EBIHOLWA 15

1Nae abandu bandi beecha beeha ohutula mu Buyudaaya mani nibachaaka ohwekesanga abafukiiriri bati, “Nimutahebwa ohulondakana nende emiduunga cha Musa, haba sonyala ohuwonisibwa.” 2Nae Paulo nende Bbarunabba nibeecha baaba nende embaha ndeeyi nabo, Paulo nende Bbarunabba nende abandu bandi beecha badoolebwa ohuniina ohuchia e Yerusaalemu eyiri abatume nende abahuluundu bandi hulwesidinyu sino. 3Mani koti lubali nibaboleerwe nende abafukiiriri, beecha babita mu Foenisia nende Samaria, nibababoolera ebidiira huhukaluhaana hw'Abateende, mani beecha basangaasa muno abafukiiriri boosi. 4Niboola e Yerusaalemu, babukaanirwa bulai nende abafukiiriri nende abatume nende abahuluundu, mani nibababoolera byoosi bi Nasae yali nabaholeraangamo. 5Nae abafukiiriri bandu abali nibali hu mukaanda kw'Abafalisaayo beecha basiingira, mani baboola bati, “Sihoyeere ohubaheba handi nende ohubalagira ohulondakana nende amalako ka Musa.” 6Abatume nende abahuluundu bali nibebuusire alala ohulomalomaho hu siindu sino. 7Mani lunyuma lwohuba nende ohukaniaya ohuleeyi muno, Peetero yeecha yaasingira mani yababoolera ati, “Eng'we abaasyefwe, mumanyire muti mu ndaalo hale, Nasae yeecha yabelondera omweene, ati ohubitira mu munwa kwaange, Abateende abo bahoyeere ohuwulira emboosi ndayi mani beemeo bafukiirire. 8Mani Nasae omanyire emyooyo, yeecha yabatusira obujulisi, nababeeresa Mwooyo Mwolerefu, koti busa luyatuholera; 9mani yeecha yaahaya ohutaao ohukabuhana hwoosi akati w'efwe nende abeene abo, nae yaanyala ohulabya emyooyo chaabwe hulw'efukiirira. 10Bulaanu mani, lwasiina eng'we muhema Nasae nende ohuta ekoombo mu makosi k'abeeki li kata ba seefwe oba efwe hutanyala ohukiingaho? 11Nae efwe hufukiirira huti hucha ohunyala ohuwonisibwa ohubitira mu sisa sy'Omwaami Yesu, koti busa bosi bacha ohuba.” 12Mani omuhung'aano kwoosi kweecha kwanyita chi; handi beecha batekeeresa Bbarunabba nende Paulo koti lubali nibanyonyola obulolero nende ebyaamayia bi Nasae yali nabaholeraangamo nibali mu Abateende. 13Lunyuma lwohumala ohulomaloma, Yakobbo yeecha yaakobolamo ati, “Eng'we abaasyefwe, mutekeerese. 14Simioni anyonyoole koti lu Nasae yachaaka ohukeniya Abateende, ohubatusamo abandu bae. 15Mani ohweema hu sino, emboosi ch'abanabbi chifukiirisania nacho ohweema koti lu byaandiikwa biti, 16‘Bino nibiweere, njia ohukobola, mani njia ohwombaha handi enyumba ya Daudi, eyakwa; Njia ohwombaha handi ebyanyaasiha, handi njia ohuyeemesa, 17hu bandu badong'ereyo boosi basaambihe bakoonye Omwaami, handi Abateende boosi abalaangibwa nende eliita lyaange, 18Omwaami aboola, owakera ebiindu bino byoosi byamanyihana ohutula hale.’ 19Sakira, eheengao yange yiri yiti, efwe haba sihuhoyeere ohusaandia Abateende abo ababa nibakaluuhana eyiri Nasae, 20nae huhoyeere hubandiikire beliinde ohutula hu mufuto okw'emisaambwa nende ohutula hu mukwoobo nende hw'esyo syoosi esiba nisimikirwe busa, nende ohutula hu mabaanga. 21Olwohuba ohutulira elalira hu njibulo hale muno, Musa abechanga mu buli siko sihuluundu, abandu abamuyaala, olwohuba asomebwaanga buli lwa Sabbaato mu Sinagoogi choosi.” 