EBIHOLWA 16

1Handi yemawo yeecha e Deribe nende e Lisitura. Omweeki wundu yesi yali ali ebweene eyo olaangwa mbwe Timoteo, omusyaani womuhasi Muyudaaya owali niyafukiirira; nae simwaana yali Omuyonaani. 2Yali omwaana owamanyihana mu bafukiiriri abali nibamenya mu Lisitura nende Yikoniamu koti omwaana mulai. 3Paulo yeecha yadaha ache nende Timoteo; mani yeecha yaamubukula mani yaamuheba, hulw'Abayudaaya abali nibamenya mu bifwo bibali nibachiamo ebyo, olwohuba boosi bali bamanya bati simwaana Timoteo yali Omuyonaani. 4Mani koti lubali nibakeenda olukeendo lwaabwe olwo nibabita mu biko bihuluundu ebyo, babadiisaanga abafukiiriri balichiingi nibamenya omwo ebiindu bi batume nende abahuluundu bali nibamenya e Yerusaalemu bali babisa. 5Mani abafukiiriri abo beecha bomiisibwa muno mufukiirira, handi beecha bengiya buli ludaalo. 6Mani beecha babita mu situundu sy'esyaalo esyo esilaangwa mbwe Firigia handi nende mu Galatia, nibamalire ohukaanibwa nende Mwooyo Mwolerefu obutalomalomaho emboosi yoosi nibali mu Asiiya. 7Mani nibali nibamalire ohwoola mu moni wa Misiiya, bateemaho ohuchia ohwingira mu Bbitinia, nae Mwooyo wa Yesu haba siyabakanya daawe; 8Hulweesyo, beecha babitira aambi nende Misiiya, mani beemao baacha beehirira boola mu Turaosi. 9Mani Paulo yeecha yanyoola ohuboneherwa mu siro: omusaacha wundu ohutula mu Makedonia yaboneha niyeemere namwekwedaanga naboolaanga ati, “Yicha eno e Makedonia otuhoonye.” 10Mani niyaba naamalire ohubona ohuboneherwa ohwo, abweene awo hwecha hwachaaka ohudaha huti huchie mu Makedonia, nihwomiisire huti hane Nasae yali natulaangire ohuchia ohubayaalira emboosi ndayi. 11Nihwachaaka ohusyaabala ohutula mu Turaosi, hwecha hwadiira olukeendo lwa tiiri olucha e Samotereesi, mani oludaalo luloondaho hwecha hwemeeda hwacha e Neyopolisi, 12handi ohutula eyo hwecha hwacha e Filipi, esiko syali nisyemereere byoosi mu disiturikiti eyo eya Makedonia, handi syali mu butuki bw'Abaroomu. Hweecha hwehala mu siko sihuluundu sino hu mbaka y'endaalo nyiingo hooho; 13mani hu ludaalo lwa Sabbaato hwecha hwatula erwaanyi w'esiruwa mani hwacha hu ndulo w'omwaalo, yihwali nihubaasira ohubaayo esifwo sy'ohwekongoyeramo Nasae; mani hwecha hwehala aasi, mani hwalomaloma nende abahasi bali nibebusiire alala ebweene eyo. 14Mulala hu bandu bali nibatutekereese yali omuhasi olaangwa mbwe Lidiya, owali natula mu siko sihuluundu sya Siyatiira, owali omukusi w'ebiindu byehoonyerwa nende abandu batuki, handi owali omwiinamiri wa Nasae. Omwaami yeecha yamwikula ebibaaso awulire mani adiire ebiindu bi Paulo yali nalomaloome. 15Mani niyali naamalire ohubatiisibwa alala nende edaala lyae lyoosi, yeecha yatukoonya naboola ati, “Nimuba nimumalire ohumbona muti ndi omufukiiriri w'Omwaami, mwiiche mu nyumba yange mani mumenye omwo.” Mani yeecha yatuyingira mani hwaacha. 16Nihwali nihuli ohuchia mu sifwo syohwekongooyeramo Nasae, hwecha hwabukaanana nende omuhaana muhalaabani wundi owali naaliho omusaambwa kw'ohulakula, mani yali niyafunisa abahongo bae ebiindu biingi mu mulimo kw'ohulakula okwo. 17Yecha yalondaanga Paulo alala naafwe naalira naboola ati, “Abasacha bano bahalaabani ba Nasae w'Akulu Bweene, abali ohubayaalira engira y'obuwonia.” 