EBIHOLWA 13

1Bulaanu, mu bafukiiriri bali bamenya mu Atyoko mwalimo abanabbi nende Abeekesa, Bbarunabba, Simioni owali nalaangwa ati Nigari, Lusiya owa Sireeni, Manayene mulala hu bandu bomusiina sya Herode Atipa Gafana we Galilaaya, nende Saulo. 2Nibali nibali ohwiinamiraanga Nasae alala nende ohusiibaanga, Mwooyo Mwolerefu yeecha yaboola ati, “Mungabulire endulo Bbarunabba nende Saulo hulwomulimo kundabalaangira.” 3Mani lunyuma lwohusiiba nende ohwekongooya, beecha baabeesaho amahono kaabwe mani bamala baabatuma bache. 4Mani koti lubali nibatumiibwe nende Mwooyo Mwolerefu, beeha baacha e Seleusia; handi ohutula eyo beecha basyabala baacha e Saipuraasi. 5Niboola e Salamisi, beecha bayaala emboosi ya Nasae mu Sinagoogi ch'Abayudaaya. Handi bali nende Yowaana ohubahoonya. 6Nibali nibamalire ohuhalakania esisiinga syoosi niboolere e Pafoosi, beecha bakaana omuholi w'amaya wundi, omunabbi w'obubacha Muyudaaya, olaangwa ati Bbari-Yesu. 7Yali omwiicha wa Gafana w'esisiinga esyo, olaangwa ati Sarugiya Paulu, omusaacha wali omukesi-kesi muno, oweecha yalaanga Bbarunabba nende Saulo mani yadaha awulireho emboosi ya Nasae. 8Nae Elima omunamaya oyo (ako niko amahulundu akeliita elyo) yabakayira nadaha ohukosoobania Gafana oyo ohumutusa hu fukiirira eyo. 9Nae Saulo, yesi olaangwa ati Paulo, niyechuule Mwooyo Mwolerefu, yeecha yaamutingaala namwehaliirisa 10mani yamala yamuboolera ati, “Mwaana wa Sitaani ewe, omusuku w'obuluungifu, owechula obubacha nende obukodyo bubi, olyoola yena ohukodyaanga engira ngololofu ch'Omwaami? 11Mani bulaanu, mbawo, omuhono kw'Omwaami kuhwiihiraho, mani ochia ohuba omuwofu handi otanyala ohubona elyuuba hulwesiha.” Abweene awo, enang'oong'we nende esiirima byamukwaaho mani yachaaka ohubuuka-buuka nakoonya abandu ohumwimirira nibamudiirire omuhono. 12Bulaanu Gafana oyo yeecha yafukiirira, niyamala ohubona esyali nisikwiireo, olwohuba yali niyewunyire muno enjekesa y'Omwaami. 13Bulaanu, Paulo nende omukanda kwabaasye beecha bachaaka ohusyaabala ohutula e Pafoosi, mani beecha boola e Periga mu Pamufilia. Mani Yowaana yeecha yabaleha mani yakobola e Yerusaalemu; 14nabo bachiririra nibatula e Periga mani nibeecha niboola mu Atyoko sya Pisidia. Mani hu ludaalo lwa Sabbaato beecha beengira mu Sinagoogi mani beehala aasi. 15Nibali nibamalire ohusoma amalako nende abanabbi, abemirisi ba Sinagoogi beecha baabalaanga nibaboola bati, “Basyeefwe, nimuba nimuliho nende emboosi yoosi eyohugumia abandu, muyiboole.” 16Mani Paulo yeecha yaasingira, mani niyehoonyera amahono kae yeecha yaboola ati: “Basaacha ba Yisirayiri, nende eng'we abatya Nasae, mutekeerese. 17Nasae w'abandu bano Abayisirayiri yadoola ba seefwe mani yabahola baaba abandu bahunuufu muno nibali bamenya mu syaalo sy'Emisiri, mani niyehoonyera omuhono kusiingiswe, yeecha yabatusamo. 18Handi hu mbaka ye myaaka amahumi kane, yabaliinda nibali mu sichiimi. 19Mani nibali nibamalire ohusihirisa ebyaalo bitaanu-na-bibiri, mu syaalo sya Kanani, yababeeresa esyaalo syaabwe esyo ohuba obusihirano, hulweembaka ye myaaka emia chine nende amahumi kataanu. 20Mani ebyo byoosi nibyawa, yeecha yababeeresa abakayi ohwoolera elalira hu Samueli omunabbi. 21Mani beecha basaba omutuki; mani Nasae yeecha yababeeresa Saulo omusyaani wa Kishi, omusaacha w'oluyia lwa Bbenjamini, hulw'emyaaka amahumi kane. 22Nae niyali naamalire ohumalao, yeecha yaasingisa Daudi yaaba omutuki waabwe; oyo yimwene yalomalomaho naboola ati, ‘Njakaanire mu Daudi omusyaani wa Yese omusaacha yi mwooyo kwaange kudaha, ochia ohuhola bindaha byoosi.’ 23Ohutulira mu lwiibulo lw'omusaacha wuno, Nasae yeecha yaleetera Abayisirayiri Omuwonia, Yesu, koti luyasuubisa. 24Ohwiicha hwae nihutoola, Yowaana yeecha yayaala ohubatiisa hwohweyolobya eyiri abandu boosi aba Yisirayiri. 25Mani Yowaana niyali hwamaliirisa omulimo kwae yaboola ati, ‘Siina syeene simubaasa muti ese ndi? Haba sineese omweene oyo. Haba daawe, nae enyuma wange yiriyo ochia ohwiicha, yi esya chebiraato byae ese haba sinyala ohuboolola.’ 