EBIHOLWA 14

1Bulaanu mu Yikoniamu, beecha beengira boosi alala mu Sinagoogi y'Abayudaaya, mani balomaloma ohwoola lu mukaanda muhoongo muno kweecha kwafukiirira, Abayudaaya alala nende Abayonaani. 2Nae Abayudaaya batanyala ohufukiirira beecha badondobania Abateende handi babanyaasa ebibaaso byaabwe ohuhayana nende abafukiiriri baasyabwe. 3Mani beecha badoong'a eyo hulw'embaka ndeeyi muno, nibalomalomaanga hu Mwaami nende obujiing'u, abali nende obujulisi bw'Emboosi y'esisa sya Nasae, nibahola obulolero nende amaya nende amahono kaabwe abeene. 4Nae abandu bali nibamenya mu sino sihuluundu esyo, beecha bakabuhanamo; abandu baakwa alala nende Abayudaaya, nae abandi baakwa alala nende Abatume. 5Mani Abateende alala nende Abayudaaya alala nende abemeresi baabwe, ohubaswaasa nende ohubahubba amakina, 6beecha basimanya mani beeruha baacha e Lisitura nende e Deribe, ebiko bihuluundu bya Likoniiya, handi nende mu ngoongo chisibiraane abweene awo; 7mani ebweene eyo niyo beecha bayaalira emboosi ndayi. 8Bulaanu mu Lisitura, mwalimo omusaacha wundi yali niyehaale, otanyalaanga ohwehoonyera amakulu kae; yali yalema ohutula mu budoto bwae, natanyala ohukeendaho daawe. 9Omusaacha oyo yeecha yatekeeresa Paulo naalomaloma; mani Paulo niyeecha yamuhang'aasa emoni, mani yaabona ati yali nende efukiirira ati anyala ohuwonisibwa, 10Paulo yeecha yaalomaloma mu kono ly'akulu ati, “Yema nende amakulu kao okololohe.” Mani yaduuma yeema mani yachaaka ohukeenda. 11Mani esidiiyiha nisyabona esiindu si Paulo yali naaholere, baniinia amakono kaabwe akulu nibaboola mu lulimi Lukawoniiya bati, “Mbao banasaye hane batwihiire nibafwaana koti abandu!” 12Balaanga Bbarunabba bati Sewusi, nae Paulo, olwohuba yali niye omulomalomi muhunuufu, bamulaanga bati Herume. 13Mani abalaamisi ba Sewusi, yi nyumba yae y'amalaamo yali mu moni w'esiko sihuluundu esyo, alala nende abandu boosi, beecha baleeta elaawu alala nende ebimuli hu biruwa, mani nibasaba bati bawerere Paulo. 14Nae abatume bano, Bbarunabba nende Paulo nibeecha basiwulira, bataandula engubo chaabwe mani nibeeruha nibatula mu sidiiyiha omwo nibalira bati, 15“Bandu eng'we, lwasiina muhola sino? Efwe fwesi huli abandu, ab'omubiri kufwaanana koti okweeng'we, nae hubaleetera emboosi ndayi, yiti eng'we muhoyeere ohulehana nende ebiindu bino ebibulamo obuhoonyi muche eyiri Nasae owahola ekulu nende esyaalo, nende enyaanja alala nende ebiindu byoosi ebibirimo. 16Mu njibulo chabitao, yeecha yakanya ebyaalo byoosi ohukenderaanga mu ngira chaabwe abeene; 17kata katyo omweene haba siyeleha omweene nataali nende obujulisi, olwohuba yaholaanga ebiindu bilai, handi yababeeresaanga efula ohutula Mukulu, nende obwiire bulimo ebyaamo biingi muno, niyekusa emyooyo cheeng'we nende ebyohulya nende esangaalo.” 18Emboosi chino chakera byaabahayira elalira ohukayira abandu ohubaweerera. 19Nae Abayudaaya beecha boolao nibatula mu Atyoko nende Yikoniamu; mani nibamala ohubemberesa abandu abo, beecha bachaaka ohuhubba Paulo nende amakina handi nibamuhwehweesa nibamutusa mu siko sihuluundu esyo, nibakaala bati yali naamalire ohufwa. 20Nae abeeki nibeecha bamwebuusaho, yeecha yaasingira mani yamala yengira mu siko sihuluundu omwo; mani hu ludaalo luloondaho, yeecha yawaawo yemeeda ohukeenda nende Bbarunabba nibacha e Deribe. 21Nibali nibamalire ohuyaalira abandu bomusiko sihuluundu esyo, handi nibamalire ohunyoola abeeki bangi, beecha bakobola e Lisitura handi nende mu Yikoniamu, handi nende mu Atyoko, 22nibadinyia emyooyo ch'abeeki balichiingi mu biko bihuluundu ebyo, nibabagumia bati bemeede ohuhula mu fukiirira, handi nibaboola bati huhoyeere ohubita mu husaanda ohungi muno huhweemeo hunyale ohwingira mu Bwaami bwa Nasae. 23Mani nibaba nibamalire ohubadoolera abahuluundu mu buli mukaanda kw'abafukiiriri, beecha bekongooya Nasae, handi basiiba nibabadiisa Omwaami yibali bafukiiriramo. 24Mani bulaanu beecha bahalakania mu Pisidia mani boola mu Pamufilia. 25Mani nibaba nibamalire ohuyaala emboosi ya Nasae mu Periga, beeche beeha baacha mu Ataliya; 26mani nibatula eyo beecha basyabala baacha mu Atyoko, yibali basiimibwa muno mu sisa sya Nasae, hulwomulimo kubaholayo. 27Mani nibali nibamalire ohwoola, beecha babuusa abafukiiriri boosi alala, mani bamala bababoolera byoosi bi Nasae yali nabaholeraangamo, handi koti luyali niyekuule omulyaango kw'efukiirira eyiri Abateende. 28Mani beecha badoonga nibali nende abeeki hulwa embaka endeeyi muno.

will be added

X\