18Mani sino yeecha yasiholaanga hulw'endaalo enyiingi muno. Nae Paulo yeecha yaanyoolera, mani yakaluuhana mani yaboolera omusaambwa okwo ati, “Hu lagira mu liita lya Yesu Kristo ohutula mu muhaana oyo.” Mani kweecha kwamutulamo esiha syeene esyo. 19Nae abeene muhaana oyo nibeecha babona bati esuubi lyefuni yaabwe lyali nilimalire ohuwa, beecha baakwa hu Paulo alala nende Siila mani baabahwehweesa mani baabayira mu siito mu moni w'abeemeresi; 20mani nibali nimalire ohuboosa eyiri abatekeeresi b'emisaango beecha baboola bati, “Abasacha bano n'Abayudaaya nibo mani bali ohudondobania esiko sihuluundu syeefwe sino. 21Bali ohwekesanga emiduunga chitaali echihoyera efwe Abaroomu ohuchifukiirira kata nende ohuchiholeraho.” 22Esidiiyiha syeecha syosi syeyambaania nabo ohubaseeta; mani abatekeeresi b'emisaango beecha baatandulaho engubo chaabwe mani baamala baatusa amalako bati bahuyibwe nende embariki. 23Mani nibali nibamalire ohubanaalaho mahabi kayera, beecha baabasukuna mu jiela, nibalagira omuliindi w'ejiela ohubaliinda bulai. 24Niyali niyahamala ohunyoola esilagiro sino, yeecha yabengisa yaabata mu jiela eyomukati bweene, mani naamala nababoya amakulu kaabwe hu mayingo. 25Nae aambi w'esiro akati, Paulo nende Siila beecha baaba nibali ohwekongooyanga Nasae, handi nibemberaanga Nasae enyembo, nae ababoye bali nibabatekeerese, 26mani abweene awo, musisi ehoongo muno yeecha yakwaawo, eyakera kata nende emisiingi ch'ejiela choosi chatengereha; mani abweene awo, enjiki choosi cheecha cheekulwao mani epiingo cha buli muundu yeesi cheecha cheekulwao. 27Mani omuliindi w'ejiela niyeecha yaasimuha mani yeecha yabona ati emilyaango ch'ejiela choosi chali nichiikuulweo, yeecha yasobola olugaanga lwae mu silaalo, mani yadaha ohweyita omweene, nabaasa ati, ababoye boosi bali nibamalire ohweyiba. 28Nae Paulo yeecha yehuuma nende ekono hoongo naboola ati, “Otewumisaho, olwohuba efwe fweesi mbano huli ano.” 29Mani yeecha yalaanga bamuleetere omuliro mani niyeyina ohwingira mu jiela bwaangu, mani naali ohutengerehaanga handi natiire yeecha yaakwa aasi mu moni wa Paulo nende Siila, 30mani yamala yabatusa erwaanyi mani yamala yaboola ati, “Basaacha eng'we, siina syeene sihoyeere ohuhola hunyemeo monisibwe?” 31Nabo bamuboolera bati, “Fukiirira mu Mwaami Yesu, mani ochia ohuwonisibwa, ewe alala nende edaala lyao.” 32Mani beecha bamulomalomera alala nende abo boosi abali mu nyumba yae emboosi y'Omwaami. 33Mani yeecha yababukula esiha sy'esiro syeene esyo, mani yaboosa amoobbe nende ebinyubu byaabwe ebyo, mani yamala yabatiisibwa abweene awo alala nende edaala lyae lyoosi. 34Handi yamala yeecha yabaleeta yabengisa mu nyumba yae, mani yamala yatuula ebyohulya mu moni waabwe; mani omweene yeecha yachaaka ohwehoyera alala nende edaala lyae lyoosi olwohuba yali nanyalire yesi ohufukiirira mu Nasae. 35Nae nibwahya muchuli, abatekeeresi b'emisaango beecha batuma abasirikare ni baboola bati, “Leha abasaacha abo baweo.” 36Mani omuliindi w'ejiela yeecha yaboolera Paulo emboosi cheene echo ati, “Abatekeeresi b'emisaango bahatuma emboosi ohubaleha muweeo; mani bulaanu mutule erwaanyi mumale muweeo nende emireembe.” 37Nae Paulo yeecha yababoolera ati, “Bamalire ohututoocha mu luchuule lw'abandu, nibatuhengeere omusango kwoosi, efwe abasaacha Abaroomu, handi bamalire ohutwikalira mu jiela, nae bulaanu handi baba batusukuna erwaanyi mu ngiso busa? Haba! Lehe abeene beeche batutuse erwaanyi.” 38Abasirikari abo beecha baacha baboolera abatekeeresi b'emisaango emboosi cheene echo, mani beecha baatya muno nibawulira bati hane bali nibali Abaroomu; 39mani beemao beecha baabefunakira. Mani bamala baabatusa erwaanyi, mani bamala baabasaba batule mu siko sihuluundu esyo. 40Mani beecha batula erwaanyi w'ejiela, mani bamala baacha bakeniya Lidiya; mani nibali nibamalire ohubonana nende abafukiiriri bandi beecha babagumia mani bamala bawaao.

will be added

X\