26“Basyaange, eng'we abana b'enyumba ya Yibbulaimu, nende abo boosi abali mweng'we abatya Nasae, niifwe abatumirwa emboosi y'obuwonia buno. 27Eyiri abo abamenya mu Yerusaalemu nende abemeresi baabwe, olwohuba mbwe sibanyala ohumumanya, oba ohumanya ebyalomwalomwaanga nende abanabbi, ebisomwanga buli Sabbaato, boseresa bino nibamuheengera omusango ohumuhira. 28Kata abyahaba mbwe haba sibanyala ohumudiisa omusango kwosi okuhoyera ohufwa, kata katyo basaba busa Pilaato abone ati yeetibwa. 29Mani nibali nibahamala ohwoseresa ebyo byoosi ebyamwandiikwaho, beecha bamwaanula hu musaala, mani beecha bamwaalisa mu ng'ani. 30Nae Nasae yaamusyuhisa ohutula mu bafu; 31mani handi hulwendaalo enyiingi yeecha yabonehera abo abali beecha nae ohutula e Galilaaya nibeecha mu Yerusaalemu, abo abali abajulisi bae eyiri abandu. 32Mani efwe hubeleetera emboosi ndayi mbwe, esiindu si Nasae yasuubisa ba laata yeefwe, 33nisyo sino si yosereese eyiri efwe abana baabwe nasyuusa Yesu; koti handi syandiikwa mu Sabbuli y'ohubiri siti, ‘Ewe oli Omwaana wange, olwaleero luno hwibuule.’ 34Nae ohweema hu bwadyeeri mbwe yamusyuhisa ohutula mu bafu, obutakobola handi muhunyala ohubola, yalomaloma mu ngeri yino ati, ‘Njia ohuhubeeresa emikisa myolerefu handi echadyeeri cheene echa Daudi.’ 35Sakira aboola handi mu Sabbuli yindi ati, ‘Ewe haba solikanya Omwolerefu wao ohubola.’ 36Olwohuba Daudi, lunyuma lwohumala ohuhalaabanira esiina sya Nasae, mu mase kae, yeecha yeyalisa, mani yaalisibwa nende ba laatang'ene, mani yamala yaabola; 37nae oyo yi Nasae yasyuusa, haba siyanyala ohubola daawe. 38Mulehe mani simanyihane eyiri eng'we, baana beefwe, siti ohubitira mu musaacha wuno, ohuleherwamo ebibi huyaalibwa yimuli, 39mani handi ohubitira mu mweene oyo, buli muundu yeesi ofukiirira aboololwa ohutula hu buli siindu syotahanyalire ohuboololwaho nende amalako ka Musa. 40Mweliinde mani, ebyo biindu biboolebwa mu banabbi bihaye ohubakwaaho: 41‘Boneho, eng'we abanyoomi, handi muwuke, mani musihirire; olwohuba ndi ohuhola esiholwa mu ndaalo chao, esiholwa syotalifukiirira, omuundu yeesi nahuboolera.’ ” 42Koti lubali nibatula erwaanyi, abandu beecha baabasaba bati, ebiindu bino bibabooleerwe handi hu ludaalo lwa Sabbaato luloondaho. 43Mani oluhung'aano lwa Sinagoogi nilwasakuuha, Abayudaaya bandi nende abandu bali bafukiira mu diini y'Esiyudaaya, beecha baloonda Paulo nende Bbarunabba, abeecha baabalomalomera handi bamala baabadinya bemeede ohukenderera mu sisa sya Nasae. 44Sabbaato yilondaho, aambi esiko sihuluundu esyo syoosi syeecha syebuusa alala ohutekeeresa emboosi ya Nasae. 45Nae Abayudaaya nibabona ebidiiyiha ebyo, beecha beechula ehali-hali, mani nibachaaka ohudondobania ebiindu bi Paulo yali nalomaloome handi nibamunyeka. 46Nae Paulo nende Bbarunabba beecha bemeeda ohulomaloma nibatatya nibaboola bati, “Syali nisihoyera emboosi ya Nasae ohuchaaka ohulomwalomwa eyiri eng'we. Koti lumuli ohuyekaana, mani nimweheengera omusango muti abeene haba simuhoyera obulamu butaakama, boneho, mbawo efwe hwekaluhanira hwechiira eyiri Abateende. 47Olwohuba nilwo koti lu Mwaami atulagiire naboola ati, ‘Mbatongoole ohuba obulafu eyiri Abateende, hu munyale ohwoosa obuwonia mubifwo byoosi eby'ohusyaalo.’ ” 48Mani Abateende nibeecha bawulira sino, basangaala muno mani bakinia emboosi ya Nasae; mani abo boosi abali nibadoolwa ohunyoola obulamu butaakama, beecha bafukiirira. 49Mani emboosi ya Nasae yeecha yasalaana mu syaalo esyo syoosi. 50Nae Abayudaaya bemeeda busa ohusangulusa abahasi bali nibadaha muno ediini y'Esiyudaaya, abaliho nende oluyaali, nende abasaacha bahoongo b'omusiko sihuluundu esyo, mani nibanyala ohusiingisa omwooyo kw'ohusaandia Paulo nende Bbarunabba, mani abandu beecha banyala ohubeerusa ohubatusa mu disiturikiti yaabwe eyo. 51Nae beecha baabahuhumulira olufu lwali hu makulu kaabwe, mani bamala bacha e Yikoniamu. 52Mani abeeki beecha beechula esangaalo handi nende Mwooyo Mwolerefu.

will be added

X\