bali abafukiiririra mu basomi balaangwa Abapichuria nende Abasitoiki bosi beecha babukaanana nae. Nae abandi baboola bati, “Omunanakisi wuno yesi anyala ohuboola siina?” Abandi nabo baboola bati, “Abonehana ohuba naali omuyaali w'emisaambwa mikeni busa” -- olwohuba yali nayalaanga Yesu nende ohusyuuhira. 19Mani beecha bamudiira mani bamala bamuleeta eyiri Areyopaago, nibaboola bati, “Hunyala hwamanyaho enjaala njiaha yino yooli ohuleeta? 20Olwohuba ewe oli ohuleeta ebiindu bikeni mu matwi keefwe; hudaha ohumanya mani si biindu bino byeekesa.” 21Bulaanu abandu bamenya mu Ateeni boosi alala nende abakeni bali bamenya mu bweene omwo bali beboya huhulomalomaanga busa nende ohutekeeresaanga busa ebiindu biyaaha esiha syoosi. 22Mani Paulo niyeecha yema akati-kaati wa Areyopaago, yeecha yachaaka ohulomaloma naboola ati, “Basaacha ba Ateeni eng'we, ndi ohwomiisa endi mu buli ngeri yoosi, muli abanadiini muno. 23Olwohuba nimbeere nimbita-bita, mani nimbona ebiindu bimwiinamira, njichire handi ndakaana alutaari yiriho obwandiike buno buti, ‘Eyiri nasaye otaamanyihaane.’ Mani oyo yimwiinamiraanga koti otaamanyihaane, niye omweene wuno yindi ohubayaaliraanga. 24Nasae oyo owaloonga esyaalo nende buli siri mu bweene omwo, oli Omwaami owo Mukulu nende esyaalo, haba saamenyaanga mu biyeembeho byombahibwa nende omuundu, 25oba busa haba saanyala ohuhalaabanirwa nende amahono k'abandu, koti oba naali mubudahano bw'esiindu syoosi, koti ali omweene oyo oberesaanga abandu boosi obulamu nende omuuya kuyeerwa nende buli siindu syoosi. 26Handi oyo owahola ohutula mu muundu mulala buli syaalo sy'abandu banyale ohumenya hu buli sifwo siri hu syaalo, naamalire ohutekeha, mani yabula ebiha by'omwaaka nende enjaho chaabyo chibirimo, 27ati banyale ohukoonya Nasae, nende esuubi mbwe banyale ohumwolaho nende ohumunyoola. Kata katyo haba saaliho eyale nende buli muundu hweefwe, 28olwohuba ‘Ni mumweene oyo muhunyala ohubeera abalamu handi nende ohukeenda handi nende ohubaao’; koti busa abembi beeng'we baboolaanga bati, ‘Olwohuba efwe mu bwadyeeri bweene huli abaana bae.’ 29Mani koti luhuli abaana ba Nasae, huhoyeere obutabaasa huti, efwaani yae yiri koti efeesa, oba esibya simesamesana, oba koti ekina, ebiindu bitula mu mbaasa y'ohukeraania, nende embasirisa ch'abandu busa. 30Nasae yamala ohulekeresa ebiha byali ebyobutamanya, nae bulaanu, alagira abandu boosi buli abundu woosi, ohwefunaka, 31olwohuba yamala ohuchwichwiisa oludaalo lu yahaheengereho esyaalo omusango mu bulungifu niyehoonyera omuundu yiyamala ohutaawo, handi sino yamala ohusyomiisa eyiri abandu boosi niyehoonyera ohumusyuusa ohutula mu bafu.” 32Bulaanu nibeecha bawulira hu husyuuha hw'abafu, abandi bachaaka ohumuchekenja busa; nae abandi beecha baboola bati, “Efwe hudaha ohuhuwuliraho handi byoboola ebidiira hu byeene bino.” 33Mani sakira Paulo yeecha yabatulamo yawaawo. 34Nae abasaacha bandi beecha bamweyambaaniaho, mani bamala bafukiirira, mu beene abo Dyonisia owa Omw'Ayeropagite nende omuhasi wundi olaangwa ati, Damari alala nende abandu bandi bali nabo bosi.

will be added

X\