EBIHOLWA 12

1Mu siha syeene esyo, omutuki Herode yeecha yatusa obwaalaba yachaaka ohulwaanisa abafukiiriri bandi. 2Yecha yeta nende olugaanga Yakobbo mwaanang'ina Yowaana; 3handi niyabona ati esiholwa esyo syasangaasa Abayudaaya, yeecha yemeeda yadiira Peetero yesi. Sino yasihola mu ndaalo ch'esidyaalo sy'Emigaati Ekitabbaahirwe. 4Mani niyali naamalire ohumudiira, yeeche yamuta mu mboyero, mani yaamudiisa emikaanda kine ech'abasirikaari ohumuliinda, nachiiririra ati lunyuma lw'esidyaalo sya Paasaka, achia ohumutusamo amuyire amuwosesere mu lwichuule lw'abandu. 5Mani Peetero yeecha yateebwa mu mboyero; nae ohw'abafukiiriri bemeeda ohumwekongooyera eyiri Nasae. 6Mani esiro syeene si Herode yali niyetekeheereho ohutusiramo amuwosesere mu lwichuule lw'abandu, Peetero yali niyeyaliise akati-kaati w'abasirikaari babiri, naboyerwe nende enyororo chibiri, handi hu siruwa sy'ejiela, hwaliho abaliindi bandi nibaliindire; 7nae bone, malaika w'Omwaami yeecha yabonehana, mani obulafu bwaaduha mu siseenge sy'ejiela. Malaika oyo yeecha yakuuda Peetero mu mbafu mani yaamusimusa naboola ati, “Siingira bwaangu.” Mani eminyororo echo cheecha chabololoha hu mahono kae chaakwa aasi. 8Mani malaika oyo yamuboolera ati, “Wefwaale engubo nende ebiraato byao.” Mani Peetero yeecha yahola atyo. Mani malaika handi yeecha yamuboolera ati, “Weboye olusibiro lwao mu sibuno mani wunonde.” 9Mani Peetero yeecha yaatula erwaanyi, mani yaloonda malaika oyo. Peetero haba siyamanya ati esiindu si malaika yali naaholere syali esyadyeeri, nae yabaasa ati yali naali ohuboneherwa. 10Mani nibali nibahamala ohubita hu baliindi bataangira handi nende abohubiri, beecha boola hu siruwa sy'ebichuma esiingira mu siko sihuluundu esyo. Esiruwa esyo syeecha syabeyikulira esyeene, mani bamala batula erwaanyi babita hu ngira ndala nibawaao. Mani abweene-na-bweene awo ni malaika amutulaho. 11Mani Peetero yeecha yaamanya ati ebyali bimweholeheho byali ebyadyeeri, mani yaboola ati, “Bulaanu ndi omwomiifu endi hane Omwaami niye otumire malaika wae ohwiicha ohunjabina mu mahono ka Herode, handi nende mweebyo byoosi bi Bayudaaya bali nibaambasirisira.” 12Niyecha yamanya atyo, yacha enanyuumba ya Maria, ng'ina Yowaana olaangwa ati Mariko, yi bandu bangi bali bebuusire alala nibali ohwekongooyanga. 13Mani niyahong'oonda hu lwiiki lw'ohusiruwa, omuhalaabani olaangwa Rooda yeecha ohubona. 14Mani niyeecha yamanyirisa ekono lya Peetero, yasangaala muno mani yeruha natekuule esiruwa nae yacha yaboola ati Peetero niye owali yeemere erwaanyi hu siruwa. 15Nabo baboolera omuhaana oyo bati, “Mbao hane okwaaho elalu.” Nae yemeeda ohwomiisa ati syadyeeri. Nabo bamuboolera bati, “Anyala ohuba naali malaika wae.” 16Nae Peetero yemeeda ohuhong'oonda; mani nibekulao, bamubona mani bawuka muno. 17Nae Peetero yabaholera ahalolero nende omuhono ati bawuleere, mani yeecha yabeekesa koti lu Mwaami yamutusa mu mboyero. Mani yamala yaboola ati, “Muboolere mutyo Yakobbo nende abafukiiriri boosi” Mani Peetero yabaleha yaacha mu sifwo siindi. 18Bulaanu obwiire nibwahya, ohusasakala hwoosi haba sihwaliwo mu basirikaari hu biindu bidiira hu Peetero. 19Mani Herode niyali naamalire ohumukoonya handi natamwakaanire, yeecha yateeberesa abaliindi abo mani yamala yaalagira ati bahoyeere ohwiitwa. Mani Herode yeecha yaatula mu Buyudaaya yeecha mu Kaisarea, mani yaaba eyo. 20Bulaanu, Herode yeecha yanyoolerera muno abandu ba Tiro nende Sidoni; mani beecha yaali nibali mu sidiiyiha ohumubona, nae nibali nibamalire ohuhola obwiicha nende Bbulasito, owali omuhulundu w'edooho ly'omutuki, basaba bati emireembe chibeewo, olwohuba esyaalo syaabwe syali nisinyolaanga ebyohulya ohutula hu syaalo sy'omutuki oyo. 21Mani hu ludaalo lwali nilutekeheebwe, Herode yeecha yafwaala ebifwaalo byae by'obutuki, mani yehala hu sisaala sy'obutuki, mani yachaaka ohulomaloma nende abandu. 22Mani abandu beecha behuuma nibaboola bati, “Ekono elyo lya nasaye, nae haba siliomuundu busa!” 23Abweene-na-bweene awo, malaika w'Omwaami yamwiita, olwohuba haba siyali nabeeresa Nasae oluyaali; yeecha yaafwa mani enyeende chamulya. 24Nae emboosi ya Nasae yemeeda ohuhula nende ohutabaala. 25Mani Bbarabba nende Saulo beecha bakobola nibatula e Yerusaalemu nibamalire ohwoseresa omulimo kwaabwe, nibeecha nende Yowaana wali alaangwa ati Mariko.

will be added

X\