22Mani syeecha syabonehana ohuba esilai muno eyiri abatume nende abahuluundu, alala nende abafukiiriri boosi, ohwedoolamo abasaacha handi ohubatuma bache Atyoko alala nende Paulo nende Bbarinabba. Beecha batuma Yuda olaangwa ati Bbarisabba, nende Siila, abasaacha beemeresi abali mu bafukiiriri abo, 23nibali nende ebbarwa yino yiti: “Abasyefwe, abatume nende abahuluundu, eyiri abafukiiriri basyeefwe abali mu Abateende bali mu Atyoko nende mu Siiria nende mu Silisia, amaheeso. 24Koti luhumalire ohuwulira huti abandu bandi ohutula mweefwe baabasandiisye nende emboosi nyiingi, nibadoondobania ebibaaso byeeng'we, ahwahaba mbwe haba sihwali nihubalagiire hutyo, 25situbonehaniire esilai, nihumalire ohuwuliirisania mu siindu silala, ohudoola abasaacha nende ohubatuma yimuli nibali nende abaheerwa beefwe Bbarunabba nende Paulo, 26abasaacha abamala ohwewaayo obulamu bwaabwe hulw'Omwaami weefwe Yesu Kristo. 27Sakira mbano hutumire Yuda nende Siila, abeene abacha ohubakaniayira ebiindu biri nasilala bityo, nende emboosi y'omunwa. 28Olwohuba sibonehaane esilai muno eyiri Mwooyo Mwolerefu, nende eyiri efwe beene ohutabadwiiha obusito bwoosi ohutusaho ebiindu bino bihoyera: 29huti muhoyeere ohwekaya ebiindu esiindu syoosi esiba nisiwereerwe emisaambwa handi nende amabaanga, handi nende ohutula hw'esyo esiba nisimikirwe busa, handi ohutula hu mukwoobo. Nimweliinda ohutula hu biindu bino byoosi, muba mucha ohuba nimuholere bulai muno. Mubeeyo.” 30Mani nibaba nibamalire ohutula olukeendo, beecha beeha baacha mu Atyoko; mani nibaba nibamalire ohubuusa alala abafukiiriri, beecha babadiisa ebbarwa eyo. 31Mani nibamala ohuyisoma, basangaala muno ohweema huhugumisibwa ohwo. 32Mani Yuda nende Siila, abali handi abanabbi, beecha bagumya muno abafukiiriri abo nibehoonyera emboosi enyiingi muno mani banyala ohubomiisa muno. 33Mani lunyuma lwohumala embaka endeeyi hooho, beecha baseebulwa nende abafukiiriri abo nende emireembe bakobola eyiri abo abali nibabatumire. 34Nae syabonehana esilai eyiri Siila ohudoong'a ebweene eyo. 35Nae Paulo nende Bbarunabba beecha badoong'a mu Atyoko, nibekesaanga handi nibayalaanga emboosi y'Omwaami, alala nende abandi abangi bosi. 36Mani lunyuma lw'endaalo endiidi hooho, Paulo yeecha yaboolera Bbarunabba ati, “Ewe yicha, leha hukoboleyo mani hukeniye abafukiiriri abali mu buli siko sihuluundu yihwali nihwayaalaho Emboosi y'Omwaami, hubone koti lubaba nibali.” 37Nae Bbarunabba yali nadaha babukule bache nende Yowaana olaangwa ati Mariko. 38Nae Paulo yabaasa ati sihira obulai obutachia nende oyo owali nabekabuuleho nibali mu Pamufilia, otachia nabo ohuhola emirimo. 39Mani abweene ewo yeecha yatunduhawo amayiingi amaangi muno mani beecha bakabuhanamo; Bbarunabba yabukula yacha nende Mariko mani basyabala bawaao baacha mu Saipuraasi, 40nae Paulo yadoola Siila mani bawaao, nibamalire ohuteebwa mu sisa sy'Omwaami nende abafukiiriri abo. 41Mani yemawo yacha yahalakania mu Siiria nende mu Silisia, nibomiisa abafukiiriri bali omwo.

will be added

X\